اربعین
.
✍️ زبدة الاشعار ✍️
.
🆔: @nohe_torki
.
#سبک_سو_یوخومدی_قزلاروندان … #سبک_سنه_سو_دین_دوداقلار … #سبک_سنی_سسلیور_هرایه … #سبک_یارالار_سینونده_قارداش … #سبک_یانور_اصغریم_سوسوزدان (جوشی زنجیر) و …
.
مرحوم حسینی سعدی زمان
.
آنام اوغلی بو سفردن
سنه چوخ شکایتیم وار
دیرم اجازه ویرسن
دیمه لی حکایتیم وار
.
باشا عهدیمی یتوردوم
هامی قیزلارون گتوردوم
نیه گلمدی رقیه
دیمه ماقدا خجلتیم وار
.
.
دیماقا او ماجرانی
خجلم من اوز اوزیمدن
بلوسن که چوخ سوردیم
او قیزی ایکی گوزیمدن
نجه ئولدی شرح ویرسم
سنه غم یتر سوزیمدن
اودی عارضیمده اشک
تریله اشارتیم وار
.
.
گهی ناقه اوسته گاهی
باشون آردیجا پیاده
اوزینی یتوردی شامه
او اسیر دل فتاده
دیمرم آجیندان ئولدی
قوری یرده شاهزاده
هله بو یارالی دلده
غم بی نهایتیم وار
.
.
او گئجه که جان ویروردی
منی یاندوروب یاخوردی
سوزینی دیموردی اما
یوزه گوز یاشی آخوردی
گوزینی دولاندوروردی
بالا قیزلارا باخوردی
بونی آندیروردی بیر آز
سیزه رنج و زحمتیم وار
.
.
بالاوون گوزی آخوردی
اوزی ئولماقین بولوردی
یوزه گوز یاشین الیردی
نه دیوردی نه گلوردی
ایله بیر حقارتیله
او یتیمه قیز ئولوردی
که بیان حاله قارداش
نه توان نه طاقتیم وار
.
.
باشون اول زمان که گلدی
اونا ویردی دل وصالون
باشینا سوووردی توپراق
او گئجه غریب عیالون
بلورم که مندن آرتوخ
سنون اولدی ابتهالون
اوره گیمده کی شرردن
سوزیمه شهادتیم وار
.
.
او بالا ئولونجه ایتدی
آدیوی دلینده ازبر
قوری یرده توپراق اوسته
ئولورم دیدی مکرر
یارالی باشون ایشیتدی
او بالا دیدی نه دیللر
او یارالی دللریندن
سنه بیر کنایتیم وار
.
.
سوسوزام، آجام دیردی
قورویوبدی دل دوداقیم
آلونوبدی گوشوارم
بابا بوش قالوب قولاقیم
گتوروبله چوخ پیاده
اولوب آبله ایاقیم
ایاقیمدا قانه باخسان
بله سن نه حالتیم وار
.
.
گهی صدقدن دانیشدی
گهی مهریله وفادن
گهی شمریدن دانیشدی
گهی سیلی جفادن
ایله دل دیدی، دل آلدی
هامی آل مصطفادن
بلوسن او درد دلدن
هله دل جراحتیم وار
.
.
دیدی آغلادی یورولدی
یخولوب صداسی باتدی
غم هجری باشه ویردی
شرف وصاله چاتدی
سویولان اسیره قیزلار
گویه ناله سین اوجاتدی
گوره سن منیم جهاندا
نچه یول قیامتیم وار
.
.
ایله بیر قیامت اولدی
که عقولی ایتدی مبهوت
پوزولوبدی اهل ناسوت
ایدوب آه و ناله لاهوت
نه کفن تاپولدی قارداش
نه او طفل زاره تابوت
نه تحمل استتاره
نه بیانه قدرتیم وار
.
.
