رجزخوانی و جنگ مسلم ابن عقیل وشهادت او
#گریز به #تنور_خولی
..
..
سیفی اردبیلی
..
..
کوفیان دینوزی ویردوز یله شیطان اوسته
قالمادوز اوز دیدیگوز وعده و پیمان اوسته
چکدوز عشق زریلن اسلحه مهمان اوسته
منده مین جان اولا مین قان توکه سوز قان اوسته
قویمارام لکّه دوشه صفحۀ قرآن اوسته
..
..
..
مسلم ام سالک آزاده و هاشم نسبم
سیف اولاد بنی هاشمه صاحب لقبم
سرفراز شرف و منزلت جد و أبم
حق نماینده سیم حامی میر عربم
دورموشام شیر کیمی عرصۀ میدان اوسته
..
..
..
تکیه گاهیمدی عنایات حق لم یزلی
لطف حق اولماسا خسراندادی هر شخص بلی
سیزه رهبردی یزید ابن معاویه ولی
منه مولادی حسین وارث بر حقّ علی
خوشدی قربان اولا جانیم بیله جانان اوسته
..
..
..
عشق دلداریمه وار منده گوزل روح صبور
بیر کسون نوکریم خادمه بابیدی حُور
چخارم هرنه دی عشقیمده آقام یاخچی تانور
باشیمی ران ملخ فرض ایدرم عشقیمی مور
یوللارام تحفۀ ناچیز سلیمان اوسته
..
..
..
سالمارام نفسیمی سیزلر کیمى من ظلماته
اگمرم ظالمه باش وعدۀ تشویقاته
طالبم نورحسینی ده که تاثیراته
گلمیشم حقّه گوره شهروزه تبلیغاته
مجریم من آقامون ویردیگی فرمان اوسته
..
..
..
یوخومش ذره وفا نفس شریروزده سیزون
فتنه لر ریشه آتوب خوی ضمیروزده سیزون
اگلشر أهل شرف هاردا سریروزده سیزون
عرضه یوخ نطفه سی ناپاک امیروزده سیزون
آدی بیر لکّۀ ننگینیدی دوران اوسته
..
..
..
بیعت اقرار ایلدوز بند دل زهرایه
چخمادی صحّت قول و عملوز فردایه
دینی قویدوز ایاق آلتدا دِرَم دنیایه
بیر کمکسیز قوناقی سالدوز عجب غوغایه
حقی سرکوب ایده سوز سکّۀ بطلان اوسته
..
..
..
ایتمیوب دست قدر ذلّتى تحریر منه
ورون هر قدرى الوزدن گله شمشیر منه
زخم شمشیریده یوخ عشقیله تاثیر منه
اوج عزتدى سیزون طعنه و تحقیر منه
نوحی عالم تاندی گوردیگی طوفان اوسته
..
..
..
مسلمون عشق خدا سالدی باشین بلوایه
یاحسین سسلدى حمله گتوروب اعدایه
برق شمشیری شرر سالدی دل دنیایه
خون پاکین ایلدی دین یولینا پیرایه
گلدی میدانیده اصلان کیمی جولان اوسته
..
..
..
قوشونا عرصه نی تنگ ایتدی او پاکیزه ماب
نجه شهباز قوی شهر ایدر صید غُراب
قویمادی سوز عطش دیزلرینه طاقت و تاب
عرصه ده شیر حقی دوره لدى فوج ذُباب
پنجه باز ایلدی روباهیلر اصلان اوسته
..
..
..
اولدی محصور قوشون چاله ده اول پاک ضمیر
نه یاماندور که اولا مرد کیشی نامرده اسیر
فرصت حمله سالوبدور الینه بکر شریر
مسلمه وردی او ظالم چپکی بیر شمشیر
اوتدی آلنیندان او شمشیر زنخدان اوسته
..
..
..
بارالها نه ستم پیشه دی چرخون روشی
چرخیدن تنگه دوشوب دائمی حق دارون ایشی
ایله بیر ضربه وروب مسلمه ناپاک کیشی
لبی یاقوت کیمی پارچالانوب سیندی دیشی
آغزینون قانی سوزوب سینۀ سوزان اوسته
..
..
..
حمد ایدوب مسلم او حالتده اَوَل داورینه
آه پیغامینی گوندردی صورا دلبرینه
دیده باز ایلدی تا که باخا دور و برینه
قان پیاله کیمی دولدی نگران گوزلرینه
باغلادی اوخ کیمی مژگانلاری مژگان اوسته
..
..
..
گوزی قان لبلری یاره دیدی یاهو یاهو
سالدی عشقونده منی گورنجه ایذایه عدو
اولدوم آوارۀ نیرنگ مریدان دورو
عطش ئولدوردى منى کوفه لیلر ویرمدی سو
ایچدیم اؤز قانیمی من سو یرینه جان اوسته
..
..
ای نوای دل مظلوم اولان الله دل شب
ای انیس غم هر خسته جگر سوخته لب
ای اولان زندگی یوسفه چاه ایچره سبب
سنون امّیدوه قالدی ایکی اوغلوم یارب
سال کرم سایه وی طفلان پریشان اوسته
..
..
..
اولار آواره لریم أُوو کیمی صیّاده دچار
اینجیدر قورخولی جیرانلاریمی فرقۀ نار
رحم ایله اولسالا سرگشتۀ هر کوی و دیار
قالماسون یوزلرینه من کیمی باغلی قاپولار
قونما سون گرد کدر چهرۀ طفلان اوسته
..
