شهادت حضرت زهرا (س)
.
#زبدةالاشعار
: @nohe_torki
.
مرحوم رجایی تبریزی
.
اولدى اون سگز یاشندا دینه قربان فاطمه
غسلی مخفی دفنی گزلین قبری پنهان فاطمه
.
.
غصب اید وبلر حقّ مشروعین گروه مشرکین
مهربانی بیر علیدی ایتدیلر خانه نشین
آز زماندا دردیله دولدی او قلب نازنین
آختاروردی دردینه هر لحظه درمان فاطمه
.
.
گوردی ظلم اشقیا دوندردی شامه گوندوزون
چاره سیز قالدی گیدوب خلقه تانیدیرسون اؤزون
بیلدی وقته اقتضا واردور یتوردی حق سوزون
چکسون اول باطل لر اوسته خط بطلان فاطمه
.
.
مقصدی هرگز دگلدی باطنأ ملک فدک
نیلوری دنیانی اول مخدومۀ حور و ملک
گوردی موضوع فدک منظورینه ایلر کمک
باشلادی غصب فدکدن ایتدی عنوان فاطمه
.
.
حی داور نامینه بیر خطبه ایراد ایلدی
بعد آتاسی حضرت پیغمبری یاد ایلدی
منحرف خلقی صراط حقه ارشاد ایلدی
پیروان دینه ویردی درس قرآن فاطمه
.
.
دین اسلامین شئوناتین ایدوب خلقه بیان
حق سوزیله اهل ظلمین قلبینه ویردی تکان
تحت تأثیره گلوب بیر عدۀ پیر و نوجوان
ائتدی مظلومیتین دنیایه اعلان فاطمه
.
.
چوخ شجاعتله خانم توبیخ ایدردی دشمنی
ذکر ایدوب قرآن دن نچه مناسب آیه نی
سویلدی آخر بابام تاپشورمادی آیا منی
ای جماعت چوخ تئز اولدی چخدی یاددان فاطمه
.
.
قورتاران جهل و جهالتدن پیمبر دور سیزی
اهل اسلامه هدایت ایلدی هر دین سیزی
وار نه علت قویموسوز ایوده قالاق راحت بیزی
نیلیوب آیا سیزه بو دیده گریان فاطمه
.
.
عترتین یوخسا بیله تاپشوردی ختم الأنبیا
بولموسوز ای بی وفالر بو دگل رسم وفا
قویمادوز پیغمبرین باری عزاسی ختم اولا
نیلسوز گورسه اولوب بیله پریشان فاطمه
.
.
هر قدر ظالم لرین ظلمین دیوب ایتدی گله
اولمادی هرگز مؤثر اهل شرک و باطله
بو اسفلی حالیله دوردی قایتدی منزله
چولقیوب رخسارینه آثار حرمان فاطمه
.
.
حقینه ظاهرده گرچه چوخلار اقرار ایلدی
وئرمیوبلر خوش نتیجه هرنه اصرار ایلدی
گتدی اوز درد دلین انصاره اظهار ایلدی
حقّینه ایتدی اقامه نچه برهان فاطمه
.
.
حق سوزین تأثیری وار تأثیر ایتدی دشمنه
حقینه فرمان آلوب چخدی یتشدی ایمنه
آلدی ایکاش آلمییدی وای منه ایوای منه
یوز قویوبدور منزله دلشاد و خندان فاطمه
.
.
یولدا اولدی بیر ستمگر ظالمیله روبرو
دستخطین باره سینده باشلیوبلر گفتگو
ایستدی آلسون خانمدان مدرکین اول کینه جو
امتناع ایتدی دایاندی سینه سوزان فاطمه
.
.
بیلمورم نه ظلم ایدوب ای حجت ارض و سما
حامله بیر عورته بو ظلمی گورمزلر روا
ظلمه باخ یابن الحسن زهرا هارا سیلی هارا
اولدی ناگه صورتی قانیله الوان فاطمه
.
.
حجت الله چوخ جفالر ایتدی زهرایه عدو
اؤز آتاسیندان صورا چوخ غمله اولدی روبرو
باخمیوب لر بضعةٌ مِنّی دییَن زهرادی بو
بسلنوبدور سینۀ طاهاده هر آن فاطمه
.
.
سیل تک اشگین توکوب اوج ایتدی عرشه شیونی
سجدیه باشین قویان دمده او عصمت معدنی
عرض ایدردی بارالها لطف ایله قورتار منی
تیز اولار راحت نقدری تئز ویره جان فاطمه
.
.
مستجاب ایتدی دعاسین خالق کون و مکان
گون به گون اولدی وجودی چوخ علیل و ناتوان
وقت اولوب جان تاپشورا جانانینه جان جهان
صاق صولا حسرتله باخدی فخر نسوان فاطمه
.
.
عرض ایدردی گل عم اوغلی فاطمه قربان سنه
وقت هجرانیم یتشدی گلمه داد و شیونه
گل باشیم اوستونده اگلش بیر اوخی قرآن منه
سن بولورسن کیم سُؤَر چوخ صوت قرآن فاطمه
.
.
جان وئروب قورتولدی محنتدن او بانوی جهان
خاندان مصطفانی دولدوروب داد و فغان
ایستدی غسلین ویره اول شهریار انس و جان
تازیانه یرلرین ائتمیشدی کتمان فاطمه
.
.
نه گوروب وار قوللاریندا تازیانه یاره سی
جوش ایدوب داشدی علینین صبرینین پیمانه سی
نقل ایدر راوی اوجالدى مرتضانین ناله سی
حقى وار جان تاپشوروب مجروح نالان فاطمه
.
.
وئر دی رخصت گلدی تودیعه حسینیله حسن
زینب و کلثوم آچدی باشینی بیر سمتدن
بیر نمونیدی او ساعت شور رستاخیزدن
انبیا و اوصیانی قویدی حیران فاطمه
.
.
ساکنان خلد رضوان شرکت ایتدی ماتمه
حیّ داوردن گلوب فرمان امیر عالمه
یاعلی قویما حسینیله حسن باتسون غمه
بو مقدّردور اولا جنّتده مهمان فاطمه
.
.
مدت عمرینده اولدی هر بلایه مبتلا
اود وروب درگاهینی یاندیردی قوم اشقیا
بیر رجائیله دایاندی دوزدی تا روز جزا
بو گنه کار امتی قورتارسون اوتدان فاطمه
.
.
#فاطمیه_رجایی_تبریزی
#فاطمیه_شهادت
#اولدى_اون_سگز_یاشندا_دینه_قربان_فاطمه
#ترکی
.
#زبدةالاشعار
: @nohe_torki
نظر دهید