زبدةالاشعار

یادیمه دوشدوقجا شور عاشرشهر الحرام #جون_غلام_سیاه #شانی_تبریزی

در حالات و شهادت غلام سیاه
.
✍️ #زبدةالاشعار ✍️
.
🆔: @nohe_torki
.
مرحوم شانی تبریزی
.
یادیمه دوشدوقجا شور عاشر شهر الحرام
سلب اولور طاقت تاپار بنیاد صبریم انهدام
.
روز عاشورا ایله بیر امتحان ویردی حسین
بیر اوزی بولدی ندور بیرده خدای لاینام
.
یوزدن اسکیک لشگری قرخ میندن آرتوخ دشمنی
واقعا جای عجبدور بو ثبات و بوقوام
.
نصرته اولمازدی گر چه بیر نفردن احتیاج
جنبۀ محض امامتله گر ایتسیدی قیام
.
محشری یاد ایتمدی قرخ مین نفردن بیرنفر
مین قیامت با وجودیکه او گون ایتدی قیام
.
هرقدر گوستردی ظلم اهلی شقاوت بیدریغ
مین ایله همت اوگون گوستردی اصحاب امام
.
شهریار کم سپاهون لشگرینده واریدی
بیر نفر بعضی یازار بعضی ایکی قاره غلام
.
روی تیره موی تیره ظاهری شکلی قرا
قلب پاک و صاف خونی نور ایمانه مقام
.
وار خبرده اختلاف هرکیمسه بیر نوعی یازار
بو غلامین حالینی اما بو دور حاصل کلام
.
شه رکابینده او گونده بیرغلام اولدی شهید
فخر احرار جهان اولدی تاپوپ عالی مقام
.
شرم ایدردی گلسون اذن آلسون دیردی ای خدا
لطف اولوب سندن اولیدی صید بختیم کاش رام
.
ظاهراً من بیرسیه رویم یوزوم گلمور گیدوم
اذن آلوم شهدن اولوب گوندوز گوزومده تیره شام
.
عرصه تنگ اولماز غلامه یا که دویمازعمردن
گورسه مولاسین بیله یالقزلیوب اشرار شام
.
الغرض شرمین حجابین حاجب عشق ایتدی رد
یول تا پوپ بزم وصاله کام آلوب گوتدوقجا گام
.
اوپدی سُمّ ذوالجناحی ایلدی عیسایه فخر
عیسیِ مریمده آری یوخ بو عزّ و احترام
.
عرض ایدوب هر چند بدبویم سیه رویم ولی
شوقمندم روسفیدِ عرصۀ محشر اولام
.
من غلامم چون سنه وار افتخاریم شهلره
آرزو ایلر بو فخری مین شه با احتشام
.
لطف ایدوب ویرسن اجازه بو تمناده وارام
تابو بدبو قانیمی اول مشگبو قانه قاتام
.
چکمرم ال دامنوندن ویرمسن رخصت منه
چونکه اسباب نجاتیمدور منیم بو اعتصام
.
شه مقام لطفده ویردی غلامه بیر جواب
پوزدی احوالین اونون بو لطفده فخر فخام
.
یعنی آزاد ایتدی خواجه اولدی بنده دل ملول
عرض ایدوب بو باب رحمتدن منی قووما آقام
.
ناز و نعمت وقتی ایتدیم استراحت عیش و نوش
رنج و زحمت وقتی گیتسم عار اولور بو ننگ و نام
.
بسکه الحاح ایتدی یالواردی حسینه آغلادی
اذن میدان آلدی شهدن ایلدی تحصیل کام
.
مُحرم اولدی کعبۀ عشقه تاپوب قلبی صفا
اوّلِ عزمینده اولدی عازم بیت الحرام
.
سسلدی ای عترت شاه شهیدان السّلام
السّلام ای اهلبیت شاه عطشان السّلام
.
چوخ قصوریم واردی خدمتده منی عفوایلیون
تا که اولموم حشرده شرمندۀ خیرالانام
.
بیرقره قولدا بو همّت بو ادب بو معرفت
قصّۀ باران رحمتدور همان ابر ظلام
.
مسئله روشندی یوخ مطلبده اصلا پیچ و خم
گولدورور گل فصلی گلشنده گلی آغلارغمام (1)
.
گلدی میدانه ایدوب اشراریله جنگ شدید
آخرالامر آلدی اطرافین اونون قوم ظلام
