اروجلوقدی اویان ای جان! بو آیدا #مناجات_حیدریه_سیدبشیرحسینی

اروجلوق آیی و مولا علی نین شهادتی
.
.
سید بشیر حسینی میانجی
.
.
اروجلوقدی اویان ای جان! بو آیدا
سنی دعوت ائدوب جانان بو آیدا
.
پذیرالیق ائده اؤز بنده سیندن
آچوبدور سفرۀ احسان بو آیدا
.
اولار کی قلبیدن ایمان گئتیرمیش
اولالار آللّها مهمان بو آیدا
.
بویورموش مصطفی «صُومُوا تَصِحُّوا»
اوروج دوت سالم اُول هرآن بو آیدا
.
چون احسان آیی دور، حق درگهینده
آچار ال سائل و سلطان بو آیدا
.
چتین دردی اولان آللّهی سسلر
تاپار اوز دردینه درمان بو آیدا
.
او کی فرصتلرین قدرین بیلَندی
ائدر مافاتینی جبران بو آیدا
.
ائدر یاردیم بیزه لوطفیله تانری
اوروج دوتماق اولار آسان بو آیدا
.
بو آی بیر امن و امنیتلی آیدی
نچون کی باغلانوب شیطان بو آیدا
.
جهنّمدن چوخون آزاد ائدیر حق
آچیلمیش روضۀ رضوان بو آیدا
.
علی نون اوّل اوغلی مجتبادی
گؤز آچدی اُول مه خوبان بو آیدا
.
اونون نوریله آی، گون خلق اولوبدی
اونا جانیم اولا قربان بو آیدا
.
شب قدرین بیلون قدر و مقامین
گلوب پیغمبره قرآن بو آیدا
.
گوناهون وار ائله توبه یقین بیل
باغیشلار خالق رحمان بو آیدا
.
بو آیدا شیعه لر یاسه باتوبلار
باتوب قانه شهِ مردان بو آیدا
.
اولوب آغ سقّلی قانیله الوان
گؤروب کیم لالۀ نعمان بو آیدا
.
سیزیلدار مسجد کوفه بو غمده
دولوب محرابینه القان بو آیدا
.
گؤرنده مرتضانی قانه غلطان
اولوب روح الامین گریان بو آیدا
.
امام مجتبانین قلبی یاندی
وئروبدور چون آتاسی جان بو آیدا
.
حسینون اللری قوینوندا قالدی
اباالفضل ایله دی افغان بو آیدا
.
آناسیز زینبین ئولدی آتاسی
اولوب نی لر کیمی نالان بو آیدا
.
آتا وای سسلنوبدور امّ کلثوم
وئروب جان حجّت سبحان بو آیدا
.
«بشیرا» نوحه یاز شیر خدایه
یازیلسا وار یئری دیوان بو آیدا
.
.
.
 #رمضانیه
 #حیدریه_حیدریه_شهادت #ماه_رمضان
 #اروجلوقدی_اویان_ای_جان_بو_آیدا
 #سیدبشیرحسینی
 #ترکی