قصیده در مدح حضرت مولانا و مولی الکونین ابوالحسنین
.
✍️ #زبدةالاشعار ✍️
.
🆔: @nohe_torki
.
مرحوم دلریش
.
یا علی هر کیم سنی ایستر او دنیا ایستمز
ایستیین مولا سنی دنیا و عقبا ایستمز
.
دولت و جاه و جلال و ملک و مالیندن گئچر
شوکت اسکندر و جمشید و دارا ایستمز
.
پشت پا یکسر وورار ذراته مشتاقون سنون
بس قیلار مین خرقیه مین رخت دیبا ایستمز
.
گورسه مجنون گر تجلای جمالون یاعلی
وصل لیلادن گئچر من بعد لیلا ایستمز
.
آرزوی جنت ائتمز آستانوندن اوپن
زایر قبرون اولان، فردوس اعلا ایستمز
.
آشکارادور جلالون گون کیمی آفاقیده
ایلمه انکار منکر بو سؤزه لا ایستمز
.
گر هویدا ایله سن بیر سمت عبره نوریوی
رب ارنی کلمه سین سیناده موسا ایستمز
.
نور پاكون باعث ایجاد عالمدور سنون
بیجهت بیجا بو سوز بیر بحث و غوغا ایستمز
.
چون بو مولادور نماز اصل بوندا قائم اول
بو نمازی شک و سهو و جهر و اخفا ایستمز
.
بو ولى كبریادور هم وصى مصطفى
ای زنا اولادی منکر بوندا حاشا ایستمز
.
گر عذارون گورسه وامق ای ولی ذوالجلال
ترک ائدر عذراسینی سؤز یوخ که عذرا ایستمز
.
جملۀ قرآن اولوب نازل بو شاهین شأنینه
بو سؤزه شاهددی حق امضا و املا ایستمز
.
قلۀ اوصافیوه یتمز یقین سیمرغ قاف
واصف ذاتون خدادور بحث بیجا ایستمز
.
ایستمز منکر سنی ای شمس برج من عرف
ظاهر و اظهردی بو، مولانی اعدا ایستمز
.
عاشق دیدار اولان کس عاردن عاری گرک
آری آری عاشق ایستر دوست الا ایستمز
.
یا زنادندور و یا مأمون بسدور بیشک و ریب
شوق و ذوقیله سنی هر کیمسه شاها ایستمز
.
نیش وورما منکرا بیر بیله محزون گوگلیمه
بیر بئله عقرب كیمی آزار و ایذا ایستمز
.
مدح مولادن دیینده خم یمه شهمار تک
چون بو سؤز مشهوردور مأبون مولا ایستمز
.
مایل رویون گئچر جان و سریندن شوقیله
طالب کویون سنون فردوس اعلا ایستمز
.
دوت علینون دامنیندن تاپگیلن راه نجات
چنگ وور دامانینه بوندان تبرا ایستمز
.
اولمیشام بیر جامیله معناده من مست و خراب
مست جام عشق اولان صهبا و مینا ایستمز
.
معنی تورات و انجیل سن سن ای مولا یقین
آشکارادور بو سؤز البته معنا ایستمز
.
گر دییر ظاهرده منکر ایسترم مولا سنی
ذاتینین نقصانی وار قلبینده اصلا ایستمز
.
بیر مِسیدیم کم بها اکسیر مهروندن سنون
کیمیا درک ایلدیم کیم بیله سودا ایستمز
.
دوشسه هر کیم مشکله ای سرور مشکل گشا
بولمرم آیا نئجه سندن او یارا ایستمز
.
چون آدون مشکل گشادور هر ایکی دنیا سنون
سسلسه هر کیم یترسن داده اخفا ایستمز
.
یادیمه دوشدی بو سؤزدن داستان کربلا
دوندی اود دفتر آلیشدی خامه امضا ایستمز
.
هاردا قالمیشدون حسینون سسلننده یاعلى
یت بابا امدادیمه بیر بیله سکنا ایستمز
.
گلدی میدانه حسین آدی گینه ای شیعه لر
دیده دن قان یاش توکون بو غمده گویا ایستمز
.
بیلمرم شرح ایلیوم هانسی غمون من یاحسین
غملرون تحریره گلمز بالله انشا ایستمز
.
هانسی عاشق سن کیمی باشین ائدر زیب سنان
چوخدی عاشق لیک سن تک درد عظما ایستمز
.
داد او وقتدن سؤیلون مولا او قوم کافره
بیر غریب ئولدورمگه بیر بیله اعدا ایستمز
.
قتلیمه ناحق یره ای قوم فتوا وئرمیون
جرمیمی ثابت ائدون ناحق فتوا ایستمز
.
واردی یادوزده ئولن وقته رسول لم یزل
سیزلره تاپشوردی اولادین بو القا ایستمز
.
یول وئرون ایمدی عیالیمله ائدیم ترک وطن
من مدینه، زینبیمده قبر زهرا ایستمز
.
کربلا مینا خلیل الله شاه کربلا
بیله مینانی گورن بیر اوزگه مینا ایستمز
.
وار امیدی «دلریشون» روز جزاده کوثره
جان وئرینجه یاعلی مینا و صهبا ایستمز
#دلریش
.
.
#حیدریه_مدح
#یا_علی_هر_کیم_سنی_ایستر_او_دنیا_ایستمز
#ترکی
.
✍️ #زبدةالاشعار ✍️
.
🆔: @nohe_torki
نظر دهید