بیله توکمه عارضه گوز یاشون آنام آغلاما باجیم آغلاما #حیدریه_تائب_تبریزی

تسلیت امام حسن (ع) به خواهرش
در عزای پدر بزرگوارش
..
..
#سبک_بالام_آغلاما_گلوم_آغلاما … سن آت اوسته پای پیاده من … دولانور علی قزی مقتلی …
..
..
مرحوم تائب تبریزی
..
..
بیله توکمه عارضه گوز یاشون
آنام آغلاما باجیم آغلاما
بابامیز ئولوب ساق اولا باشون
آنام آغلاما باجیم آغلاما
..
..
بولورم یانور اورگون باشی
یانوسان بو سینه وی داغلوسان
دولوسان بولود کیمی دمبدم
یوزه اشگ حسرتی باغلوسان
دولی گوزلریوی دولاندیروب
باخوسان منه بیله آغلوسان
گل او گوز یاشون سیله قارداشون
آنام آغلاما باجیم آغلاما
..
..
آنام اوز یرینده قویوب سنی
اوزی گیتدی قبره یارائیله
آناسیزلارا آنا اولموسان
آناتک کمال وفائیله
اگر ایمدیده آناسیزلارا
ویره سن تسلی صفائیله
نه که عارضه آخا گوزیاشون
آنام آغلاما باجیم آغلاما
..
..
باجی آغلیانده بو رسم دور
گوزی یاشلی قارداشی آغلادار
پوزولان حسینی می گور پوزار
بو آخان گوزون یاشی آغلادار
بوحسینیم آغلاسا یر گویی
داغی آغلادار داشی آغلادار
ایده ناله قویما بو قارداشون
آنام آغلاما باجیم آغلاما
..
..
باجی طاقتیم توکنور منیم
سئچورم بو حال تباهیوی
اورگیم یانور دولوری گوزوم
گورورم بو طرز نگاهیوی
بیله یانما ایلمه اودلانان
اورگونده شعله ور آهیوى
توکور اود بو آه شرر پاشون
آنام آغلاما باجیم آغلاما
..
..
هله بو باشوندا دولانمیوب
قره تللرون باجی جان آغا
هله ورومیوبدى عدو سنون
اورگون باشندا داغی داغا
قوی اوزین بولود کیمی غم دوتا
باشوا یاغیش کیمی غم یاغا
گنه دؤز خم ایلمه اوز قاشون
آنام آغلاما باجیم آغلاما
..
..
آنامین عزیزه قزی باجیم
غمی اود سالان هامی دللره
هامی ایل لر- ائللر آرا دوشن
سوزی صحبتی هامی دیللره
سنی سالمیوبله مدینه دن
هله داغ داشا هله چوللره
فلک آتمیوب اوزاقا داشون
آنام آغلاما باجیم آغلاما
..
..
سنی هربلا دولانار تاپار
دوشه سن بلالی بلایه سن
بو حسینی میله شریک سن
دیدوقون او لفظ بلایه سن
هله دوز بو گوز یاشیوی آپار
اوزویله کرب و بلایه سن
اولار اوردا گوز یاشی یولداشون
آنام آغلاما باجیم آغلاما
..
..
او بلا چولونده بلا یاغار
غم و غصه باشدان او گون آشار
هامی دل شرار غمه یانار
هامی گوز دولار هامی گوز داشار
آنا اوغلونا باجی قارداشا
همی اوخشیوب همی آغلاشار
داخی مین غمون اولی بیر باشون
آنام آغلاما باجیم آغلاما
..
..
سنه تائبا اولوب آشنا
کوچه مشگی آدلی او نوحه خوان
بو یانقلی سوزلری یازدیروب
بو سلاستیله او لوب روان
یولوزی مزارینه بیر سالون
ایلیون بو سر سخنی بیان
بیله توکمه عارضه گوزیاشون
آنام آغلاما باجیم آغلاما
.
.
.
.
#حیدریه #تائب_تبریزی
#حیدریه_شهادت
#بیله_توکمه_عارضه_گوز_یاشون_آنام_آغلاما_باجیم_آغلاما
#ترکی
#زبدةالاشعار