شهادت حضرت امام حسین (ع)
.
✍️ #زبدةالاشعار ✍️
.
🆔: @nohe_torki
.
کریمی مراغه ای
.
تا حسینون شور عاشوراسی وار
هر محرم شیعه نون غوغاسی وار
.
.
واحسینائیله دولموش نُه طَبَق
غرق ماتمدور سراسر ما خلق
فرشیدن عرشه دوتوب قاندان شفق
کربلا دشتینده قان دریاسی وار
.
.
ائت بصیرتله او صحرایه نظر
نوحی گور قان لجّه سینده غوطه ور
پیرمرد و نوجوان و صود امر
بزم عشقه جمع اولوب شوراسی وار
.
.
بیر طرفده قاسم آلقانه باتوب
ناز ایدیر طوی حجله سین گوزدن آتوب
قان ایچینده گون قباقینده یاتوب
ایستی قومدان بستر دیباسی وار
.
.
زلف اکبر بخت لیلایه مثال
طالع زینب کیمی آشفته حال
باشی نی ده نعشی یرده پایمال
عشقینه مجنون اولان لیلاسی وار
.
.
آلتی آیلیق صودامر قربانی گور
حنجرینده زهریلی پیکانی گور
گول دوداقدا صود یرینه قانی گور
آدی اصغر محنت کبراسی وار
.
.
نهر علقمده دوشوب بیر پهلوان
سرو قامت بیر اوزون قوللی جوان
سو کنارینده ویروب لب تشنه جان
ساقی حشرین سوسوز سقّاسی وار
.
.
بیر طرفده قانه باتمیش شاه عشق
ایلیوب جانین فنا فی الله عشق
بیر طرفده اودلانور خرگاه عشق
سوز عشقین صحنۀ زیباسی وار
.
.
نقل ایدیر راوی که گوردوم بر ملا
ووردیلار اود خیمه گاهه اشقیا
اللری باشدا بنات مصطفا
دیللرینده ذکر واویلاسی وار
.
.
بیر قیزین گوردوم دوتوب اود دامنی
یوز قویوب صحرایه دلده شیونی
سسلنور یاندیم بابا درک ایت منی
یوخ پناهیم دشمنین ایذاسی وار
.
.
کربلا صحراسی طوفاندور بوگون
زینبون حالی پریشاندور بوگون
اللری قانیله الواندور بوگون
نه یانیندا جدّی نه زهراسی وار
.
.
عصمت الله گوردی شمر بی حیا
الده خنجر دلده بغض مرتضا
ایستوری قارداش باشین ایتسون جدا
نه اوغول وار نه رشید عباسی وار
.
.
باشدا اول محکم ایتدی معجرین
ایتدی حمله دوتدی شمرین خنجرین
کسدی خنجر نچه یردن اللرین
ظلمدن شمرین مگر پرواسی وار
.
.
ای «کریمی» نوحه یاز صبح و مسا
اول همیشه خادم آل عبا
دردیوه دربار شهدن آل دوا
مرتضی دلبندینون اعطاسی وار
.
.
#حسینیه_کریمی_مراغه_ای
#حسینیه_شهادت
#تا_حسینون_شور_عاشوراسی_وار
#ترکی
.
✍️ #زبدةالاشعار ✍️
.
🆔: @nohe_torki
نظر دهید