الهی جام عشقندن دادیب مست و خمار اولدوم #حسینیه_هدایت_تبریزی

راز و نیاز امام حسین (ع) در قتلگاه
.
زبدة الاشعار
.
: @nohe_torki
.
هدایت تبریزی
.
الهی جام عشقیندن دادیب مست و خمار اولدوم
قرار عالمم اما وصاله بی قرار اولدوم
.
یرین قلبیمده دور ارنی نه لازمدور منه یارب
سنی هر وقفه ده گوردوم یولوندا جان نثار اولدوم
.
خطاب ارجعی نی گوزلورم امر ایلسن گللم
سنین فرمانیوه جانا ئورکدن انتظار اولدوم
.
دیسن ویر باشوی ، ویررم ندور باش صحبتی یا رب
گوررسن که گیچوب باشدان چخوب نیزه سوار اولدوم
.
یارا اوستن یارا دگسه سینمدن ایتمرم شکوه
غمیم یوخ قوم ادنانون آراسندا حصار اولدوم
.
یتوردوم عمرومی باشه جهاندا حسن عزتله
ستیز ظالمه چخدیم ولی مظلومه یار اولدوم
.
سنه مینلرجه شکر اولسون شهادت قسمتیم اولدی
یتشدیم فیض عظمایه کریما رستگار اولدوم
.
سنانون نیزه سی نحر ایلدی حلقومیمی الله
نفس تنگه دوشوب جنات عدنه رهسپار اولدوم
.
منی ئولدوردولر صبراً ئوزون شاهدسن ای خالق
وورولدی داش ، قلج ، نیزه ، داغلدیم تارو مار اولدوم
.
منی گرگان صحرای نواویس ایلیور پاره
بو آج درنده خو انسان نما خلقه شکار اولدوم
.
ملالیم چوخدی قلبیمده یارالی دلده چوخ داغ وار
بو قوم بی وفا و پست و خونخواره دچار اولدوم
.
بو قوم بد سیر ووردی آتامون باشنه ضربت
توکولدی قانی محرابه غمینده اشکبار اولدوم
.
حسن قارداشمین ایتدی بو امّت خیمه سین غارت
دایاندیم دینمدیم دوزدوم صبور و بردبار اولدوم
.
منی حیلیله چکدی بو جماعت بو بیابانه
الهی خوار اولا بو قومی که بو چولده خوار اولدوم
.
سن آلدون امتحان منده سنه خوش امتحان ویردیم
زر عشقیم محکدن خوش چخوب عالی عیار اولدوم
.
اباعبداللهم عمروم باشا یتدی عبادتله
اولوب چوخ گوندوزی صائم گجه شب زنده دار اولدوم
.
منه دنیانی تنگ ایتدی بو مین یوزلی منافق لر
اسارتدن ابا ایتدیم ملول و دلفکار اولدوم
.
منی دشمن مخیّر ایلدی سلّت له ذلّتده
باش اگموب ذلّته دشمنله عزم کارزار اولدوم
.
پیمبر بنذری اوغلوم علی اکبر قانا باتدی
گوروب دوغرانمش اعضاسین ئورکدن داغدار اولدوم
.
آتا گورسه اوغول جسمی داغیلمش گل کیمی یرده
تحمّل ایلمز ، ایتدیم تحمّل ، دیده تار اولدوم
.
قاباقندا بالام قان لجّه سینده ال ایاق چالدی
گوزوم گوردی ، ئورک یاندی ، ئوزوم زار و نزار اولدوم
.
بیر اکبر دردی کافیدی یخا هر صبرلی شخصی
سنین عشقین منه ویردی تسلی استوار اولدوم
.
یتیم لیقله بویا چاتمش بالام قاسم ده دوغراندی
سسین آلدیم پوزولدوم خیمه ده دل پرشرار اولدوم
.
وجودی آت ایاقیندن گوروب صدمه اوزانمشدی
بو بابتده آناسندان اوتاندیم سرمسار اولدوم
.
یوزی آی پارچاسی عبّاسیمین قان هالیه دوشدی
امیدیم قطع اولوب چارم کسیلدی خاکسار اولدوم
.
بلیم سندی ابوالفضلین یارالی باشینین اوسته
وزیریم ئولدی من باخدیم دچار انکسار اولدوم
.
باشین بیر حاله سالمشدی عمود آهن بیان اولماز
گوزوم گوردی ئورک یاندی آلشدیم شعله بار اولدوم
.
بو قوم فاجر و فاسق جفاده قویمادی نقصان
الیمده اصغر اوخلاندی ئوزومده زخمدار اولدوم
.
بیچیلدی اصغرین حلقی منیم اولدی قولوم یاره
یانیدی حرمله یاندیم غمیله سازگار اولدوم
.
الیم اوسته بالام چرپندی قان گیتدی گوزون یومدی
ئوپوب قانلی بوغازندان ئوزومده استتار اولدوم
.
امان صیاد بی رحم و ستمگردن امان اوخدان
بو داغلی قلبیمه دگدی بیری بی اختیار اولدوم
.
او اوخ دگدی قاباخدان سینه مه دالدان پری چخدی
چکوب تیری کورکدن گوز قارالدی بی محار اولدوم
.
آت اوستن تپراقا دوشدوم آچلدی یاره لر بیربیر
قانمدا ال ایاق چالدیم خمار وصل یار اولدوم
.
حسن قارداشمون عبدالّه اوغلی گلدی اول حالدا
سینمده قانینه باتدی او حاله سوگوار اولدوم
.
قولون بیر بی حیا ووردی قلم ایتدی قانی گیتدی
ئوزونی سینه مه سالدی اونیلا هم قطار اولدوم
.
سینم اوسته بیر اوخ گلدی بالامون آلنینا دگدی
قوتاردی جان دوداقندان جان اوسته غصه دار اولدوم
.
گیدنلر گیتدی من قالدیم منی گوزلورله انصاریم
منیمده گوءل دوروب قانیم انیس نوک خار اولدوم
.
جبینیم یاره ، ال یاره ، آغز یاره ، سینم یاره
بو حالدا ذاکر حمد و ثنای کردگار اولدوم
.
الهی شاکرم وردین شهادتدن منه عزّت
شهادت ملکونه حمد ایلورم که تاجدار اولدوم
.
بوراخدیم تاج و تخت عالمی دنیانی خوار اولسوم
گلوب شهر شهادتده عزیز و شهریار اولدوم
.
پیمبر سینه سنده پرورش تاپدیم چوخ عزتله
ولی جان اوسته داش نیزه اوخیلا یار و بار اولدوم
.
جبینمدن آخوب قان پردهء رخساریمی دوتدی
گل عمروم سولان وقته خوش اولدی گلعذار اولدوم
.
بو گودالی که دوشوم دار عشقم دور منیم حقا
اوجالدیم دار عشق اوسته اودور که پایدار اولدوم
.
ئوزوم پروردۀ عشقم پریشان اولمارم اصلا
پریشان پیکرم افتادهء پروردگار اولدوم
.
(هدایتدن) حمایت ایلرم اولسا دوز عاشق گر
یازلسین شعری ناب اولسون اوخونسن عهده دار اولدوم
.
.
#حسینیه_هدایت_تبریزی
#حسینیه_شهادت
#الهی_جام_عشقندن_دادیب_مست_و_خمار_اولدوم
#ترکی
.
زبدة الاشعار
.
: @nohe_torki