زبانحال امام حسین (ع) در بالین برادر
..
..
مرحوم تائب تبریزی
..
..
ای آتام اوغلی دیزیمده طاقتیم قارداش اویان
دور بئلیم سیندی بوکولدی قامتیم قارداش اویان
..
..
آچ گوزون گوزدن کمک سیز قارداشون آتما بیله
آشناوی ، آشنا بیگانیه قاتما بیله
دور بو قانلو توپراق اوسته نازیله یاتما بیله
ای قتیل قوم ذلّت عزّتیم قارداش اویان
..
..
ای منیم آرخام ائلیم، پشت و پناهیم یوخ منیم
نا امیدم بی کسم، امّید گاهیم یوخ منیم
دادخواهیم ، قالموشام تک، دادخواهیم یوخ منیم
ای زمان وحدتیمده کثرتیم قارداش اویان
..
..
ای دوتان آی تک جمالون ابرسا خونین شفق
وی ایدن بو گوزلریمده گوندوزی لیل غَسَق
لوءلوء تر دور جبینونده و یا قانلو عرق
قان بولوتدا مستتر مه طلعتیم قارداش اویان
..
..
پیکرون باشدان ایاقه یاره دور یوخدور سانی
کربلانی جویبار عشق ایدوب زخمون قانی
قامت سروون یخوبلار قول بوداقون بس هانی
قالموش آغلار قمریان عصمتیم قارداش اویان
..
..
ظاهراً جسمونده هر اوخ یاره سی بیر گل آچوب
باطناً اما هر اوخ بو سینه مه بیر اوخ ساچوب
سینه داغلی گلموشم من قانلو قاتل لر قاچوب
گل دله ای خوش بیان خوش صحبتیم قارداش اویان
..
..
ای سپهر هاشمی ده صورتی بدر تمام
باشون اوسته گوندوزی اولموش گونون لیل ظلام
خیمه لرده ایمدی لشگر گوزده اشگ اللرده جام
سو یولون گوزلوله عطشان عترتیم قارداش اویان
..
..
سن دگولدون صولتون سالمیشدی خوفه دشمنی
سن دگولدون من بو صحرا ده رجا بولدوم سنی
بس ندن دشمن لر ایچره بیله تک قویدون منی
ای شجاعتلی غضنفر صولتیم قارداش اویان
..
..
دور آتام اوغلی بو چولده شورش و غوغانی گور
دولدوروب نالم نئجه بو غمفزا صحرانی گور
ساق صولومدا ازدحام لشکر اعدانی گور
کثرت دشمنله واردور وحدتیم قارداش اویان
..
..
من حسینم چوخ منه ناز ایتمه آچ قانلو گوزون
گل دیله ایله بیان وار دلده هر گیزلین سوزون
قوی دیزیم اوسته باشون بیله یره سوتمه یوزون
قویما آرتسون دلده درد حسرتیم قارداش اویان
..
..
سن بو گون قانه باتوب عالی مرامه چاتموسان
ای یارالار یورقونی قان ایچره یورقون یاتموسان
یاتموسان بی کس حسینیم بختینی یوخلاتموسان
ای وفا پرور شریک محنتیم قارداش اویان
..
..
گر چه واردور ای یارالی جسموین چوخ یاره سی
یوخ سانی نه اون نه یوز وار حددن آرتوخ یاره سی
باغریمی قان ایتدی اما آنّوین اوخ یاره سی
اسگیلوب دلدن توان و طاقتیم قارداش اویان
..
..
غملو گوگلوم لحظه ده مین جام خون دل ایچر
قالموشام نه حاله قارداشی ئولن اولسا سئچر
هانسی شاهنشه سنون تک سر سپاهیندن گیچر
ای سپه سالار صاحب سطوتیم قارداش اویان
..
..
بو بلالی چولده بیر سنسن منیم آرخام ائلیم
گیتدون الدن یاندی نار درد و حسرتله دلیم
نا امید اولدوم حیاتیمدن داخی سیندی بئلیم
طاقتیم روح روانیم قدرتیم قارداش اویان
..
..
سن شهید اولدون یتیشدی اهل کوفه ایمنه
من وحید اولدوم آچیلدی فتح بابی دشمنه
سن یخیلدون من یخلدیم دشمن ال تاپدی منه
تاپدی جرأت دشمن بی جرأتیم قارداش اویان
..
..
سن شهید اولدون لب عطشان ای علمدار دلیر
اول قدر گئچمز بو صحراده قالار باشسیز امیر
نازنین اطفالیمی اهل جفا ایلر اسیر
ای رشادتمند صاحب غیرتیم قارداش اویان
..
..
سن یخلدون بیرده مقصوده چاتانماز قیزلاریم
بو سوسوزلوق حسرتین دلدن آتانماز قیزلاریم
سن که یاتدون بیرده آسوده یاتانماز قیزلاریم
دل پریشان اولدولار جمعیّتیم قارداش اویان
..
..
سن یخلدون کامه اونلار که چاتانمازدی چاتار
فکر سهم و صولتون دلدن آتانمازدی آتار
گورخودان هانسی گوز آسوده یاتانمازدی یاتار
کامه یتدی دشمن بد فطرتیم قارداش اویان
..
..
سن دگولدون بو کمک سیز شهریاره دادخواه
من پناه عالمم گتدیم سنه بو گون پناه
دور آلوب اطرافیمی ایمدی بو سنگین دل سپاه
ای منیم امیّد فتح و نصرتیم قارداش اویان
..
..
صبریمی بیر منظره الدن آتام اوغلی آلوب
اللرون ای شیر پنجه فرقة روبه سالوب
دور منیمده اللریم حسرتله قوینومدا قالوب
بار محنتدن خم اولموش قامتیم قارداش اویان
..
..
«تائبا» اولسان موید سوز اولار جاری اوزی
سوز موید دلدن آخسا آغلادار هر بیر گوزی
دفتر غمده حسینون قولوجا یاز بو سوزی
ای آتام اوغلی دیزیمده طاقتیم قارداش اویان
..
..
..
#عباسیه #تائب_تبریزی #عباسیه_شهادت #ترکی #زبدةالاشعار
نظر دهید