زبدةالاشعار

یارب نه ماتمدور اولوب ارض و سما ماتمسرا #حیدریه_حقیر_خویی

شهادت حضرت علی(ع)
#گریز به #قتلگاه
.
.
#سبک_ای_شاه_مظلومان_حسین (5 سبک )
.
.
مرحوم میرزا عبدالوهاب حقیرخوئی
.
.
یارب نه ماتمدور اولوب
ارض و سما ماتمسرا
ماتم دوتوبلار حیدره
یئر گوی جمیع ماسوا
.
واحسرتا واحسرتا
ئولدی علی المرتضی۲
.
.
هانسی مصیبت یوز وئروب عالمده اهل عالمه
کیم غرق اولوبدور انفس و آفاق دریای غمه
فرصت وئروب امداد ائدوب بو چرخ ابن ملجمه
شمشیر زهر آلود اولوب حیدر باشیندان آشنا
.
.
یتدی نوید وعده ی وصل عشاقه جانانیدن
جذبات روحانی ائدوب قطع علایق جانیدن
معراج جسمانیّه نین مصداقی بو عنوانیدن
اصل صلاة معنوی قیلدی نمازیله ادا
.
.
حق دیده ی حق بینده ائتدی تجلّی آشکار
آئینه ی شمشیرده گوردی عیاندور عکس یار
ائتدی توجه قلبیدن حقّه طرف بی اختیار
ازبس ضمیر صافینه پرتو سالوب نور خدا
.
.
محراب طاعتده قیام ائتدی ولیّ دادگر
نور جلال کبریا اولدی ولیدن جلوه گر
صف صف دالیندا انبیا فوج ملائک سربسر
دوردی نمازه ایلیوب کلاً امامه اقتدا
.
.
قیلدی نمازه اوّلِ وقتینده اول سرور شروع
گاهی قیامینده خضوع گاهی قرائتده خشوع
حال قیامیندن ائدوب تعظیم تا حدّ رکوع
قویدی جبینین سجدیه تا لنگر ارض و سما
.
.
باش قوزیاندا سجده دن باشه ووروب روح الامین
آچدی تماماً باشلارین هم انبیا هم مرسلین
الده قلج ناگه کمین ائتدی لعین ابن اللعین
فرق منیر حیدره تا اندیروب تیغ جفا
.
.
نخل شهادتدن ثمر وئردی نهال آرزو
زخم سریندن جوش ائدن قانیله اولدی سرخ رو
مابین محبوب و حبیب گچدی نهانی گفتگو
فزت بربّ الکعبه دن گلدی حصوله مدّعا
.
.
حکم اولدی ربّ العرشدن قاره چکیلسون گوگلره
دوشدی تزلزل رعشه دن ارکان عرش داوره
جبریل بام عرشیدن ووردی قنادین بیربیره
نادی آلا قد هُدَّمَتْ واللهِ اَرکانُ الهدیٰ
.
.
سمع شریف زینبه بیر کوفه ده گلدی بو سس
بیرده ائشیتدی بو سسی کرب وبلاده اوندا بس
بولمم نجه تاب ایلدی نه بیر معین نه دادرس
نه یار و نه یاور قالوب نه خویش و قوم و اقربا
.
.
اؤز خیمه سینده منتظر گوزلوردی یول قارداش گله
ناگه نه گوردی لشگر کفّار ائدللر هلهله
سالدی خروش و غلغله اولدم سمایه زلزله
ازبس اوجالدی دمبدم یردن صدا گویدن صدا
.
.
چیخدی کناره خیمه دن گوردی اولوب محشر عیان
آثار رعد و برق اولور ظاهر یاغار هرلحظه قان
تیترور زمین کربلا چون کشتی بی بادبان
جبریل گوگدن سسلنور قُتِلَ الحُسین بکربلا
.
.
یوز قویدی میدان سمتینه گوردی دوشوبدی قارداشی
میداندا بی سر نیزه ده قرآن اوخور قانلی باشی
گوز تیکدی قارداش باشینه باخدوقجا آخدی گوزیاشی
شوریله گلدی نالیه فریاد قیلدی وااخا
.
.
فیضین آلور بو بابدن هرکسده اولسا حسن ظنّ
یا آغلیان یا آغلادان یا نوحه خوان یا سینه زن
جرم«حقیری»عفو قیل یا رب بحقّ پنج تن
اؤز لطف و فضلوندن خدا شور حسینی قیل عطا
.
.
#حیدریه_شهادت
#یارب_نه_ماتمدور_اولوب_ارض_و_سما_ماتمسرا
#حقیر_خویی #حیدریه
#ترکی
#زبدةالاشعار

متن پیشنهادی:  گوگل غمین یوزه اشک روانه دن خبر آل #فاطمیه_سعدی_زمان

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی