جریان منظوم باب الثعبان
معجزه عجیب شاه مردان مولا علی علیه السلام
.
✍️ زبدة الاشعار ✍️
.
?: @nohe_torki
.
سید بشیر حسینی میانجی
.
آللّها شکر اولا کی وئردی منه طبعِ روان
قلم آلدیم اله منظوم اولونا بیر جریان
«حارثِ اَعور» ائدوب بو خبری خلقه بیان
«اختیاری» کی گوزل مدح ائلیور مولانی
منه امر ائتدی کی چک نظمه بو خوش جریانی
.
بیر گونی عرشه ی منبرده اوتورموشدی علی
مسجد کوفه نی ائتمیشدی ایشیق، نور جلی
حمد و تسبیح ائدوب اوّلده خدایِ ازلی
باشلیوب خطبه سینی لحنِ مناجاتیله
یاد ائدوب حضرت پیغمبری صلواتیله
.
هیبتیله اوتوروب شیر کیمی شیرخدا
مستمع لر هاموسی مات باخوردیلا اونا
او خداوندِ خِطابه ائله دی خطبه ادا
خلق، حیرتده قالوب طرزِ بیانیندن اونون
توکولوب دُرّ و گُهر دُرجِ دهانیندن اونون
.
دیزلری اوسته اوتورموشدی چوخی پیر و جوان
ناگهان وارد اولوب مسجده بیر افعی ایلان
بورودی مجلسی باشدان باشا شور و هیجان
«باب ثُعبان» قویولوبدور او گیرن بابین آدی
باب، یعنی؛ قاپی، ثُعباندا همان اژدهادی
.
قورخولی اژدها باشی دَوه باشیجه اولار
گورسه هر کیمسه ائله منظره نی رنگی سولار
قورخودان٬ چوخلی مرَضلر دلِ انسانه دولار
گوردولر اژدهانی گرد و غباره بورونوب
دونمَدی صاقه صولا منبره ساری سورونوب
.
بعضی نین قورخودان اولموشدی سوزی «أمَّ یُجیب»
گلدی گلدی قاباقا ایله بیل انسانِ نجیب
دایانوب قویروغی اوستونده او حیوانِ عجیب
آپاروب آغزینی سَمعِ شهِ مردانه طرف
اژدهانین قولاق آسدی سوزونه شاه نجف
.
او زمان گوردی جماعت او امیرِ عربی
گورسَدوب قدرتیله اُمّته امرِ عجَبی
دانیشوب حیوانیلا مثلِ سلیمانِ نبی
نه دانیشدی هله قالسین بیلینَر سوزلردن
قییدوب گِئتدی او حیوان یوخ اولوب گوزلردن
.
هر گورن مؤمنین ایمانی چوخالدی او زمان
دئدی: «شکر اولسون آقامدان اولونوب معجز عیان»
ولی دشمن اورگی اولدی او اعجازیله قان
چوخالوب بُغض علی قلبیده بی شرم عدو
دئدی: «معجز دَییی جادودی وَ یا سِحریدی بو»
.
آقا، جمعیّته یوز دوتدی ائدوب بیله بیان
اژدهایی که گلوب مسجده گِئتدی بو زمان
جنّ لدن بیریسیدی بیلون ای پیر و جوان!
واریدی مشکلی چون گلدی سؤالین ائتدی
مشکلین حلّ ائله دیم آلدی جوابین گِئتدی
.
گلدی تا فصلِ خزانین چووروب یاز ائلیه
گلدی تا حجّت حق گورمه لی اعجاز ائلیه
گلدی تا فضلِ علی نی سیزه ابراز ائلیه
سیزدن او یاخشی تانور عالم معناده منی
اوزونه رهبر ائدوب هر ایکی دنیاده منی
.
دل لره دوشدی بو قصّه چاتوب حتّی شامه
ائشیدن دمده معاویّه دوشوب آلامه
حسدیندن گونوزی دوندی قرانلوق شامه
دئدی: قویمام قالا، بیر ایش گوررَم من ایله
«باب ثُعبانین» آدی تا دؤنه «باب الفیله»
.
معاویه امر ائله دی خادمی بیر فیل، آلوب
باب ثُعبانیده چوخ ظلمیله زنجیره سالوب
آج سوسوزدان یورولوب آخر او دیلسیز قوجالوب
ئولوسی قالدی او یئرده آلیشوب دیل قاپوسی
باب ثعبانه دیور بعضی اودور فیل قاپوسی
.
گورسَدوب دشمنِ دین، حقّه عداوتلرینی
آرتیروب حیدرِ کرّاره اذیّتلرینی
گیزله ده چوخ چالیشوب بلکه فضیلتلرینی
ولی بوندان بئله هریانی علی آدی دوتوب
نه بیزیم کشوری، دنیانی علی آدی دوتوب
.
ای علی شیعه لری! فخر ائلیون عزّتوزه
آرتیرون گون به گون اوز دیلده اولان همّتوزه
آفرین عزّتوزه، همّتوزه، غیرتوزه
گلمیوب گلمیجاق شیرخدانین مثَلی
او تک آللهه قسم خلقت آرا تکدی علی
.
یاعلی! اُول عظمتلی آدیوا قربانم
من نه مقدادم و نه قنبر و نه سلمانم
ولی بیر قاره قولام درگهیوه دربانم
آدیوی سسلنرَم جامه ی عزّت گییرم
دیلیمی دوغراسالاردا گنه آدون دییرم
.
یاعلی! نور دوعینه بیلوسن عشقیم وار
عاشقم شوریله شینه بیلوسن عشقیم وار
قلبیده اوغلون حسینه بیلوسن عشقیم وار
اونا تاپشور٬ بو حقیره اوزی ناظر اولسون
باشیم اوستونده ئولن وقتیده حاضر اولسون
.
منده بیر عمریدی که بزم عزایه گلورم
گه نصیبیم اولوری کرب و بلایه گلورم
هاردا روضه اوخونور آه و نوایه گلورم
بویور عبّاسیوه تا مجلس یاسیمه گله
بلکه آلله منی عفو ایلیه قطع اولموش اله
.
یاعلی! گل او زمان کی گلجاقدور اجلیم
جز سنون عشقون آقا! یوخدی منیم خیر عملیم
سیزدن اوزگه دوتان اولماز الیمی بوشدی الیم
اوغلون عبّاسه هامی یئرده نیازیم واردی
قطع اولان اللره محشرده نیازیم واردی
.
یاد ائدن وقته حسین اوغلوی قالمور صبریم
آغلیان گوزلریم اولموش منیم آغلار ابریم
قورخورام یادیمه دوشدوقجه قرانلوق قبریم
جامه ی مرحمتین سویماز حسینون بیلورم
قبر ائوینده منی تک قویماز حسینون بیلورم
.
ای بشیر! آغلا، حسین قلبی غمیله اویولوب
اوخلانان کؤینگی اگنیندن او شاهین سویولوب
جدّیون باخ غمینه قبره کفنسیز قویولوب
قاره کؤینکله٬ اقلاً دیء سنی کفن ائده لر
نعشیوی ائللرون آغلار گوزیله دفن ائده لر
.
#حیدریه_مدح
#آللها_شکر_اولا_کی_وئردی_منه_طبع_روان
#سیدبشیرحسینی
#ترکی
✍️ #زبدةالاشعار ✍️
?: @nohe_torki
نظر دهید