غارت خیام
.
✍️ #زبدةالاشعار ✍️
.
🆔: @nohe_torki
.
مرحوم نادری میانجی
.
یامان گوندور یتیش داده نجف شاهی قیامتدور
حسین ئولدی گولی صولدی بابا جان وقت غارتدور
.
.
قالوبدور زینب اللرده آچوب ال غارته لشگر
نه قاسم وار نه عباسیم ئولوب ناکام علی اکبر
ئوزون گل یا کمک گوندر اماندور چاره قیل حیدر
داغیلدی چوللره قیزلار قیامتدن علامتدور
.
.
حسینیم تشنه جان ویردی سنه آگاهیدور مطلب
علم یاتدی قوشون سیندی ئولوب چون صاحب منصب
هامو عورت اوشاق قورخا قالوب بو در به در زینب
قرا اوستن قرا سالماق منیم چون سابق عادتدور
.
.
الیم عباسیمه چاتماز گلوب بو شمری قاندورسون
گلین قیزلاریوی بابا نئجه دشمن سویوندورسون
دیدیم من سویموشام ظالم بو غارت سیز قویون دورسون
اثر ایتمز بو نامرده ز بس اهل شرارتدور
.
.
نئجه بونلار مسلماندور مرامی جور و استبداد
اگر سن گلموسن بابا ایدوم من کیمدن استمداد؟
منه امداد ایدن یوخدور نقدری ایلرم فریاد
حیا یوخدور بو لشگرده عجب وحشی جماعتدور
.
.
توکولدی خیمیه لشگر قاباقدا شمر بی پروا
ئوزوم بی یاورم غربت ، دولوب دشمنله بو صحرا
نجفدن اولمادی امداد ، ئوزون سن داده گل زهرا
اولور تالان سرا پرده آنا وقت حمایتدور
.
.
الیم چاتماز آنام زهرا دیوم پیغمبریم گلسون
بنی هاشم باتوب قانه ، یوخومدور لشگریم گلسون
سالان بو عمه سین گوزدن نئجه اول اکبریم گلسون؟
اولوب لیلا دل آرزده ، اوغولسوز بی کس عورتدور
.
.
یامان درده عجب قالدوم غریب یرده من کلباش
آنامدا گلمز امداده توکوم گوزدن بو گون قان یاش
منه داده گلن یوخدور ئوزون گل ای حسین قارداش
یتیم قیزلاریوی گوزله حسین وقت اسارتدور
.
.
حسین بلمم ندن قارداش دوشوبسن آیری بو ئلدن ؟
حریم حرمت زهرا شقاوتله گیدور الدن
اوقدری شمره یالواردوم یورولدوم دوشموشم دلدن
جلالیم حرمتیم شأنیم گیدن محنتلی ساعتدور
.
.
سنون تک هانسی بیر شاهین بله خرگاهی اودلاندی
حسین سن تک کیمون اوغلی قلیج ضربیله دوغراندی
سنون تک صود امر اوغلی الینین اوسته اوخلاندی
ندن بو شام و شوم اهلی ایشی دائم جنایتدور
.
.
یازوبلار « نادری» غرت گونونده حیدر آغلاردی
ویراردی باشینه زهرا گلوب پیغمبر آغلاردی
همی غارت اولان کسلر همی غارتگر آغلاردی
حقیقت عصر عاشورا قیامندن اشارتدور
.
.
.
#غارت_خیام #نادری
#یامان_گوندور_یتیش_داده_نجف_شاهی_قیامتدور
#ترکی
.
✍️ #زبدةالاشعار ✍️
.
🆔: @nohe_torki
نظر دهید