وداع اهلبیت (ع) از قبر حضرت رقیّه (س)
..
..
..
..
مرحوم کریمی مراغه ای
..
..
..
..
اوگون ایستردی آیریلسون او محنت خانه دن زینب
ایشیتدی بو صدانی گوشۀ ویرانه دن زینب
..
..
..
..
اولوبدور منزلیم ویرانه عمّه گیتمه من قالدیم
قالور گیسولریم بی شانه عمّه گیتمه من قالدیم
..
..
..
..
گیدیرسوز یثربه یار اولماقا خویش و تباریله
سعادت اولمادی منده گیدیدیم بو قطاریله
نجه همراه اولا بوللم ایاقیمده قاباریله
دونوبدور گوز یاشیم آلقانه عمّه گیتمه من قالدیم
..
..
..
..
وطن شوقی اورکلرده خلاص اولدوز اسارتدن
منی قویدوز بو غربتده کباب اوللام بو حسرتدن
قویوب تک یولداشی گیتماق دگول شرط رفاقتدن
چوخ اینجیتدیم که دویدون جانه عمّه گیتمه من قالدیم
..
..
..
..
او قدری ووردی شام اهلی یارالی قلبیمه یاره
شماتت اوخلاریندان داغلی قلبیم اولدی صدپاره
اوزون تاپشورگلان چکسونله باری قبریمه قاره
اولا جبران همان عصیانه عمّه گیتمه من قالدیم
..
..
..
..
گیدیرسن ایمدی که گوزدن منی بیر دفعه لیق آتما
گوزیمی قویما یوللاردا منی هجرونده آغلاتما
قیت گل شامده باهم یاتاخ منسیز بی بی یاتما
پرستار اول من نالانه عمّه گیتمه من قالدیم
..
..
..
..
محبت جامه سین عمّه دل مجروحدن سویما
آنام آه و فغانیمدن داریخسا دویسا سن دویما
آپار قوی اهلبیتی گل منی غربتده تک قویما
دونر بو گوز یاشیم مرجانه عمّه گیتمه من قالدیم
..
..
..
..
قالوب ویرانه ده ویران اولان قلبه صفا ویررم
مریضه افلجه هر چاره سیز درده دوا ویررم
آچوب دارالشفا لطفیله زواره شفا ویررم
اولار ویرانه داروخانه عمّه گیتمه من قالدیم
..
..
..
..
بو پوزقون قبریدن آهیم وورار اود عرش اعلایه
فلک آخر منی ویردی یزید شومه همسایه
دوشر روحیم بابامین قاتلین گوردوخجا ایذایه
گلر محنت لریم طغیانه عمّه گیتمه من قالدیم
..
..
..
..
گیدون سیز یثربه همراه اولون اهل وفائیله
وطنده ایل قبیله دوره زی آلسون صفائیله
قالوم من گوشۀ ویرانه ده شور و نوائیله
توکوم هی گوز یاشین دامانه عمّه گیتمه من قالدیم
..
..
..
..
باجیم صغرا آنام ام البنین دوتسا خبر مندن
دینه دست جفا دردی اونی گل تک بو گلشندن
قوری یرلرده آج جان ویردی استبداد دشمندن
قالار دیللره بو افسانه عمّه گیتمه من قالدیم
..
..
..
..
گرک دائم اوجالسون نالۀ صبح و شبانگاهیم
یانقلی دلده نفرینیم یارالی سینه ده آهیم
گوراخ نیلر یزید کافره آخرده اللّهیم
یتر بو ظلم لر پایانه عمّه گیتمه من قالدیم
..
..
..
..
او یاتسین بالش ناز اوسته پر قو نرم بسترده
غلامان و کنیزان اندرون بیرون سراپرده
رقیّه کهنه پیراهنله دفن اولسون قرا یرده
اونون عشرت منیم غمخانه عمّه گیتمه من قالدیم
..
..
..
..
یانار احوالیمه قلبون یتیمه بیر بالا گورسن
دوشر بو آجلقیم یاده گوارا بیر غذا گورسن
سالارسان یاسیمی یاده محقّر بیر عزا گورسن
گلرسن روز و شب افغانه عمّه گیتمه من قالدیم
..
..
..
..
گلستاندا سولان بیر غنچه نی گورسن خزان وقتی
قاپودا بوینی چگنینده یتیم گورسن اذان وقتی
گتور یاده یوزیمه کیپریگیم ایوای یازان وقتی
سیزیلدا آغلا یانه یانه عمّه گیتمه من قالدیم
..
..
..
..
سارالمیش گللری گورسن چمنده یاد ایله مندن
سالاندا اؤوچی بیر آهو کمنده یاد ایله مندن
آنایه هر بالا آجَم دینده یاد ایله مندن
یانوب اودلاره دویدوم جانه عمّه گیتمه من قالدیم
..
..
..
..
یتیشدون ساحله گرداب غمدن ای منیم نوحیم
گیدون اللهه تاپشوردوم دعاگودور سیزه روحیم
رضا ویرمور ولی هجرانوزه بو قلب مجروحیم
اورک دوزمز غم هجرانه عمّه گیتمه من قالدیم
..
..
..
..
شیرین دل بیر بالا گورسن دینن شیرین دلیم لای لای
قانادی باغلی قوش گورسن دی یورقون بلبلیم لای لای
حسینه سوگلیم لای لای بالام لای لای گلیم لای لای
شبیه ایت اشکووی بارانه عمّه گیتمه من قالدیم
..
..
..
..
«کریمی» بو رقیّه محنتی سرلوحۀ غمدور
گورنلر قبرینی گویا دیوللر اوزگه عالمدور
دیوللر بو زبانحالی قبرینده مجسّمدور
که سویلور زینب نالانه عمّه گیتمه من قالدیم
..
..
..
#کوچ_شام #کریمی_مراغه_ای #ترکی #زبدةالاشعار #حضرت_رقیه_شهادت #حضرت_رقیه_کریمی_مراغه_ای #حضرت_رقیه
نظر دهید