بو ملالی دلده قارداش
آپارام گرک مزاره
آناما دیم بو دردی
گله من تک آه و زاره
ئوله شاهزاده، تابوت
اولا نچه خشت پاره
گر ئولوب حضوره یتسم
آناما شکایتیم وار
.
.
نجه تاب ایدر ایشیتسه
بو سوزی علی اکبر
باجیسی کفن سیز ئولدی
کفن اولدی کهنه معجر
من اوزوم مزار قازدیم
او یتیمیه برادر
گور ایدنده غم تهاجم
نجه استقامتیم وار
.
.
یوزه گوزدن آخدی قلبیم
منیم ای قتیل العبره
اگیلوب یوزیندن اوپدوم
بالاوی قویاندا قبره
هامی قالدی مات و حیران
من بینواده صبره
هامی بولدی نه شهامت
نه بلند همتیم وار
.
.
بلورم ئولونجه یتمز
غم و محنتیم تمامه
یتوشنده باشه عمریم
یتیشر غمیم ختامه
باجوی رقیه فکری
آپارار دوباره شامه
او بالادان اوتری بیرده
او دیاره رجعتیم وار
.
.
بو دیاردن گیدنده
ایله سرو قدیدیم من
که ووراردی طعنه سروه
قدیم ای عزیز ذوالمن
بیلیمی بوکوبدور اما
بو سفرده ظلم دشمن
دور ایاقه قبردن گور
نه خمیده قامتیم وار
.
.
نه او آبرنگ زیبا
نه او قامت رسا وار
گیچن عهد تک باشیمدا
نه او زلف مشکسا وار
آغاران باشیمدا باخسان
بله سن نه ماجرا وار
هامی شرح ماجرانی
دیماقا نا حاجتیم وار
.
.
بدنون گیدنده شامه
قوری یرده گوردوم عریان
قویا بلمدیم مزاره
من دل فکار و نالان
سنه کیم بو قبری قازدی
بو گوزل مزاره قربان
سنی بی کفن گورندن
بو حیاته نفرتیم وار
.
.
بلوسن اسیریدیم من
یوخودی معین و یاور
کفن ایلماق دگولدی
من بی کسه میسر
نه امان ویروردی لشکر
نه قویوردی شمر کافر
که من ایلیییدیم اظهار
او که دلده نیتیم وار
.
.
بیزی کوفیه آپاردی
قولی باغلی اهل کوفه
گیچوب الفدن دایاندی
غم اهل بیت الوفه
مه چرخ دینی گوردوم
سالوب اهل کین خسوفه
دیدیم ای هلال زینب
سنیله شکایتیم وار
.
.
نه روا سنون باشوندا
اولا اون ایکی جراحت
قالا محمل ایچره اما
باشی زینبون سلامت
باشیمی یولوندا یاردیم
بله ایلین شمادت
نه وفالی باجی ام من
سنه نه محبتیم وار
.
.
یتوروب زیادین اوغلی
ایله ظلمینی تمامه
که قیاس اولونماز اصلا
او جفا جفای شامه
قولی باغلی حاضر ایتدی
بیزی بزم عیش عامه
منیم ایله مجلسیله
گور اوزون نه نسبتیم وار
.
.
منی دست بسته گوردی
دل آچوب ایدوب شمادت
بو خیاله دوشدی ایتسون
من بی کسه جسارت
ولی بلمدی که منده
وار علی کیمی شجاعت
عملا مبرهن ایتدیم
نجه بیر شجاعتیم وار
.
.
منی قصد ایدوبدی
دوردی او لعین کین پرور
او دوراندا منده دوردوم
که دفاع ایدم برادر
بالا قیزلاروندا دوردی
باخوب آغلادی گورنلر
ایله بیر قیامت اولدی
که بیانه لکنتیم وار
.
.
ایله آتشین دلیله
اونی ایلدیم مخاطب
که عداوتیله اولدی
اورگی اونون لبالب
گوروب ایتدی خوار و رسوا
اونی بو اسیره زینب
دیدی دخت مرتضایه
نظر سیاستیم وار
.
