آوردن امام(ع) نعش فرزند دلبندش
خطاب به حضرت زینب (س)
..
..
مرحوم رجایی تبریزی
..
..
اکبریم دینی مقدّم دوتدی دنیادن باجی
عشق حق مجنون ایدوب ال چکدی لیلادن باجی
..
..
دین حقّ اولدی مجسّم دیدۀ حق بینینه
گوردی اشرار ایستوری صدمه یتورسون دینینه
نفسنی قربان ایدوب اوز مذهب و آئینینه
اولماسون شرمنده تا اوز جدّی طاهادن باجی
..
..
عاشق اولسا دینه هر کس باش و جانیندن گیچر
عزّت دنیانی بوشلار خانمانیندن گیچر
هانسی عاشق اوز حیات جاودانیندن گیچر
اکبریم دنیانی دوتسون گیچسون عقبادن باجی
..
..
بیر نفر عاقل تاپولماز دینی دنیایه ویره
پُربها درّی اَلیندن مفت یغمایه ویره
گر تاپولسا بیر نفر اعلانی ادنایه ویره
عاقبت بیرگون پشیمان دور بو سودادن باجی
..
..
اکبریم دین اوسته دنیادن ایدوب صرف نظر
بولدی بو صرف نظرده واردی بیر عالی ثمر
روز محشر اوندا که سسلر هامی اَیْنَ المَفَر
بیر امان نامه آلار خلّاق یکتادن باجی
..
..
گوردی آز قالدی ویره یغمایه دینی مشرکین
فکره دوشدی سرنگون ایتسون او کفرین پرچمین
چوللره دوشدی باشندا شورله سودای دین
جان ویروب حفظ ایلیوب دور دینی یغمادن باجی
..
..
اهل کفره آندوروب دور قیمت مذهب ندور
دین یولوندا ارزش دنیا ندور منصب ندور
جادّۀ حقدن چخانلار آنلاسون مطلب ندور
ایلدی کشف حقیقت بو معمّادن باجی
..
..
بیر شجاعت بیر شهامتله ایدوب دعوا بوگون
تنگ اولوب اعدای دینه عرصۀ هیجا بوگون
سسلدی قوی سربلند اولسون آنام لیلا بوگون
نغمۀ تحسین اوجالدی عرشه اعدان باجی
..
..
ضرب و شستین گوردولر شام اهلی حیران قالدیلار
لشکری اِغوا ایدوب سعد اوغلی دورین آلدیلار
دلده یارا یوخ دیم نه نوع آتدان سالدیلار
گوندوزوم تیره اولوب دور لیل یلدان باجی
..
..
باخمادی منقذ سکینه آغلوری قارداشنه
لیلینون رحم ایتمدی گوزدن آخان گوز یاشنه
ووردی ضربت کینیله شبه پیمبر باشنه
گورسنوب شقّ القمر اول ماه سیمادن باجی
..
..
باش قلیجلاندی اولوب مه صورته قانی روان
معجز شقّ القمر اولدی بو صحراده عیان
ویردی احسن و جهله الله یولوندا امتحان
دست خالی اولماسون سعی و تقلّادن باجی
..
..
اهل کوفه باخمادی دیلدن دوشوب گلمور سسی
اوخ آتان رحم ایتمیوب ووردی گینه اوخ یاره سی
نعشنی یغدوم عبایه اولمادی هیچ چاره سی
علّتی واضحدی بو صد پاره اعضادن باجی
..
..
سسلدی داده منی اشکیم گوزومده قان اولوب
پیکرین تاپدوم نه گوردوم خاکیله یکسان اولوب
باغریما باسدوم ئوپَم سینم یوزوم الوان اولوب
دیزده قوّت قالمادی دوشدوم توانادن باجی
..
..
صخرۀ صمّایه پوزقون حالیتم ایتدی اثر
ایتمدی شام اهلی امّا سوز آهیمدن حذر
صبر قیلدوم همّتیله باغلاردیم محکم کمر
دشمنی حیرتده قویدوم بو شکیبادن باجی
..
..
وضع حالیم ایلدی تأثیر قلب دشمنه
نوجوان داغنده هرگز گلمه موشدوم شیونه
سعدون اوغلی بیر شماتت ایلدی امّا منه
گوزیاشیم آخدی یوزه بو جور و ایذادن باجی
..
..
باخمادی قلبیم یانوب تازه جوانیم جان ویروب
گل کیمی اوراق اولوب یرده وجودی قان ویروب
بیر ایله وقته منه اوغلانلارینی سان ویروب
چکمدی هرگز خجالت حیِّ اعلادن باجی
..
..
باغریمی قان ایلدی طعن و شماتتدن امان
نه دیوم نه حاله قالدوم من او حالتدن امان
خوشدی خنجر اوخ یاراسی بو جراحتدن امان
دیل یاراسیله منی قِیْتَردی قَتْلادن باجی
..
..
ویر خبر آچسون باشین بو غمده یکسر عتریتم
وار نه حالیم یوخ داخی شرح و بیانه قدرتیم
اکبریم گیتدی اونیله گیتدی دیزدن طاقتیم
اود دوتوب قلبیم یانور بو امره معنادن باجی
..
..
ایلدی اوغلوم علی اکبر عجب همّت بوگون
جان بهاسیله اَله گلدی بو حرّیت بوگون
انبیایه فخر ایدر پیغمبر رحمت بوگون
خوش نتیجه اولدی بو صغرا و کبرادن باجی
..
..
نظمیله اوغلوم «رجائی» یازسا کیفیّت ندور
هامّی آنلار ئولماقا بو طرزله علّت ندور
بوسوزه الحقّ وَالانصاف گور قیمت ندور
عشق حق مجنون ایدوب ال چکدی لیلادن باجی
..
..
..
#اکبریه #رجایی_تبریزی #اکبریه_شهادت #ترکی #زبدةالاشعار
نظر دهید