شام غریبان حضرت زهرا سلام الله علیها
.
✍️ #زبدةالاشعار ✍️
.
🆔: @nohe_torki
.
سید بشیر حسینی میانجی
.
یارب بو گئجه گول سارالارکن چمن آغلار
یاس یاسه باتوب یاسمنیلن سمن آغلار
.
صرصریئلى یاز فصلى ائدیب بیر گولى پرپر
پوزقوندو چمن بلبل اُوخور نسترن آغلار
.
دورت بلبلى گول صاحبى آرام ائده بیلمیر
بلبلرین احوالینه دشت و دمن آغلار
.
آیا نه روادى در و دیوار آراسیندا
سالسینلا فشاره گولو پرپر گؤرن آغلار
.
تا سیخدلا، شبنم گولون اوستن یئره دوشدى
قانه بلشیب سود یئرینه قان ایچن آغلار
.
فریاد او زماندان کی گولون صاحبى گؤردو
گول پرپر اولوب، فاطمیه بوالحسن آغلار
.
بلبلره گلشن پوزولوب غربت اولوبدو
بو رسمیدى غربتده غریبه وطن آغلار
.
اول بیت کی جبرئیل امین نازل اولاردى
داى کسدى ایاقین اودو بیت الحزن آغلار
.
هر بلبلى بیر گوشه ده نى مثلى سیزیلدار
امّا اوجادان بلبل شیرین سخن آغلار
.
بئش سینّیده زینب باشینا قاره سالیبدى
اوخشاتما دئییب اونلا حسین و حسن آغلار
.
دؤرت خیردا بالا آغلادیلار آغلادى یئر گؤى
آخر آناسیزلاره آناسى اؤلن آغلار
.
گول صاحبى گلشنده گوله غسل ویریبدیر
بلبلر ایلن بو گوله غسلین وئرن آغلار
.
سسلندى گلین گول گئدیرى باغ و چمندن
بیر یولدا گؤرون اؤزگولوزو، غم چکن آغلار
.
یئر گؤى نئجه صبر ائیله‌دى اونلار گؤروشنده
سس گلدى کنار ائیله بولار هر زمن آغلار
.
زهرانى ائلی کى آپاریبلار گیجه یارى
بیت الحزنى غم بورویوب انجمن آغلار
.
یوخ چاره سى آخرده گرک قبره قویولسون
صبرى داغیلار یارى الیندن گئدن آغلار
.
قیرخ قبر قازیب تا قالا گیزلینده مزارى
بو نسگیله بیز سهلدى کی اهرمن آغلار
.
بیلمم یارالى جسمى نئجه قبره قویولدى
پهلوسى سینان جسمه بوکولموش کفن آغلار
.
تا ایستدى قبره قویا بلبل گولى گؤردو
ظاهر اولوب اوندا ایکى ال گول اکن آغلار
.
غم چکدى بشیرى پوزولان گلشن و باغه
زهرایه یازار نوحه، قرا پیرهن آغلار
.
.
#فاطمیه_شهادت
#یارب_بو_گئجه_گول_سارالارکن_چمن_آغلار
#سیدبشیرحسینی
#ترکی
.
✍️ #زبدةالاشعار ✍️
.
🆔: @nohe_torki
نظر دهید