ترکیب بند
در مصائب کربلا از قتلگاه تا مجلس ابن زیاد
زبانحال حضرت اباعبدالله الحسین علیه السلام
.
✍️ زبدة الاشعار ✍️
?: @nohe_torki
.
حاج داود بیدق داری
.
روشن ائلین چهرۀ آفاقی منم من
معطور ائلین خلوت عُشّاقی منم من
.
آیات الهی نی گورن وقتیده هر آن
اللّهی گورن دیدۀ مشتاقی منم من
.
نوری یارانان عرش مُعلّاده ازل گون
مبهوت ائلین جلوه سی نُه طاقی منم من
.
شأنیمده گلوب سوره خدای ازلیدن
آیات حقین مظهر و مِصداقی منم من
.
عشقین گونی دنیانی ایشیقلاندیروب امّا
عشقین اؤزونون مشرقِ اِشراقی منم من
.
مقتلده آچان خوان کرامت گئجه یاری
گریان ائلین اَنفُس و آفاقی منم من
.
طوفانه دوشن شیعه لره فُلکِ نجاتم
عالم بیله لب تشنه لره آبِ حیاتم
.
#غارت_خیام
.
تا چخدی باشیم نیزیه هنگامه چوخالدی
بی جا دگی زینب بو هیاهوده قوجالدی
.
باش مرکز میداندا اولوب نی ده نشانه
اطرافیده گیزلین بالالار بیر بیر اوجالدی
.
کیم گوردی یارالی باشی سسلندی حسین وای
قاچدی وورولانلار باشیمون دورینی آلدی
.
آهو کیمی صیّاده دچار اولدی حرملر
حسرتده علی قیزلاری بیر یاوره قالدی
.
نازیله سراپردۀ عصمتده قالان قیز
وحشی عربین گوردی یوزین رنگی سارالدی
.
کیم سسلدی وای قارداش اونا قمچی وورولدی
هر ضربه دگوب قیزلاریمون صبری آزالدی
.
بیر بیرله قوجاقلاشدی آدامسیزلار او یئرده
بیر حلقه ده توپراقه دوشوب قیزلار او یئرده
.
#شام_غریبان
.
یئر گوی قارالوب دوتدی منه شام غریبان
قالدی بدنیم باشیم اولوب خولیه مهمان
.
مقتلده تاپوبدور منی بیر قیز گئجه یاری
عرض ائتدی قیزون کاش اولا بو یارووه قربان
.
گوندوز که منه کوفه لیلر وئرمدی فرصت
گلدمی بورا بلکه سنه من آغلیام الآن
.
یادیمده قالوب سن قوناقا حُرمت ائدردون
فرض ایله قوناقم بو گئجه ای شَهِ عطشان
.
دیندیر منی لطفیله بی بیم زینبه خاطر
قویما قییدیم خیمیه من قلبی پریشان
.
عمّه م سنه بیر کوینک اؤزی وئردی گلنده
اگنونده اودا قالمیوب ای پیکری عریان
.
یوخدور باشون ای تاج سر اهل دیانت
عمّه م نئجه بو حالتیوه ایلدی طاقت
.
الله بیلوری شام غریباندا نه واردی
آی یئرده کی اولدوزلارا حسرتله باخاردی
.
طوفانیدی قلبینده فراتین او بلادن
ظاهرده ولی صبر ائلیوب سس سیز آخاردی
.
یانمیشدی سراپرده کولون یئل هر اسنده
یئردن گوتوروب علقمین اوستونده قالاردی
.
اصغر آناسی خیمه دالیندا گئجه یاری
اصغر پایینی قوملارین اوستونده ساغاردی
.
صود یئرده سوزن وقته دییردی بالام ایوای
اوندا صودوم اولسیدی بالام ایندی قالاردی
.
بیر یاندادا صبریله یانان خیمه سراده
دلخسته باجیم قیزلاریمین گویلون آلاردی
.
باشیم او زمان مطبخ خولیده یئر آلدی
گور چرخ فلک لاله گُذارین هارا سالدی؟
.
#کوچ_کربلا
.
اون بیر گونی چخدی ولی شرمنده و غمناک
گودالیده قالمیشدی گُلِ سرور لولاک
.
سرباز و رعیت او گونی کامه چاتوبلار
امّا بوریوب پیکر شاهی خَس و خاشاک
.
آت دیرناقی بیر حالته سالمیشدی او شاهی
حیرتله باخاردی داغیلان پیکره افلاک
.
باغلاندی حیالی بالالار بیر بیره قولدان
آماده اولوب کوچ ائلیه لشگر ناپاک
.
قصدیله یولی سالدیلا مقتل طرفیندن
بلکه ائده لر درده دوشن قلبلرین چاک
.
بیر معنوی درک ایستور او اثناده وَ اِلّا
حاشا باجینون دردینی بیر کس ائده ادراک
.
.
زبانحال حضرت زینب (س) در #قتلگاه در هنگام #کوچ_کربلا
.
گوردی یارالی پیکری تا زینب بی یار
عرض ایلدی احوالیمه باخ ای منه دلدار
.