.
وردیلار از بس یارا گئتدی قواسی جسمدن
دوشدی یارادن یخلدی گوردی وار چوخ ازدحام
.
شرم ایدوب اما حسینی سسلسون امدادینه
خیمه گاهه یوزدوتوب ویردی او شاهه بیر سلام
.
خواجۀ آزادگان آلدی غلامین تا سسین
گلدی فوراً باشی اوسته ایلدی الطاف تام
.
گوزلرین آچدی گوروب سلطان دیزی اوسته باشین
باش اوجالدوب طاق عرشه بندۀ عالی مرام
.
گلدی #شانی فکریمه بیر ماجرای جانگذار
شرحنه اما دوزنمز دل ولو اولسون رُخام (2)
.
هر شهیدین دادینه یتدی اوگون شاه شهید
داد چرخ دون الیندن ای خدای لاینام
.
ذوالجناح اوستن دوشن ساعت غریب کربلا
کیم یتیدی دادینه قالمیشدی بیر بیمارامام
.
ایسّی قوملار اوسته آهسته دینده العطش
سسلنوردی سو گتوردوخ بیز هوا اوسته سهام (3)
.
اولمادی نسگل او شاه بیکسون امدادینه
بیر نفر گلدی نجه گلدی گرک شرحین یازام
.
خیمه دن چخدی سریعاً نوگل باغ حسن
رم ییوب صیّادیدن گویا غزال خوشخرام
.
خوش روش آهو کیمی ایلردی صحرایه خرام
رهگذارنده ولی صیّاد کین قورموشدی دام
.
شهدن ایما یتدی زینب دوتدی بلکه ساخلاسون
اولمادی ممکن نقدری ایتدی سعی واهتمام
.
بزم وصله عزم ایدنده عاشق هجران نصیب
کیمده وارقدرت یولین کسسون محال ایشدور مدام
.
چوخ شتابیله یتوردی مصرع شاهه اوزین
یعنی یالقوزسان کومکسیزسن عموجان من وارام
.
شه بونا چوخ لطف ایدردی هم آتیدی هم عمو
نازینی چکمیشدی دائم شهریار مستظام
.
بیر یاشندیدی بو دنیادن گیدنده مجتبا
لیک گورموشدی آتا لطفین عمویسندن تمام
.
سینه سی اوسته دؤشندی عادت دیرینیله
ایگله دی اؤپدی شمیم جانیله دولدی مشام
.
گوئیا بلبل قونوب بیر شاخۀ گل اوستونه
دل آچوب شوره گلوب دادن آلورصبرودوام
.
گه اؤپردی یاره لردن گه چکردی اوخلاری
گه دیردی گوزلرون قربانی ای عمّ کرام
.
من کیمی یوخسا سوسوزسان دونمورآغزوندا دیلون
غنچۀ گل تک سولوبدور بو لبان لعل فام
.
گرمیدی راز و نیازه مهربان دلداریله
قویمادی اغیار دون ایتسون ولی اخذ مرام
.
بیر زنازاده یتوب یاندوردی زهرا قلبینی
حمله ایتدی شاه دینه الده پر عریان حُسام (4)
.
گوردی شاهی قصد ایدوب شهزاده فریاد ایلدی
ظالم ئولدورمه عمومی رحم ایله یوخدور آتام
.
نه اوتاندی شاهدن نه رحم ایدوب شهزادیه
نه سالوب قهر خدانی یاده اول نسل حرام
.
نیلدی واضح دیمم اما یری وار مجتبا
آغلاسون عصرین امامی آلمیونجا انتقام
.
ایتدی عبدالّه آبی عبدالَّهَه جانین سپر
بلکه صدمه ورماسون سلطان مظلومه او حام (5)
.
(1) غمام = ابر
(2) رخام = سنگ مرمر
(3) سهام = تیرها
(4) حسام = شمشیر
(5) حام = استعارة به حیوان گفته میشود.
.
.
#اصحاب_الحسین
#یادیمه_دوشدوقجا_شور_عاشر_شهر_الحرام
#ترکی
.
.
✍️ #زبدةالاشعار ✍️
.
🆔: @nohe_torki

متن پیشنهادی:  فاطمه ئولندن صورا جهان اولدی بیت الاحزانی زینبون #زینبیه_رمضانی_خاکی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی