عالمه آیت صنع حق یکتا گَلدی #فاطمیه_عابد_تبریزی

میلادیه حضرت زهرا سلام الله علیها
.
.
مرحوم عابد تبریزی
.
عالمه آیت صنع حق یکتا گَلدی
عصمت آئینه سی صدّیقه ی کبری گَلدی
.
نفس هستی اولا باجادی فدا مقدمینه
صفحه ی خلقته مدلول فداها گَلدی
.
مهبط وحیه ایدوب نور الهیّه هبوط
تا او معموره ی قدّوسیه زهرا گَلدی
.
جلوه ی کنز خفی بیت هداده گورونوب
صدف وحدته تا لولو لالا گَلدی
.
طُهر مطلق تاپوب آئینه ی خلقتده ظهور
اِنَّما فصلینه بیر طاهره معنا گَلدی
.
قلّه ی قاف عفاف اوج سپهره اوجالوب
تا ستیغنده مکان ایتماقا عنقا گَلدی
.
لطف فردوس تاپوبدور چمن قدس و عفاف
که بهشتی رُخیله بیرچمن آرا گَلدی
.
خانه ی آینه ی عصمت اولوب عرصه ی کون
تا رخ عصمته انوار هویدا گَلدی
.
دم رحمتدن آلوب فیض، گُل باغ مراد
گلشن کونه بو گُل اولدی شکوفا گَلدی
.
گَلمه سِیدی تن بی روحیدی آزرم و حیا
نفسی نفس حیانی ایده احیا گَلدی
.
نه فقط کونی ایدوب جلوه سی آئینه ی طور
دیده ی احمد اولوب روشن او مه تا گَلدی
.
نور آلوب باهره انجم مه رخساریندن
فلک عصمته تا زهره ی زهرا گَلدی
.
وجه حق آینه سیندن کدر غم گیتدی
ذات حق نورینه مرآت تجلّی گَلدی
.
آرتیروب گَلماقی اسلافینه تکریم و وقار
مفخر آسیه و مریم عذرا گَلدی
.
پرده ی جهلی ایدوب پاره فروغ حقیله
محو اولا تا اثر ظلمت عمیا گَلدی
.
عالمه قامتی مین خُلد صفاسی گَتیروب
باغ خُلده دیمورم نخله ی طوبی گَلدی
.
تا تموّج ایلدی بحر عطای ازلی
ساحل حاصله بو گوهر والا گَلدی
.
آیریلوب مشعل وحدتدن ازلده نچه نور
نور زهرا ولی بو عالمه یکتا گَلدی
.
.
#فاطمیه_میلادیه
#عالمه_آیت_صنع_حق_یکتا_گلدی
#عابد_تبریزی
#ترکی
.