سن عشق نگاریله قویوببسان باشا بیر تاج
من اولموشام امّا کسیلن اللره محتاج
.
من عشقه اسیرم قولی باغلی گوزی گریان
سن عشقیدن امّا ائلیوبسن گویه معراج
.
سن طیّ ائلدون عشق یولون کرب و بلاده
منده ائدرم شامه کیمی ناقه ده مِنهاج
.
سن وصلِ نگاریله یئتوردون باشا عمرون
غمدیده باجون اولدی ولی غملره آماج
.
امّا نگران اولما حسین کانِ وقارم
غم موج اولا گر زینب اولار قُلزُمِ مَوّاج
.
بوندان صورا سن قبله سن ای قبلۀ عشقیم
عشقونله تاپار عزّتینی قبلۀ حُجّاج
.
دردیم بودی گلدیم بو چوله سنله گلن باش
ایندی گئدورم کوفیه من شمریله قارداش
.
#کوفه
.
باشلار وورولوب نیزه لره طی اولونوب راه
اولدوزلاری یئرده ولی سرنیزه ده دور ماه
.
گورسندی گوزه کوفه سوادی چکیلوب جار
کوفه آدینی زینب ائشیتدوکجه چکوب آه
.
اوّل یاارالی باشلاری وارد ائلیوبلر
بازاره دئیرسن چکیلوب یوسف دلخواه
.
دنیا ائله تنگ اولدی او گون زینب زاره
دوتدی یوزینی نیزه ده قانلی باشا ناگاه
.
عرض ائتدی هلالیم نیه بو تئزلیگه سولدون
فکر ایلمزیدیم بئله تقدیری من ای شاه
.
قرآن اوخی سن نیزه ده منده اوخودوقجان
تفسیر ائدرم نیزه ده خشنود اولار الله
.
دیندیرمه بو غمدیده نی ای نور دو عینیم
امّا بالاجا فاطمه نی دیندیر حسینیم
.
ای زینت آغوش نبی روح مُکَرَّم
مبهوت قالوبدور سنه اسکندریلن جَم
.
زائردی سنون باشیوه عیسائیله موسی
نوحه اوخیور نوح ، وورور سینیَه آدم
.
بیرده باجیوین باشینه سال سایه وی قارداش
ای نوری اولان خلقت دنیایه مُقدَّم
.
یارماز بو هیاهوده باشین بس باجی نیلر؟
فتوا وئر اؤزون عشقیمه ای عالِم اَعلم
.
قرآن اوخیان لبلره قربان اولا زینب
من شاهدم اول لبلری بوس ایلدی خاتم
.
کافرده داش آتمازدی یارالی باشا قارداش
بو سوز منی بیر حاله سالوب قدّیم اولوب خم
.
یاندیم بو غمین شعله سینه دارِ بلاده
آخرده گوزوم دوشدی منیم ابن زیاده
.
#مجلس_ابن_زیاد
.
بیر مجلسیدی مثلینی حاشا گوره دنیا
هنگامۀ محشر اولونوب زینبه برپا
.
ساقی لر او مجلسده دوروب ساغر الینده
کیم میل ائلسه باده اولور فوری مُهیّا
.
فتح و ظفر عشقیله زیاد اوغلی اولوب مست
تخت اوسته اوتورمیشدی غروریله سراپا
.
قویموشدیلا طشت ایچره یارالی باشی گل تک
تختین قاباقیندا قویولوب طشتِ مُطلّا
.
باریکیدی بو نکته سوزوم عالمی داغلار
اول مجلسه قول باغلی گلوب زینب کبری
.
قولّاردا رَسَن وارد ائدوبلر اُسَرانی
معناده باخوب قیزلارینا آغلادی طاها
.
زینبده او حالیله قوری یرده اوتوردی
قیزلار گلوب اطرافینه بیر دایره ووردی
.
هر قیز یارانا دختر حیدر اولا بیلمز
زینب کیمی عالمده سخنور اولا بیلمز
.
گوردی یارالی باشی ولی دینمدی اوّل
صبر عالمی بو زینبه مظهر اولا بیلمز
.
دیل یاره سی اما خانمین طاقتین آلدی
بیر نطق ائلدی مثلی مکرّر اولا بیلمز
.
فرمایش ائدوب فکر ائلمه بوردا اسیرم
خلقتده بیری بیزلره برتر اولا بیلمز
.
بیز طایفیه عین سعادتدی شهادت
هر کیمسه ده بو نعمت باور اولا بیلمز
.
گلمز آتامون مثلی عدالتده بیلورسن
هر رهبر اولان ملّته حیدر اولا بیلمز
.
افلاکِ حیا و شرفین اولدوزیام من
زهرا ائوینون حیدره بنزر قیزیام من
.
#حسینیه_شهادت
#عاشورا
#روشن_ائلین_چهره_آفاقی_منم_من
#بیدقداری
#ترکی
.
✍️ #زبدةالاشعار ✍️
?: @nohe_torki
نظر دهید