زبدةالاشعار

بویوردی ختم الانبیا سفینة النّجا حسین #حسینیه #یحیوی_اردبیلی

حالات شیخ بنی اسد
و شام غریبان

.
✍️ #زبدةالاشعار ✍️
.
🆔: @nohe_torki
.
مرحوم یحیوی اردبیلی
.
بویوردی ختم الانبیا سفینة النّجا حسین
چراغ رهنما حسین مدینة الرّجا حسین
الینده نور پرچمی قدم قویاندا محشره
شفیع اهل حقّدور حبیب کبریا حسین
.
.
بنی اسدده بیر نفر ایدوبدو بو روایتی
محرّم آیینون اونی تاپوب حسین شهادتی
صباحی گیتدی کوفیه قشون آپاردی غارتی
او چولده قالدی یادگار هواده قان علامتی
اسنده یئل که سسلنور دیور هواده یاحسین
.
.
دئیور که عصر تنگیدی افق ده گون باتان زمان
واریدی مزرعم منیم او یرده سبز و ارغوان
او کشت زاری گورمگه روانیدیم قدم زنان
ساتاشدی ناگهان منیم گوزیمه سهمگین مکان
قولاقیمه یتیشدی وای غریب نینوا حسین
.
.
یتر مشامه بوی خوش نسیم شامگاهدن
نه بوی دل پذیری که چخار گل و گیاهدن
غبار مشک پخش اولور زمین خیمه گاهدن
بهشت عطری قوزانور سمایه قتلگاهدن
او تربت مقدّسی ایدوبدو کیمیا حسین
.
.
او دشت خوفناکده دوشوب یارالی نعش لر
برهنه سینه لرده قان چو نقره اوسته نقش زر
بیلک دوقولدو جسمدور اولور نظرده جلوه گر
سه شعبه تیرلر دگوب آچوب جنازه لرده پر
فدای حقّلن ایدوب او عرصه نی منا حسین
.
.
هواده دسته دسته قوش گورر گلون بهارنی
انوب قنادیلن سیلر بدنلرون غُبارنی
بیر آیری دسته قوش آچار پران سایه دارنی
آلور یارالی نعشدن حرارتون شرارنی
قناد ووراندا چوللّره دوشر صدای واحسین
.
.
چکیلدی رنگ آفتاب او قورخیلو مکانیدن
چخوبدو بیر مهیب شیر میان نی ستانیدن
بدنلره باخوب کئچیر کنار کشته گانیدن
گلور خفیف همهمه او شیر بی زبانیدن
گزور یواش یواش دئیور دیلینده بی صدا حسین
.
.
یتیشدی تاپدی مقصد و مرادنون یاتان یئرین
کنار قتلگاهنه ادبله ووردی اللرین
اگیلدی اؤپدی اییلدی یارالی قاتلو حنجرین
بویاردی بال و کاکلین سیلردی خون احمرین
او قاندا آشکاریدی مرمّل الدّماء حسین
.
.
چکردی بانگ عربده سالوردی دشته نعره سین
سپردی باشه تپراقی یئره ووراردی پنجه سین
طواف ائدردی متّصل ذبیح عشق کعبه سین
گلوب وحوش جنگلات او شیرون آلدی دوره سین
هامی جهانیان سنون مقامیوه فدا حسین
.
.
ایشیق چکیلدی کاملاً دونوب هوا انوب شفق
سمادن ابر ظلمتی آیردی خالق الفلق
ستارگان تابناک بؤلوندیلر ورق ورق
که لکّه لکّه نوردور گلور یئره طبق طبق
او نور آسمانیه اوزی وئرور جلال حسین
.
.
او نورلر انور یئره بو نور عرشه قوزانور
او پارچا پارچا نورلر بو نورون اوسته تولانور
فضای تیره رنگده چراغ آسمان یانور
او نور که چخور گوگه هامی جهان ایشقلانور
جمال حقّی گوسترور طلیعه ی ضحی حسین
.
.
ایشیتدیم اوندا غیب دن اوجالدی نوحه و نوا
