حالات حضرت زینب سلام الله علیها
..
..
..
..
حاج اکبر غفاری زنجانی
..
..
..
..
نور تقوا و حیا حقّیدن آیت زینب
عزّت آفاقینه خورشید جلالت زینب
..
..
..
..
فاطمه نائبه سی بانوی فرخنده لقا
ایلدی حیدر ایوین نور رخی جلوه نما
افتخار ایتدی اونا فاطمه امّ النجبا
حق یکتادن اونا اولدی کرامت زینب
..
..
..
..
فخری وار عالمه زهرای مطهّر قیزیدی
قاسم نار و جنان ساقی کوثر قیزیدی
سیندیران کعبه ده کی بتلری حیدر قیزیدی
مرتضادن آپاروب ارث شهامت زینب
..
..
..
..
نجه زینب که اونون شهرتی وار دنیاده
گله مانندی چتین بیرده اونون ایجاده
دست پروردۀ زهرا روش زهراده
گتورن کامه گوزل آدی حلاوت زینب
..
..
..
..
کیمون آیا یتیشر بو خانما اجلالی
منطقی عقل پسند اولدی اونون افعالی
حضرت حقه اولان بنده ی عالی عالی
ترک اولیٰ دن ایدن بلکه برائت زینب
..
..
..
..
وار کیمون قدرتی وصف ایتسون او والا نسبی
ویرمین فوته اودور نافلۀ مستحبی
قوزانان عرش معلّایه مناجات شبی
عاشق ذکر و مناجات و عبادت زینب
..
..
..
..
بویوروب حضرت سجاد او برازنده مقام
بیر گیجه عمه می گوردوم او کفیل ایتام
اوتوروب یرده نمازه ایده بیلموردی قیام
ایلیور حضرت معبودینه طاعت زینب
..
..
..
..
خبر آلدیم او قیام ایتممگون علتنی
یوخلادیم نایبۀ فاطمنون همتنی
بیلدیم آجلوخ آپاروب دیزدن اونون طاقتنی
ئوز غذاسین ایلیوب قیزلارا قسمت زینب
..
..
..
..
او کفیل اسرا شیر زن بی پروا
اوج عفتده وران بال و پر عصمتلی هما
قهرمان صبر مقامنده ئوزی با تقوا
صاحب نطق و بیان، علم و فصاحت زینب
..
..
..
..
شعله آسادی سوزی خرمن استبداده
آتشین خطبه سی اود ویردی دل بیداده
مرحبا زینبی ارشاد ایلین استاده
اورگنوب فاطمه دن درس بلاغت زینب
..
..
..
..
کیمین استادی مسلمدی اولا فاطمه تک
سفرۀ جود علیده یسه کیم نان و نمک
ایلیر وقت خطر دین خداونده کمک
نجه گور ایلدی اسلامه حمایت زینب
..
..
..
..
اولماسیدی اگر عالمده او بانوی متین
شهدانون او آخان قانلاری باتموشدی یقین
اهتزاز ایتمزیدی عالم ارا پرچم دین
ایتدی زندیقلری خوار و خجالت زینب
..
..
..
..
کربلا واقعه سندن صورا اول فخر زنان
داستان او چولی ایتمیشدی ورد زبان
ظلم بی حدّ یزیدی ایدوب افشا و بیان
چگننه آلموشیدی بار رسالت زینب
..
..
..
..
جمع اولان وقتده نسوان قبایل باشنا
فاش ایدردی او اورک دردینی غم یولداشنا
آغلاداردی هامونی الده ئولن قارداشنا
کربلا دن ایلین وقته حکایت زینب
..
..
..
..
دانشاردی اولارا اوردا قوپان محشردن
اوردا گل تک داقلان یتمش ایکی پیکردن
اود چخاردی دانشاندا دل پر اخگردن
ایلیردی بیله گویا که روایت زینب
..
..
..
..
گذریم قتلگه دوشدی یامان ساعتده
گورمیه هیچ باجی قارداشنی اول حالتده
قارداشیم قالموشیدی بیر حالا که غارتده
فکر ایدون گتدی نجه بو غمه طاقت زینب
..
..
..
..
بارماقی گیتموشیدی غارته انگشتریلن
پیرهنسیز شه دین بیر یارالی پیکریلن
قانلی گوداله یخلمشدی تن بی سریلن
صحنۀ محشری درک ایتدی او ساعت زینب
..
..
..
..
بو محن چخماز ئولنجه بو دل مضطردن
تاپمادی بوسه یری اول یارالی پیکردن
اوپدی حسرتله اوعطشان کسلن حنجردن
نحر اولونموش بوغازی ایتدی زیارت زینب
..
..
..
..
کربلا غملرینی یاد ایلیوب آغلاردی
گوز یاشین عارضنه سیل کیمی باغلاردی
آتش غملره دائم اورگین داغلاردی
غصه دن تاپمادی بیر آنی فراقت زینب
..
..
..
..
گوردی عبدالله اونی غصه و آلامه سپر
غصه مرگ آز قالور اولسون ایدوب احساس خطر
پیشنهاد ایتدی اونا ایلیلر شامه سفر
بو تقاضانی ایدوب اوندان اجابت زینب
..
..
..
..
قویمادی حیف اولا اول غم کشی بو دور زمان
ویرمدی غصه و غمدن اونا بیر لحظه امان
کربلایه یوزونی دوتدی ویرن وقتیده جان
چاقوروب قارداشین امداده او ساعت زینب
..
..
..
..
شامده جان ویرورم گل منه سن آغلا حسین
ئوز الونله نگران گوزلریمی باغلا حسین
باشیم اوسته یوزوه اشک محن باغلا حسین
گوز تیکوبدی یولووا قلبده محنت زینب
..
..
..
..
غصه لر یور قونی قدی خم اولان زینبوم
الّی ایل غملریله همدم اولان زینبوم
یاره سی قلبده بی مرهم اولان زینبوم
گل گیدور قبر ایوینه قلبی جراحت زینب
..
..
..
..
قوم و قارداش قاراسین باشه سالان زینبوم
طاقتین غصه و محنتلر آلان زینبوم
زلفی غمدن آغاران، تز قوجالان زینبوم
ئولورم لطف ایله گل جان ویره راحت زینب
..
..
..
..
مقتله اللری باشنده گلن زینبوم
حشر کبرانی بو دنیاده گورن زینبوم
اللرین خنجر جلاد بولن زینبوم
آپارور قبره او خنجردن علامت زینب
..
..
..
..
دهریده عهدینه ایفا ایلین زینبوم
دانشوب کوفه ده غوغا ایلین زینبوم
ابن مرجانه نی رسوا ایلین زینبوم
حمل ایدوب نهضت خونینوه رایت زینب
..
..
..
..
واردی بیر خواهشی «غفارینون»ای اهل عزا
مغفرت ایستیه سوز حیّ توانادن اونا
اوندا که قاره یرین آلتینی ایلر مأوا
ایلیه روز جزا بلکه شفاعت زینب
..
..
..
..
#زینبیه #غفاری_زنجانی #زینبیه_مدح #زینبیه_شهادت #ترکی #زبدةالاشعار
نظر دهید