مدح و شهادت حضرت علی (ع)
#گریز به زبانحال حضرت زینب (س) در #کوچ_کربلا
حاج داود بیدق داری
یوزیوین نوری منه نورِ دل و جاندی علی
مهریوین شعشعه سی پرتو ایماندی علی
یول تاپانماز گونوزه جهل و ضلالت گئجه سی
تا الون دین یولونا مشعله گرداندی علی
دئیه بُلَّم بو سوزی حیطۀ معناده یقین
عالم خلقت ئوزی شأنیوه حیراندی علی
منده یوخدور او توان تا سنی تعریف ائلیم
سنی توصیف ائلین سورۀ قرآندی علی
قاپیوون سائلی شاهیله دئیشمز یئرینی
چون سنه نوکر اولان عالمه سلطاندی علی
گردِ نعلینون اگر بیر یول اوتورسا باشیما
حشر اولونجاق من ایچون تاج سلیماندی علی
هر زمان آی اوجالوب باخدی سنه حیرت ائدیب
گوردی چون مقصدیوی منزل ویراندی علی
دیریلیک سندن آلوبدور نفسین تاپدی بقا
بس ندن هم نفسون چاه بیاباندی علی
دینی دستار ائلین لر سنی مظلوم ائلیوب
متنِ تاریخ اؤزی بو مطلبه برهاندی علی
الده قرآنی دوتوب یخدیلار اسلامین ائوین
ابن ملجم اؤزی بو عرضیمه عنواندی علی
ووردی تا ضربه نی ، احرارِ زمان آغلادیلار
گویلرین اهلی باخوب یاره وه دل داغلادیلار
سنون اوغلون واریدی آغلیا احوالیوه قان
سنی یئردن گوتوره عزّیله ای جانِ جهان
کربلاده ولی ایش دوندی یئتیشدی او یئره
اوغلیوون نعشی قالوب قوملارین اوستونده عیان
یوزی اوستونده اونی مقتله سالمیشدی عدو
لامکانون یوزینه بستر اولونموشدی مکان
گوردی زینب ائله پاشیده اولوب گل بدنی
دئیه سن یاسمنی پرپر ائدیب بادِ خزان
باخدی باخدی دیلی دوتمادی اَوَل اوخشاماقا
صونرا عرض ائتدی که ای زینبینی درده سالان
سانجیلان اوخلاری من بیر به بیر الان چکرم
چکمگه اوچ پر اوخی یوخدی ولی منده توان
آرخان اوستونده اگر ممکن اولا دؤندره رم
قورخورام ال وورام اعضا داغیلا پخش اولا قان
آچا بیلسون گوزیوی اوندا گوررسن یارالی
که یاریم گونده اولوب زینبیوون قدّی کمان
گلمیشم مقتله تا منده کنارونده ئولم
آیریلیق سختیدی چون زینبه ای روحِ روان
داغیلان نعشی سویوبلار بو جماعت یارالی
اولوب عریان بدنون داشلارین آلتیندا نهان
گون شاخور یاره لره منده باخوب اودلانورام
قان جوشور هر یاراددان منده اؤرکدن یانورام
گئدورم شامه طرف زار و مکدّر یارالی
ائتمیشم دیلده گوزل آدیوی ازبر یارالی
باغلیانمازدی منیم اللریمی کوفه لیلر
عشقیوون قدرتیدی باغلانوب اللر یارالی
قولی باغلانسادا گر زینب علینون قزیدی
سینمیوب سینمیاجاق دختر حیدر یارالی
گئدورم پرچمیوی خانۀ دشمنده وورام
قولی باغلی ائلیم شامی مُسَخَّر یارالی
کیم گوروب عالم خلقتده بئله منظره نی
یارالی باش ائلیه نیزه نی منبر یارالی
ناقه اوستونده حسین منده قیامت ائدرم
باجی قارداش یاراداق صحنۀ محشر یارالی
صبحیدن ظهره کیمین هر نئییمی آلدی فلک
گورمیَن دیده لره سختیدی باور یارالی
گینه ده شکر ائدورم لُطفِ حق دادگره
مصلحت گوردوگونی قیلدی مُقَدَّر یارالی
بدنیم یول یول اولوبدور او قدر قمچی دگوب
بنزیور سوسنه بو یاره لی پیکر یارالی
بیلمورم شامه کیمین خسته ربابه نه دئیوم
قالدی چون کرب و بلاده علی اصغر یارالی
#حیدریه_مدح #حیدریه
#حیدریه_شهادت
#یوزیوین_نوری_منه_نور_دل_و_جاندی_علی
#بیدقداری
#ترکی
✍️ #زبدةالاشعار ✍️
?: @nohe_torki
نظر دهید