اوگون که ظلم اودینا یاندی مصطفا قاپوسی #فاطمیه_صحاف_تبریزی

سوختن درب خانۀ پیغمبر و اشاره به مقام حضرت حسین (ع)
.
#زبدةالاشعار
.
: @nohe_torki
.
مرحوم صحاف تبریزی
.
اوگون که ظلم اودینا یاندی مصطفا قاپوسی
او اوددان آلدی شرر یاندی هر وفا قاپوسی
.
پیمبرین قاپوسی ظلم الیله باغلاندی
آچلدی عترتنه هر غم و بلا قاپوسی
.
على ولى خداوند اولدی خانه نشین
نه تک علی قاپوسی باغلانوب خدا قاپوسی
.
اوجالدی شعلۀ آهی سپهره زهرانون
چکنده شعله شهنشاه اولیا قاپوسی
.
ویریلدی جعده ی بی شرم الیله زهر جفا
یانوب جگرلری باغلاندی مجتبا قاپوسی
.
بنی امّیه گوروی سدّ راه مقصودی
حسین دور قاپوسی مأمن و رجا قاپوسی
.
امیدیله گلنى نا امید قیترمز
گورونمیوبدی جهاندا بیله سخا قاپوسی
.
عزیز فاطمه باب نجات امّتدور
آچقدی درگه حق تک او مقتدا قاپوسی
.
یزید شامده آچدی خزانه نون قاپوسین
که بلکه باغلانا مظلوم کربلا قاپوسی
.
بیله بُلوردی او بیشرم اگر حسین ئولسه
جهاندا باغلاناجاق عصمت و حیا قاپوسی
.
ولیک بولمه دى توحید مشعلى سونمز
آچلسا مینلریله کفردن جفا قاپوسی
.
حسین شهید اولى دین أوسته تشنه لب قویماز
شریعتین قاپوسین باغلیا خطا قاپوسی
.
جوانلاریندان اودور گیچدی، قویمادى قالسون
که آشنا یوزینه باغلی آشنا قاپوسی
.
خلیل آپاردی ذبیحین منایه گلدی عوض
آچلمادی یوزینه لیک مدعا قاپوسی
.
شکفته لندی قزل گل کیمی جمال حسین
آچلدی آینه ی قلبنون جلا قاپوسی
.
خدنگ حرمله نی دلده ایتدی استقبال
آچوب معالم توحیده بیر ثنا قاپوسی
.
دئدی رضاً بقضائک جواب گلدی حسین
سنه آچقدی بو گون خالقون رضا قاپوسی
.
او اوخ که قلبوه دگدی محبّتمده منیم
آچوب سنون یوزیوه مجلس لقا قاپوسی
.
در خزینه ی اسراریم اولدی لختۀ خون
خزانه نون اولا لازمدی پربها قاپوسی
.
منیم یولومدا بو گون سن بیر امتحان ویردون
او امتحانه آچلمازدی انبیا قاپوسی
.
تمام ما ملکوندن سن ال چکوب آچدون
ازلده ایلدیقون عهدیوه وفا قاپوسی
.
مقابلنده حبیبیم بو خدمتون آچارام
سنون گوزل یوزیوه منده بیر بقا قاپوسی
.
اولار همان قاپونین جبرئیل دربانی
گرک مشخص اولا دینه پیشوا قاپوسی
.
سنون قاپوندان ایدر گون همیشه کسب شرف
جهان و اهل جهانه آچار ضیا قاپوسی
.
اوجالدارام ایله عالمده شأن و شوکتوی
اولار گوزل حرمون عرشدن علا قاپوسی
.
او آستانیه سورتر یوزین شهنشه لر
که بلکه یوزلرینه باغلانا بلا قاپوسی
.
سنون قاپووا گلنلرنه ایسته سه ویرّم
سنون قاپوندی بو درگاهمون دعا قاپوسی
.
مین اوچ یوز ایلدی یتوب قتله سیدالشهدا
هنوز آچقدی او شاهنشهون عطا قاپوسی
.
طواف کعبه دن افضلدی قبرینون شوطی
در بهشتیدی اول صحن باصفا قاپوسی
.
نه کعبه، کعبه او قبریله افتخار ایلر
نه صحن، صحنه ی خونین نینوا قاپوسی
.
او قبر چوخ متوکللری ایدوب نابود
آچوبدی یوزلرینه ذلت و فنا قاپوسی
.
گر اولسا مشگلی هر کیمسه نون حسینه دیسون
حسین قاپوسیدی خلّاق کبریا قاپوسی
.
حسین تربتی دور درد بی دوایه دوا
نیازمندلره حق آچوب شقا قاپوسی
.
حسیندی محیی احکام شرع پیغمبر
حسینیله تانیوز جدّی مصطفا قاپوسی
.
حسین عزا علمین اوج عزته وردی
آچلدی شیعه لره ناله و بکا قاپوسی
.
قیامته کیمی باغلانمیوبدی باغلانماز
عزیز فاطمه نون مجلس عزا قاپوسی
.
او شه که خالقه منظور اولا عزاسی اونون
نه نوعی باغلانی بو تعزیت سرا قاپوسی
.
غلام درگه شاه شهید سن صحّاف
سنه آچقدى حسینون او دلگشا قاپوسی
.
نه ایسته سن ویره جاق شاه دین محال دی بو
که نوکرین یوزینه باغلانا آقا قاپوسی
.
.
#فاطمیه_صحاف_تبریزی
#فاطمیه_شهادت #حسینیه_حسینیه_مدح
#او_گون_که_ظلم_اودینا_یاندی_مصطفا_قاپوسی
#ترکی
.
#زبدةالاشعار
.
: @nohe_torki