..
..
الفرض رهرو آزادۀ توحید و جهاد
مسلمِ اِبن عقیل عارف پاکیزه نهاد
اولدی کف بستۀ جور و ستم اهل فساد
کسدی لب تشنه باشین بامیده بکر جلاد
اهل حق عبرت ایده چخمیا طغیان اوسته
..
..
..
مسلمون الده دوتوب قانی باشین بکر شرور
گتوروب ویردی زیاد اوغلینا با کبر و غرور
والی کوفه نی ایتدی بو جنایت مسرور
دیدی بیر شخص قویدل گرگ اولسون مأمور
صدقیله دورسون امیر امرینه فرمان اوسته
..
..
..
قانلی باش حمل اولونا شامه گرک بی تردید
امر لازمدی گوره بو باشی قصرینده یزید
ایده تا ابن زیادون خدماتین تایید
من اوزوم حمل ایدرم عرض ایلدی بکر پلید
وارام اجرای امیر امرینه پیمان اوسته
..
..
..
او باشی بکره ویروب کوفه نون استانداری
سنده واردور دیدی بوامره لیاقت آری
گئجه نی ساخلا ایوینده سحر اولسون باری
بیر کسوک باشدا ویروم مسلمون اوز غمخواری
ایکی سین باهم آپار مقصده حَمیان اوسته
..
..
..
دولانوب بخت عبیدالهیلن سیر قضا
کوزه ده گتدی کسوک باشی ایوه بکر دغا
بیر قرانلوق اطاقی مسکن ایدوبدور قوناقا
بیله فکر ایلدی مهدور اولی خون شهدا
منتقم بیلمدی وار خون شهیدان اوسته
..
..
..
قوناقین قویدى قرانلوقدا او بی مایه و پست
بستر نازیده خواب ایتدی اوزی سرخوش و مست
بیر عیالی واریدی قائل قرآن و الست
هم صداقتلی حسینچیدی هم الله پرست
پاکبازیدی ره خالق منان اوسته
..
..
..
حالت بکر ایلمشدی اونی بی صبر و قرار
تلسوردی گوره تا کوزۀ پنهاندا نه وار
بکری ویردی یوخیا نیمۀ شب با دل زار
یریوب بارماقی اوستونده او سیمای وقار
یتوروبدور اوزینی کوزۀ پنهان اوسته
..
..
..
کوزه نون أورتوگینی ردّ ایلدی سرعتیلن
ال آتوب کوزه ده که قانلی باشا وحشتیلن
چخادوب باخدی بیر آز صورتینه رقّتیلن
مسلمی قانلی گوزیندن تانیدی دقتیلن
ناله سین قوزادی گردونۀ گردان اوسته
..
..
..
وای دیدی بخت نگونساریمه شیون وردی
اشک حرمانیله اوز دامنین ایسلاندردی
یرینه قویدی کسوک باشی یریندن دوردی
کوزه نون گتدی کنارینده چراغ یاندردی
رسمیدور لاله یانار لالۀ پژمان اوسته
..
..
..
بیر گوزل صحنۀ محنت یارادوب اوخشاماقا
کسیلن باشیوه جانیم دیدی قرباندی آقا
هانسی نامرد زمان ایتدی سنی غرق دما
لبلروندن چکلوب طاق دو ابرویه یارا
دیه سن قانلی سجاوندیدی قرآن اوسته
..
..
..
سوزی تز درک ایلیر عارف اولان ایمادن
یری وار بوردا یازام درد دل زهرادن
اوغلینون تاپدی خبر باشدا اولان غوغادن
دولدورب خولی ایوین نالۀ وا ویلادن
اود سالوب سوز دلی عالم امکان اوسته
..
..
..
آلدی آغوشه حسین باشینی یاندی ملدی
سیلدی زلفیله کولون گوزلرینون باخدی دیدی
نه یامان گونلره قویدی سنی دشمن ولدى
باشون اللرده قالوبدور بودا بیر مسئله دی
یاتموسان بستر خاکستر دونان اوسته
..
..
..
..
اوخشیوب سینه گلون سینه ده امّ النجبا
نه یاتوبسان دیدی آچ گوزلرون ای ماه لقا
گلمیشم باشوون اوسته گوزه لیم سینه یارا
دیله گل دردوی بیلدیر منه غیرتلی بالا
نیه خولى ایلیوب کوللری مرجان اوسته
..
..
..
عمر سرمایه میدون سن منیم ای روح صبور
نوریدن خلق ایلیوب پیکروی حیّ غفور
گلی گلشنده اوغول بَسلیَه نی یاخچی تانور
ندن آغوشه آلوبدور باشوی خاک تنور
قالوب عریان بدنون خاک بیابان اوسته
..
..
..
سنه جان جان دیوب آیلار بوئی من خسته جگر
قویمادیم ذرّه قونا صورتیوه گرد کدر
گور بو اندازه غمه هانسی آنا طاقت ایدر
کوللر اوسته قالا بیر باش که اونی بَسلیَه لر
باغبان گل بجرن مثلیده پستان اوسته
..
..
..
داغلوب صرصر ظلمیله دل آرا چمنون
اولوب اوراق قزل گل کیمی زیبا بدنون
قالمیوب من توخیان پیرهن اگنونده سنون
نه بیر امداد ایده نون وار نه ده ایوای دیه نون
زینب آواره گزر چوللری هجران اوسته
..
..
..
..
#مسلمیه #سیفی_اردبیلی #ترکی #زبدةالاشعار
نظر دهید