.
اوجالاندی عرشه چخدی
او گون اوردا الامانیم
گوزیمه مجسم اولدی
ملکه اولان زمانیم
صاق اولیدی کاش ابوالفضل
او گون ای عزیز جانیم
کسیلوب گوریدی چارم
نجه استعانتیم وار
.
.
دیمورم او شهر ایچینده
یریم اولدی کنج زندان
او که گلدی اللریندن
بیزه ایتدی قوم عدوان
غم و ابتلای کوفه
قوتاروب تاپوبدی پایان
ره شامدن برادر
سنه چوخ روایتیم وار
.
.
اگر امر ایدیدی جدیم
او گروه اشقیایه
گله هر جفا الوزدن
ایدون آل مصطفایه
داخی اوندان آرتوق اولماز
اولوب آل هل اتی یه
دیه بلمورم گوگلده
نقدر مصیبتیم وار
.
.
گونون ایستیسی، اوزاق یول
بیزی چوخ فشاره سالدی
گونی قاره عترتوندن
او فشار طاقت آلدی
گوزی یاشلی قیزلاروندان
بیری دوشدی چولده قالدی
قیز عیالی نابلد چول
نجه دوزدی حیرتیم وار
.
.
منیم ای یارالی صبر
دل و طاقتیم تالاندی
سر نیزه ده سنونده
یارالی باشون دایاندی
دیدی شمر بی مروت
نیه قافله یوباندی
یتوشم دیار شامه
بلوسوز که سرعتیم وار
.
.
اولونوبدی امر زجره
گیدوب اول لعین کافر
او قیزی تاپوب گتوردی
منی ایتدی چوخ مکدر
نظر ایلینده گوردوم
که باشیندا یوخدی معجر
او اسفلی ماجرادن
گنه دلده رقتیم وار
.
.
آچوب اول خِماری باشدان
اوزی گل کیمی سولوبدی
ایاقینا باغلیوبدی
گوزی اشکیله دولوبدی
یوزینه باخاندا بلدوم
ایاقی قابار اولوبدی
دیمدی منه ادبدن
نه غم و صعوبتیم وار
.
.
آناسیدا چوخ چاقوردی
من بینواده قارداش
بیزه ایتمدی توجه
الی باشدا گوزده قانیاش
سنه یوز دوتوب جداده
او بالا یوگوردی بیر باش
دیدی ای بابا نظر قیل
نه ملال و محنتیم وار
.
.
قورویوب گون ایستیسیندن
بابا گل کیمی دوداقیم
ایله خستیم یاخوندور
یته ماه تک محاقیم
او قدر تیکان باتوبدور
هله قان ویرور ایاقیم
گوز آچوب نظاره قیلسان
بله سن نه عسرتیم وار
.
.
بو طریقیله حسینیم
بیزی تابعان سفیان
آپاروب یتوردی شامه
قولی باغلی دیده گریان
بیزه پیشوازه چخدی
هامی شاد کام و خندان
بلن اولمادی گوگلده
نه بیوک ملالتیم وار
.
.
بیزی آل هنده یاغی
او گون اهل شام بلدی
بیری ایلدی شمادت
بیر طعنه ووردی گلدی
دین اولمادی که جدیم
منیم اشرف رسلدی
ایدن اولمادی ترحم
او شهه قرابتیم وار
.
.
بو جفا گران گلور چوخ
بابامیز ابوترابه
آپاروبدی هندین اوغلی
بیزی مجلس شرابه
نه جسارت اولدی گوردون
بو اسیر دل کبابه
داش اولان دله موثر
الم اسارتیم وار
.
.
علویه هاشمیه
بالالار اسیر و خسته
گوزی یاشلی سینه داغلی
هامی بیر طنابه بسته
او یره اولاندا وارد
حرم اهلی دل شکسته
اموی غلام گوردی
نه حیا و عصمتیم وار
.
