غلام درگه عشقم حسیندور عشق سلطانی

احوالات غلام سیاه
گریز به قتلگاه حضرت اباعبدالله الحسین علیهما سلام
..
..
..
..
علی نوروزی نوین
..
..
..
..
غلام درگه عشقم حسیندور عشق سلطانی
بو جان عالم هستی او شاه عشق قربانی
..
نه چوخلار باب لطفینده یتوبلر عزت و جاهه
آتوبلار عالمی گوزدن دوتوبلار دار عقبانی
..
او کسلردن که دنیاده ائدوبدور کام دل حاصل
چکوب ال جانیدن اما دوتوبدور راه جانانی
..
آدی جون و سیه چهره غلام شاه مظلومان
نجه بیر قولدی حیران قویوبدی اهل دنیانی
..
او گون که یار و انصار حسین القانینه باتدی
کمکسیزگوردی اول چولده امیر ملک بطحانی
..
گلوب عرض ایلدی مولا کمکسیز جانیوه قربان
غم و آلامیدن قورتار شها ، سن بو پریشانی
..
اگر چه بیر غلامم من اوزوم بدبو سیه رنگم
تفضل قیل شها مندن قبول ائت بو تمنانی
..
اجازه ویرگیدوم منده اولوم قربانیِ جانان
سالیم آخر اله مولا رضای حی سبحانی
..
دونوب فرمایش ایلوبدور او دمده کربلا شاهی
سنی آزاد ائتدیم من باشوندان آت بو سودانی
..
قوتار جانون بو صحرادن که حق سندن رضا اولسون
رضا من اولمارام آخسون سنون تک باوفا قانی
..
دوباره عرض ائدوب مولا که بو هرگز روا اولماز
قاپوندان گل منی قووما سنی زهرا آنان جانی
..
او گون کی شهر یثربده یاشاردوز خاطری راحت
یاشاردیم منده نازیله یوخیدی غصه بیر آنی
..
شها خوان نوالوندان منی سیز بهره مند، ائتدوز
صفالی دودمانوندا گورردیم لطف یزدانی
..
ولی ایمدی یامان گونده بوراخسین خواجه سین نوکر
روا دور گور سیزی تاری بو گفتارین وار امکانی
..
منه گل رحم ایله مولا مرخص قیل گیدوم جنگه
او قدری یالواریب آخر آلوبدور اذن میدانی
..
حسینه باخدی حسرتله توکوب رخساره گوزیاشی
یانان قلبینده یاندیردی او دمده نار هجرانی
..
وداع ایلوبدی آیریلدی اَنیبدور تلّی میدانه
صفوفه بیر نظرسالدی گوروبدور لشگر جانی
..
حسینون قتلینه یکسر اولوب اول قوم آماده
گوروب ایستوله ییخسونلار ستون دین و ایمانی
..
دیلنده یا حسین ذکری ائدوبدی حمله اشراره
توکوبدی توپراقا آتدان او قوم بی تولانی
..
ائدردی جنگ شوقیله سالاردی لشگره وحشت
پوزاردی شیر تک گاهی صفوف قوم اعدانی
..
هلاک ایلوب او صحراده یازولار ایگرمی بیش فاسق
اوجاتدی قوم کافردن فغان و آه و غوغانی
..
یورولدی بس که جنگ ائتدی دگوبدی جسمینه یاره
آخوب قان هر یاراسیندان گیدوبدور تاب جسمانی
..
او قدری یاره دگمیشدی بدن اولموشدی صد پاره
ییخلدی صدر زین اوستن مزیّن ائتدی صحرانی
..
اوتاندی سسلسین اما او دم داده حسین گلسین
سلامیله مخاطب ایلدی اول شاه دورانی
..
غلامین شه سسین آلدی به فوری گلدی باش اوسته
قوری توپراقلار اوستنده گوروب او قانه غلطانی
..
باشین آلدی دیزی اوسته عذاره آخدی گوز یاشی
بیر آز آغلوبدی آغلاتدی تمام کون و امکانی
..
حسین آغلاردی حسرتله گُولَردی قوم کین گستر
شماتت تیری یاندیردی دل مجروح مولانی
..
غلامین شه دعا ائتدی او بد بو أیی اولوب زائل
دم مولا قویوب حیران او دمده پور عمرانی
..
قلم بو یرده فریاده گلوبدور یاندیروب قلبی
او یانماق نالیه گتدی سپهر چرخ مینانی
..
