مناجات حضرت امام حسین (ع) در قتلگاه
.
✍️ #زبدةالاشعار ✍️
.
🆔: @nohe_torki
.
ثابت اردبیلی
.
یخلدی قتلگهه تشنه سیّدالشّهداء
دیردی اوز اوزونه ای خدای ارض و سما
.
بالالاریم گوزی یولّاردا انتظاریمدور
سینمده اوخ دوزولوب وئرمیشم قضایه رضا
.
بو من بو کرب و بلا گرم آفتاب اثری
اودور که قالوا بلاده دئدوم بلایه بلا
.
یازیلدی سینه لر اوستونده سرنوشت حسین
سالوبدی حضرت زینب بلالی باشه قرا
.
جهنمون اودونی توک حسین جنازه سینه
قیامتین گونی بو شیعیانی ایله رها
.
سنی قسم وئرورم شیر خواره اصغریمه
منیم دعامی قبول ایله خالق یکتا
.
بو من بو سینمون اوسته بو شمر بد اختر
کسر بو باشیمی دالدان وورار جدایه خدا
.
حسین رضایتی وار هر بلایه مردانه
گلوبدی باشیمون اوسته دوروب آنام زهرا
.
بو ایسّی قوملارون اوسته اولوبدو قان کفنیم
یازیلدی سینمه اسرار یوم عاشورا
.
امام حسن بالاسی سینم اوسته جان وئردی
آناسی اللری قوینوندا ائتدی آه و نوا
.
الهی یتمیش ایکی امتحان جان وئردوم
یازیلدى مدفنی بیر گونده خاک کرب و بلا
.
یانار بو خیمه لریم پرده سی اولار غارت
الهی اهل عالیم اسیر قوم دغا
.
چوخور یری گورورم جانیمه اوزوم خلوت
سنیله راز و نیاز ایلیوم سوسوز تنها
.
نه گوردی آهو گلور گوشۀ بیاباندان
یتیشدی ایتدی سلام دولدی گوزلری امّا
.
دیدی آقا عطشون چوخ دوداقلارون قوریوب
بو دوشلریمده سرین سود واریمدی یا مولا
.
آماندی بوینوما قوی منّتی سرین سودی ایچ
هوانون ایستی سی یارون زیاده جای منا
.
یارالی شه باشنا آهو دمبدم دولانوب
دیدی آقا سنه کیم ایلدی بو قدری جفا
.
یارالاروندان آخار لخته لخته قان خاکه
منی تصدّق ایله باشیوه شه دو سرا
.
بویوردی شاه جهان تئز گلیدون ای آهو
سود اولمادی سوسوز اوخلاندی شیرخواره بالا
.
آناسی بوش بشیگین ترپدر دیر لای لای
چالان زمان ال ایاق تنگ اولوب منه دنیا
.
دیدی آقا وئر اجازه اولوم سنه قربان
قیامت اولدى گوزومده بلالی بو صحرا
.
بویوردی دوشمیه سن گیت کمند صیّاده
بلالی بو چولی سن آهو ایلمه مأوا
.
اجازه آلدی امام حسیندن اول حیوان
دولوب گوزی باشنا خاکی سپدی ایتدی نوا
.
دایانمادی او بیاباندا یوز قویوب گیتدی
گلوبدی اللری باشینده زینب علیا
.
دیدی حسین شه کوثر نشانی آچ گوزوی
توکولدى خیمۀ والایه لشگر اعدا
.
اجازه وئر باش آچوم گوگلری توکوم خاکه
خیام طاهره ده قورخوشار بو آل عبا
.
بو سرنوشتیمی قارداش یارالی قلبوه یاز
قیامت اولدى باجون زینبه بو گون برپا
.
دگوبدی اوخ اوخون اوستن حسین آخار قانون
سنی بو حالده گورسه محمدطاها
.
اوپر یارالاروی ال بهشتدن گوتورر
بو قتلگاهده زلفون یولار آنام زهرا
.
ال آتدی اوخلاری بیر بیر چکوب خانم آتدی
باخوب نجف چولونه سسلدی اماندور آتا
.
اوزووی کرب و بلایه یتور ائویم یخلوب
حسینیمه نه قدر یاره لر وروب اعدا
.
خیام عترت طاها قالوبدی بی صاحب
بو قتلگهده بابا گل حسینه ساخلا عزا
.
بو یرده ساخلا قلم غصّه مرگ دور ثابت
بو سوزلریم اوخونار آشکاره یوم جزا
.
.
.
#حسینیه_ثابت_اردبیلی
#حسینیه_شهادت
#یخلدی_قتلگهه_تشنه_سیدالشهداء
#ترکی
.
✍️ #زبدةالاشعار ✍️
.
🆔: @nohe_torki
نظر دهید