.
الیمی اوزوبله بلدی
هامی قوم و قارداشیمدان
نه حیا ایدوب خدادن
نه اوتاندی گوز یاشیمدان
الی قوزانوب هوایه
بیر آقاج ووروب باشیمدان
بیر امام عصر بلدی
نه محن نه خفتیم وار
.
.
نجه شرح ایدوم برادر
غم مجلس یزیدی
ایله بی حجاب گوردوم
او ستمگر پلیدی
که بوتون نظردن آتدیم
او گیچن غم مزیدی
غم تازه ایله گوردوم
آنام اوغلی الفتیم وار
.
.
او دنی گوروب اوخورسان
یارالی باشیله قرآن
بلوب عالم ایچره رسوا
اولاجاقدی آل سفیان
اله خیزران گوتوردی
دله گیتدی حرف هذیان
دیدی حق منم گورورسوز
نه جلال و شوکتیم وار
.
.
سُفرا ایچینده گوردوم
او دنی ایدور تظاهر
بیزه سلطنتله ایستور
ایده طعنه و تفاخر
ولی قویمادیم او بی دین
ایده دینیمه تجاسر
دیمیسن گورن اسیریم
دانیشام نه جراتیم وار
.
.
گوزیمون یاشیله قارداش
گل دینه آب ویردوم
شه لافتی آتام تک
سوزه پیچ و تاب ویردوم
نچه آیه ایتدیم عنوان
اونا بیر جواب ویردیم
که گورنلر ایتدی تصدیق
علوی شهامتیم وار
.
.
دیدیم ای زنادن اولموش
ادب و حیادن عاری
بو اسارته مشیت
قلمی اولوبدی جاری
ایده نطقیمیله رسوا
سنی قهر ذات باری
دیمه سلطنت مقامی
شرف و ریاستیم وار
.
.
مگر عدلدندی یابن_
الطلقا بو امر منفور
سنون عترتون کنیزون
اولا پرده لرده مستور
ولی عترت پیمبر
قولی باغلی خوار و مقهور
گنه ادعا ایدورسن
دیوسن دیانتیم وار
.
.
گهی مست اولوب بساط
شعف و طرب قورورسان
گهی گرم اولوب قماره
گل دینی سولدورورسان
گهی نور چشم زهرا
باشینا آقاج وورورسان
دیوسن حسین گورورسن
نجه زور و ضربتیم وار
.
.
ووروب اود او شرب بزمی
بو دل کبابه قارداش
اوجالوب شرار آهیم
دل نه قبابه قارداش
ویروب اهل کینه منزل
بیزه بیر خرابه قارداش
دیه بلمورم نه منزل
نجه درد غربتیم وار
.
.
باشیما غریب عیالون
یغوب ایتدیم اوردا شیون
دوزه بلمدی رقیه
قوری یرده دوشدی دلدن
بالامون مزاری ایتدی
او خرابه نی مزین
او مکاندا تا جهان وار
او گوزل امانتیم وار
.
.
سنه یازدیروب «حسینی»
بو کلامی بیر نوا خوان
شه دین رضا غلامی
یری کوی «چوست دوزان»
سنیله اونی حضوره
چاغیراندا شاه عطشان
گوزی یاشلی دی بو جمعه
نظر زیارتیم وار
.
.
گیدورم حضور شاهه
سیزه نائب الزیاره
یوزیمی قویاندا یاران
او ضریح مشک باره
یوزی قاره بیر گدا تک
دیرم او شهریاره
منه بیر توجه ایله
سنه عرض حاجتیم وار
.
.
.
#اربعین_سعدی_زمان
#آنام_اوغلی_بو_سفردن_سنه_چوخ_شکایتیم_وار
#آثارالحسینی1 ص 312
#ترکی
.
✍️ #زبدةالاشعار ✍️
.
🆔: @nohe_torki
نظر دهید