آل عبا یتیشدی چون کرب و بلا دیارینه #ورود_کربلا_راجی_تبریزی

ورود کربلا

.
.
مرحوم میرزا ابوالحسن راجی تبریزی
.
آل عبا یتیشدی چون کرب و بلا دیارینه
باتدیلا سربسر او دم محنت وغم غبارینه
.
.
یتجاق او سرزمینه یوز ویردی الم او سروره
عطف توجه ایلدی اوغلی علی اکبره
هم او گوزل گوزی باخوب قاسم و عون و جعفره
گوردی قونوب ئولوم توزی جمله سینین عذارینه
.
.
ایلدی چون مشاهده سرور دین بومطلبی
گوردی قدم گوتورموری سخت دوروبدی مرکبی
حکم ایلیوب که ساخلیون تخت روان زینبی
مسکن اولا بو چول گرک محنت و غم قطارینه
.
.
قویدیلا نوجوانلار اول دشته ازل قدملرین
بیر به بیر اندیروب حسین باجیلارین حرملرین
گتدیله احترامیله بانوی محترملرین
داخل اولوبلا هرکس اوز خیمۀ زرنگارینه
.
.
طایفۀ بنی اسد واقف اولوب بو قصّه دن
شاه مدینه ایلیوب کرب و بلا چولون وطن
گلدیله گورمگه اونی اهل قبیله مرد و زن
تا یتیشوبله اول زمان خدمت باوقارینه
.
.
گوردوله باشی اوسته بیر شیر دلیر عَلَم آچوب
غیظی وجود دشمن دینه ره عدم آچوب
بیر الینی عَلَمده اول سرور محتشم آچوب
بیر الینی قویوبدو هم قبضۀ ذوالفقارینه
.
.
گوردوله ساق طرفده بیر ماه لقا جوان دوروب
بس دیه سن کی یوسف مصر اؤزودور عیان دوروب
خم قاشی تک سالوبدور اوز کتفینه بیر کمان دوروب
تکیه ائدوبدی نازیله نیزۀ جان شکارینه

.
بیر بیرینه دییردیلر گور نه جمالی وار بونون
غنچه لبی قرا گوزی عارض آلی وار بونون
دور رخونده گور نئجه هاشمی خالی وار بونون
شانه ووروبلا تئل به تئل طرّۀ مشکبارینه
.
.
بیرده باخاندا گوزلری دوشدی جناب قاسمه
بادۂ عشقدن اولان مست و خراب قاسمه
اللره قان حنا یاخان قلبی کباب قاسمه
درد یتیم لیق آلان سینۀ داغدارینه
.
.
سویلدیلر باخون گورون واردی نه خوش ملاحتی
حسنده مجتبایه وار چوخلی بونون شباهتی
محو نگاه اولار گورن بیر بیله سروقامتی
دیدۂ دهر دوشمیوب بیله جوان عذارینه
.
.
گوردیله زینبی او دم زار و شکسته اگلشوب
دور و برینده اهلبیت دسته بدسته اگلشوب
بیرجه رقیه آدلی قز دیزلری اوسته اگلشوب
هردم الین چکر اونون طرّۀ تابدارینه
.
.
سویلراونا گل ای ایشی آه و فغان اولان قزیم
تیر غم و ملاله بو چولده نشان اولان قزیم
ظلمیله دستگیر اولوب شامه روان اولان قزیم
کنج خرابه ده فدا جانین ایدن نگارینه
.
.
دوتدی یوزین قبیله نین اهلینه شاه کربلا
تشنه کسلّله باشیمی بوردا گروه اشقیا
گوستروب اکبری دیدی بوردا همان بو مه لقا
دوغرانی بیحد اوخ دَیَر پیکر ناز و زارینه
.
.
لحظه به لحظه محنت و درد و غمیم مزید اولور
لیلی خیالی وصلده هجریله ناامید اولور
بوردا بو نوجوانلاریم جمله منیم شهید اولور
سیز گلون اول زمان قویون هر بیرین اوز مزارینه
.
.
چون ائشیدیب او طایفه نی کیمی ناله وئردیله
ساتدیلا کربلا یئرین جمله قباله وئردیله
ملکی غرض او صاحبِ جاه و جلاله وئردیله
وئردی اجازه گئتدیله جمله سی کار و بارینه
.
.
اولدی محرّمون اونی اهل قبیله با فغان
گوردیله عرشدن یاغار عالمه قطره قطره قان
بیلدیله کیم شهید اولوب تشنه او شاه انس و جان
اولدولا جمع گئتدیله کرب و بلا دیارینه
.
.
کرب و بلانی گوردولر آه و فغانیلن دولوب
باش کسیلوب سوسوز او قدر معرکه قانیلن دولوب
ایستی قوم اوستی پیکر تازه جوانیلن دولوب
صرصر ظلم کین اسوب فاطمه نون بهارینه
.
.
گون او گون اولدی دوشدیلر قانه باتان یارالیلار
اصلی مدینه لی اولان روحدہ کربلالیلار
گلدیله دفن و کفن ایچون جمعیله اول وفالیلار
یتدیله وادی غمین صحنۀ لاله زارینه
.
.
گوردیله اکبرین دولوب چشم سیاهی قانیلن
بسکه وروبلا کوفیان خنجریله سنانیلن
اهل قبیله سویلدی بیر بیرینه فغانیلن
تُف بو گروہ کوفه نین غیرت و ننگ و عارینه
.
.
هاشمی خالی نوجوان گوردیله پاره پاره دور
دوشموش او ماه پیکری باشدان ایاقه یاره دور
پیکری اوسته یاره لر بس دیه سن ستاره دور
باعث اولوب او فرقه نین دیدۂ اشکبارینه
.
.
اهل قبیله بیر شهی تاپماقا صاق و صول دوشوب
سمت فراتدہ گوروب قانیله بیرجه یول دوشوب
قان ایزینی دوتوب گیدوب گوردیله ایکّی قول دوشوب
تشنه سالوبلا صاحبین ظلمیله سو کنارینه
.
.
گوردیله قوملار اوسته بیر قانلو بدن سالوبدیلار
جسمینه سانه گلمین تیر جفا ساچوبدیلار
جمله لباسینی اونون اهل جفا سویوبدیلار
سایه سالوبلا قوشلار اول نعش بزرگوارینه
.
.
بوغم و بو مصیبته جملۀ خشک و تر یانار
سینه چکر زبانه هم جان اولی شعله ور یانار
اهل زمین و آسمان گور نجه سربسر یانار
بزم عزاده راجینین شعلۀ آہ و زارینه
.
.

#ورود_کربلا #راجی_تبریزی
#آل_عبا_یتیشدی_چون_کرب_و_بلا_دیارینه
#ترکی
.
.