او نورلردن آیریلور صدای ضجّه و بکا
گوزه گورونمز آغلیان گلور ترنّم عزا
که دسته جمعی سسلنور حسین واحسین وا
غریب نینوا حسین قتیل اشقیا حسین
.
.
دیور باشیمى قوزادیم نه گوردیم اول زمانده
هلالی قوس دور قزح چکیلمش آسمانده
حریر هفت رنگ تک عیاندو کهکشانده
بو ایکی جمله ثبت اولوب او منجلی کمانده
سفینةُ النّجا حسین چراغ رهنما حسین
.
.
مکرّر اول جنابدن ظهوره گلدی معجزات
دایانموشیدی نیزیه قباق که گون او پاک ذات
قشوندان ایستیوردی سو آخاردی چوللره فرات
کئچیردی مرد رهگذر سیاحت اهلی خوش صفات
نظر سالاندا ساخلادی او شخصی برملا حسین
.
.
ز بسکه مرد راهیدی پیاده پا او رهگذر
غذاسی جُلبه دانده برای توشه ی سفر
حمایلنده قمقمه ایچینده آب سرد تر
نه گوردی رزمگاهدور دوشوب بدندو قولدو سر
ائدوب میان عرصه ده جدایه اتّکا حسین
.
.
او سیّد ملک خَدَم سوسوزدو هم یارالی دور
قیافه سی نشان وئرور صفای نفسی عالی دور
لباس جنگی مرکبی نمونه ی جلالی دور
دلیل معنویّتی شکفته گون جمالی دور
سو ایستیور گلور جواب سنه سو یوخدو یاحسین
.
.
چخارتدى جامی توکدی سو لبالب اولدی جامیان
سو جامى الده روبرو اولوب غریب امامیلن
تعارف ایتدی حضرته کمال احترامیلن
دیدی بو جامی نوش ایله دایانما تشنه کامیلن
تب حرارت عطش سودان تاپار دوا حسین
.
.
سو جامین آلدی لطفیلن محبّت ائتدی اول جناب
بوشالتدی جامی تپراقا او زاده ی ابی تراب
او شخص با سعادته بویوردی ای وفا مآب
اگر چه ظاهراً منه اولوب بو چولده قحط آب
ولیک باطناً منم مدیر کل ماء حسین
.
.
اشاره ایلدی گوگه او فخر عالم بشر
چکیلدی غیبدن حجاب آچیلدی پرده ی بصر
او مرد با لیاقته بویوردی ائیله سن نظر
سرای سرّی سیر ائله بو حالدان اولما بی خبر
مشاهدات اجازه سین ائدور سنه عطا حسین
.
.
باخاندا گوردی باغدور بنای دلگشاسی وار
درخت میوه داردن محیط باصفاسی وار
چمندو گلدو لاله دور هوای جانفزاسی وار
سفید و سرخ و سبزدن قصورینون نماسی وار
او قصرلرده نقش اولوب عزیز مصطفی حسین
.
.
گلوبدو موجه بحر تک زلالی نهرلر آخار
قدح لر الده سو دولی حسینه حوریان باخار
لباس سُندسی گیوب جلاسی برق تک شاخار
هاموسی سس سسه وئروب دیوب ائده لّر افتخار
یولوندا منتظردو گل بو جنّت العُلی حسین
.
.
گورنده مرد رهگذر او حضرتون جلالتین
یخلدی ذوالجناحنون اؤپوب رکاب خدمتین
دئدی فدا اولوم سنه بویور بو سرّون حکمتین
عطش واروندور ایچموسن نیه بهشت شربتین
بو صبره هم بو قدرته هزار مرحبا حسین
.
.
بویوردی تشنه ام مگر سوسوزلوقوم فراته دور
نه آب چاه زمزمه نه چشمه ى حیاته دور
نه بحر موج خیزه دور نه نهره نه قناته دور
فقط منیم سوسوزلوقوم رضای پاک ذاته دور
بقای حقّه تشنه دور سوسوز تاپا لقا حسین
.
.