او دم که شاه مظلومان ییخلدی ذوالجناح اوستن
باشی اوسته گلن اولموب گتوردی داده زهرانی
..
یوزین توپراقه قویموشدی آخاردی قان یاراسیندان
یارالار سلب ائدوب دیلده اولان تاب و توانانی
..
حسینون دادینه گلسون چیخوبدور خیمه دن زینب
ائدوبدور معجرین محکم بتول اطهر ثانی
..
قویوب یوز مقتله ساری او دمده زینب نالان
گلردی چوخ شتابیله گوره او شاه خوبانی
..
نجه گلدی نلر گوردی نلر اولدی دئیه بولمم
بوقدری وار دئیه بولم اوجالدی داد و افغانی
..
نه گوردی شمر بی پروا چیخوبدی سینه سی اوسته
دوشوبدی آیری بیر حاله گورنده تیغ برّانی
..
علاجی اولمادی ناگه ال آتدی دوتدی خنجردن
ائدوبدی کشمکش زینب یانوبدی قلب سوزانی
..
ایا صاحب زمان عفو ائت اگر چه چوخ جسارتدور
نجه شرح ایلیوم آخر بو غملی ما وقایانی
..
خانیم بیر ساق صولا باخدی او گیر و داریده یالقیز
قالوبدورآیری احواله یازا بولمم بو عنوانی
..
گوزون آچدی حسین گوردی باشی اوستنده غوغادور
باجی جان نقدینی الده ائدور قارداشه ارزانی
..
نه گوردی یالوارور ، زینب که ظالم گل منی ئولدور
اماندور ظالم ئولدورمه قرار قلب طاهانی
..
گورورسن جان ویرورآخر بدنده یارسی چوخدور
گتورمه قهره ای ظالم خدای حی رحمانی
..
حسینی که سن ایستورسن کسه سن باشینی عطشان
او باش دستمالی ایلوبدور مزیّن عرش علانی
..
یقین ائت قارداشیم بیرده دورا بولمز بو مقتلدن
مگر ظالم گوزون گورمزآخوری قلبینین قانی
..
نه شرمون وار پیمبردن نه وار خوفون قیامتدن
جوابون وار سنون آیا قورولسا حشر دیوانی؟
..
بوگون اوچ گوندی قارداشیم سو ایچموب تشنه دور تشنه
اقلاً بیرایچیم سو ویر چوخ اینجتمه بو عطشانی
..
چکیل تا جان ویرن لحظه گوزونی باغلیوم باری
و اِلا ئوُلدورر حسرت منِ محزون و نالانی
..
حسین ایستوب دوداقلاره تکان وئرسون دیله گلسون
دیله گلدی ولی گتدی فغانه شاه مردانی
..
بویوردی زینبیم بسدی بو قدری شمره یالوارما
گرک بو چولده قارداشون یتورسون باشه پیمانی
..
اماندور ، دورما گیت زینب سوسوز قیزلار سنی گوزلور
گوزوندن آتما بیر لحظه باجی او غملی طفلانی
..
بو دورماقه نظرزینب گوزومی باغلاماق اولسا
آنام زهرا گلر باغلار بو چشم گوهر افشانی
..
او قدری قالموری زینب یتم بو چولده مقصوده
گیدوب سنده تدارک گور منه شام غریبانی
..
بو نوعی آغلیوب زینب یاراما سوزش آرتیرما
فغان و ناله چوخ ائتمه گتورمه داده دنیانی
..
ائدوبدی امتثال امر امامه مهربان زینب
ندندی اولمادی ویران او ساعت عالم فانی
..
قویوب قارداشینی گیتدی و لیکن قالدی حیرتده
نجه گیتسون نجه قالسون او مهر و عاطفه کانی
..
گیدور گاهی دورور آغلور باخور گه سمت قتلایه
دئیردی زینبون قربان سنه بو چشم گریانی
..
قالوبدی زینبون حیران بو صحراده حسین قارداش
هارا گیتسون دئسون آخر کیمه بو درد عظمانی
..
(نوین ده)دهریده حیران قالوب سسلور سنی داده
قوتار ، درد و مصیبتدن حسین جان سن بو حیرانی
..
نه مدتدورکه باشینده اونون شوق زیارت وار
نصیب ایله بو جمعیله گله بیر وقفه قربانی
..
..
..
..
#جون_غلام_سیاه
#اصحاب_الحسین
#غلام_درگه_عشقم_حسیندور_عشق_سلطانی
#نوروزی_نوین
#ترکی
#زبدةالاشعار