مگر من عاجزم ایچم فرات سرخ فامیدن
سوسوزلقون حرارتین کسم بو تشنه کامدن
واریمدو قدرتیم ایچم سو گوردیگون مقامدن
شراب سلسبیل آلام او روضةُ السّلامدن
تصوّر ائتمه ظاهراً اولوبدو مبتلا حسین
.
.
گل آگه اول مقامیمه شریف ماسوا منم
طلوع آفتابده ظهور روشنا منم
کواکب اوسته سیر ائده ن فروغ نه سما منم
مظاهر صفات حق جمال کبریا منم
بو عالمه الست ده منم وئرن رضا حسین
.
.
جهان جود و بخششه حدیقةُ الصّفا منم
بهار پنج تن گلی شکوفه ی کسا منم
ابوالعباد و عبد حق مقرّب خدا منم
ازلده وئردیگیم سوزه بوگون ایدم وفا منم
آدیمدو عهدنامه ده شهید کربلا حسین
.
.
بهشت جاودان منیم بهشت جاودان منم
روندگان جنّته دلیل کاروان منم
حساب رستخیزده شفیع شیعیان منم
برات حکم رحمته علامت و نشان منم
منم گروه دینچون امام و پیشوا حسین
.
.
گهی تنور خولی ده گیجه کوله باتان منم
باشی دیار کوفه ده آغاجدان آسلانان منم
گهی حصار دیرده حریر ده یاتان منم
گهی میان طشتده نشان خیزران منم
اوزوم ذبیح اعظمم ذبیح من قفا حسین
.
.
اوزاقدان هند شاهنون هراینه گیدن منم
تهاجمات شیردن اونی خلاص ائدن منم
گهی بو قتلگاهده مقطّع البدن منم
كلام حقّی ذکر ایدن فراز نیزه دن منم
دلیل اهل معرفت منم شه هدا حسین
.
.
گھی کسوک بوغازیلن دوروب وئرن اذان منم
گھی وضوی خونیلن قوم اوسته «هو» یازان منم
شعار دین پرچمین یاتاندا قالخزان منم
یزید آدین صحیفه ی جهانیدن پوزان منم
بنی امیه ریشه سین منم ائدن فنا حسین
.
بابام محمّد رسول آتام علیّ مرتضى
حسندو قارداشیم منیم آنامدو خیرةُ النّساء
چوخ ایسترم بلانی من چوخ ایستیور منی بلا
گرک وضوی خونیلن نماز ظهر ائدم ادا
او حالدا آغلیانلارین منم ائدن دعا حسین
.
.
دئدی اجازه وئر منه شریک اولوم بو نهضته
دئدی یازیلمیوب آدون صحیفه ی شهادته
دئدی که قول وئر منه الیم یته شفاعته
بویوردی قورخما حشرده عوض یتر بو خدمته
دایانما گئت بو عرصه دن سنه آلار جزا حسین
.
.
او شخص یوزده گؤز یاشی ادامه وئردی راهنه
وداع هفتمه حسین گلوبدو خیمگاهنه
وئروب سلام آخرین عیال بی پناهنه
دولاندیروبدو مركبین قیتدی وعده گاهنه
او غم سرانی تازه دن ایدوبدو غم سرا حسین
.
.
رقیه باخدى باخدى بیر آتاسی گیتدیگی یولا
نظردن عنقریبدور گؤروب او شاهی غیب اولا
قاچوب دالیجا بیر نچه قدم او بلبل بلا
صریح اول جنابدن وصال مژده سین آلا
دیدی توقف ائیله ای یتیم لره آتا حسین
.
.
سنه بو گوزلریم فدا دایان بابا دایان بابا
دؤزه نمیرم فراقیوه که قلبیم اولدى قان بابا
دوباره عرضیمی ائشیت جهاده اول روان بابا
بویور بحقّ فاطمه سنی گوروم هاچان بابا
او ساعتی گوزتلیوم دیوم یانا یانا حسین
.
.
دئدی ائلیکه یاتدی گون چکیلدی نور و روشنی
واریمدو بزم خلوتیم گیجه گوزتلروم سنی
قشون که باتدی ترک ائله او پاره پاره خیمه نی
بو قتلگاهی آختاروب تاپارسان اوردا سن منی
سنه یارالی سینه ده درست ایدوبدو جا حسین
.
.
دیدی بو دعوتون بابا منه یتوردی تازه جان
امید وصللن گیجه بو دشتی سیر ائدن زمان
اوزوم غریب و نابلد ندن بیلوم هایانداسان
او وقته اولدوقون یئری علامتیله وئر نشان
دیدی قزیم گلنده سن اوزی ایدر ندا حسین
.
.
قدم قویاندا نصف شب بو دشت پر مخافته
هایاندا که دوشر گوزون شعاع نور و طلعته
دایانما تیز یتور اوزون او نور اولان علامته
سینمده ساخلارام سنی یئترسن استراحته
چوخور مكاندا خوابگاه ایدر سنه بنا حسین
.
.
غرض حسین شهید اولوب داغیلدی یاندی خیمه لر
اسیر و دستگیر اولوب حریم شاه خون جگر
کنار نهر علقمه وورولدی خیمه ای دگر
او خیمه ده ایدوب مکان عیال سیّدالبشر
سپهر لاجوردیه چخوب، نوای واحسین
.
.
ظهوره گلدی دیو شب گیوب لباس تیره تار
قشون یاتوب کسیلدی سس قرالدی دشت و کوهسار
رقیّه گوردی نصف شب نه شمر وار نه خولی وار
ایاقه دوردی خیمه دن یواش یواش اولوب کنار
خیال وصل یاریله دیلینده ای بابا حسین
.
.
گوروب جنازه لر دوشوب گوز ایشلدوكجه تپراقا
اوزاقدا گورسنور ایشیق شعاع سالوب صولا ساغا
صفای عشق جذب ایدوب مجال یوخ دایانماقا
او وعده گاهی گورجگین بنا ایدوبدو قاچماقا
دایانما گل رقیه جان اونی ایدوب صدا حسین
.
.
دیولّه نحر اولان بدن چاغوردی نازلو دخترین
اوجالتدى سالدى بویننا ایکی یارالی اللرین
دئدی بو جرئته قزیم هزار احسن آفرین
گلوب زیارت ائیلدون سینمده اصغرون یرین
بلی او طفلدن دگل مزارده جدا حسین
.
.
دیدی بابا فدا اولوم اطاق زرنگاروه
گتیردیم اشگ مرهمی بو جسم زخمداروه
سینونده یئر وئرن زمان او طفل شیرخواروه
دوباره قویما من گیدم منیده ال کناروه
ایله جفای زجردن رقیّه وی رها حسین
.
.
قیزیم یازیلمیوب سنه بو کربلاده مدفنی
ایدرسن آخرین مکان دمشقده خرابه نی
داخی یوبانما گیت بالا که عمّون آختارور سنی
چخوب سنون سراغوه گزور بو قانلو عرصه نی
ایدر دوباره قولنه دمشقده وفا حسین
.
.
وئرور عریضه «یحیوی» حسینه نوحه خوانووم
کئچیبدی اللی دن اوچ ایل دخیل خاندانووم
غلام پیر درگه فرشته پاسبانووم
شفاعتونده وار گوزوم گدای آستانووم
زمان احتضارده یئتش هرایه یاحسین
.
.
#حسینیه #یحیوی_اردبیلی
#حسینیه_شهادت #شام_غریبان
#بویوردی_ختم_الانبیا_سفینة_النجا_حسین
#ترکی
.
✍️ #زبدةالاشعار ✍️
.
🆔: @nohe_torki

این متن را هم بخوانید:  دُرِ گنج شرف و گوهر عصمت زهرا #فاطمیه #آسال_اردبیلی

نظر دهید

دسته بندی درختی

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

Search
Generic filters
Filter by Custom Post Type

دسته بندی درختی