ای امام منتظَر ای چرخ دینه آفتاب #مهدیه_سعدی_زمان

یا مهدی
گریزبه راه شام
.
زبدة الاشعار
.
?: @nohe_torki
.
مرحوم حسینی سعدی زمان
.
ای امام منتظَر ای چرخ دینه آفتاب
منتظِرلر جانه گَلدی، قیل ظهورونده شتاب
.
.
اَلاَمان، اَلغَوث، عَجِّل یَابنَ اَعلامِ الهُدی
تیز یتیش فریاده، اَدرِکنا اِمامُ المُقتَدی
سن او وجه حق سن ایله لّر توجّه اولیا
سنسن اللهین عطا و رحمینه مفتوح باب
.
.
هارداسان ای گون کیمی غیبت حجابینده قالان
هارداسان ای خرمن اعدایه تیغی اود سالان
هارداسان ای کربلا مظلومینون قانین آلان
تا به کی دوتسون رخ مهر جهان تابی سحاب
.
.
ای شه ذُوالیَد، هامی دنیا آنان زهرایه مَهر
ایتموسن مُلکوندن آیا خلع یَد، بِالمرّه قهر؟
ای حقیقی منتقم، یابن الحسن، ناموس دهر
تاج و تختوندن اولوب بیگانه کسلر کامیاب
.
.
ای ولیّ دم حسینه، پورِ خونریزِ علی
گَل عیان ایت مَن قُتِلده انتقام مُنزَلی
آستینده تا به کی قالسون نهان الله اَلی
انتقامه ایلیوب شاها سنی حق انتخاب
.
.
پرده ی غیبتده شاها ایلمه تاخیر چوخ
جدّون احوالی ایدوبدور بیزلری دلگیر چوخ
بو مصیبت لر سنه بیزدن ایدر تاثیر چوخ
آلمیونجا انتقامین قلبون ایلر اضطراب
.
.
ای خدای لایَزالین اون ایکیمجی حجّتی
بیر بیله تاخیریوین وار بُلمورم نه حکمتی
جدّیوین یاددان چخا هیهات مظلومیّتی
دللری بو آتش ایلر سیخ محنتده کباب
.
.
هاردا سرگردان گَزورسن ای امام ممتحن
یاد ایدوب جدّون توکورسن گوز یاشی رخساره سن
گَل اماندور گَل او آغلار گوزلرون قربانی من
اولما راضی بیزلره چوخ طعنه وورسون شیخ و شاب
.
.
آل اطهاره ایدوبلر چوخ جفا اشرار شام
ایلیوب امّا سنون صبحون جفای شام شام
عاجزم تقریرینه من عرض ایدوم بیر بیر تمام
ایلوسن امّا اوزون اوز جدّیوه بیله خطاب
.
.
ایتدی یا جدّا سنون اطفالیوی اعدا اسیر
اهل بیتون قول کیمی اشراره اولدی دستگیر
حلقه ی زنجیریله باغلاندیلار خُرد و کبیر
اولدولار داخل دیار شامه قولّاردا طناب
.
.
#ورود_شام
.
وار یری عرض ایلسم بی پرده یابن العسکری
ایلینده شامه داخل عترت پیغمبری
اولدی عمَّن زینبین برپا او ساعت محشری
گوردی نوکِ نیزه ده قارداش باشین چون آفتاب
.
.
گون کسوف ایلر قیامتده گورونمَز نور عیان
محشرین وضعین ویروردی شاه دین باشی نشان
وجهِ وجهِ اللهی نوک نیزه ده دوتموشدی قان
پرده پرده قان جمالُ اللهه چَکمیشدی حجاب
.
.
نیزه باشندا جوانان بنی هاشم باشی
اوغلونی اوخشور آنا، محملده باجی قارداشی
آز قالور طوفانه ویرسون شامِ شومی گوزیاشی
بیر قیامتدور که دل داش اولسا ایتمز صبر و تاب
.
.
ایلیوب شام اهلی اَلده چنگ و بربط پیشواز
نی کیمی دلدن نوا ایلور خواتین حجاز
کسب ایدوب امّا حسین عشقینده زینب امتیاز
آز قالور ایتسون دیار شامی گوز یاشی خراب
.
.
نیزه ده قرآن ناطق باشلیوب قرآن اوخور
کف چالور آل امیّه رقص ایدور دونان اوخور
فاطمیّه قیزلار آغلور، فرقه ی عدوان اوخور
مجمعُ الضّدّین اولوبدور شامیده وار انقلاب
.
.
.
روایت #سهل_ابن_ساعدی
.
.
نقل ایدر سهل بن سعد ساعدی بو مطلبی
شامه داخل ایلین گون دخت زهرا زینبی
هاشمیّاتین چخاردی عرشه یارب یاربی
آهنین دللر اولوردی آتشین آهیله آب
.
.
منتظر بیر گوشه ده دورموشدوم ایلوردوم نظار
اَللریم بوینومدا، آغلار گوزلی، پوزقون، دلفکار
ناقه ده بیر خورداجا قیز گوردوم ایلور آه و زار
ابر نیسان تک توکور رخساره گوزدن دُرّ ناب
.
.
تا باخوب گوردی منی بیر گوشه ده دلگیر، تک
زلفینی توکدی عذاره حلقه ی زنجیر تک
باخدی قهریله خطاب ایتدی آجیقلی شیر تک
باخما وَیحَک یا رَجُل یوخدور عذاریمده نقاب
.
.
ماتمونده وای اوغول وای دلده، اَگلشسون آنان
بُلموسن بیزلر کیموخ؟ ای مرد بی نام و نشان
بیز علی اولادیوق، شرم ایله جدّیمدن اوتان
حشریده جدّیم سوال ایتسه واروندور نه جواب؟
.
.
نیزه باشندا او باش که جلوه سی گوز یاشیدور
جان زهرا، روح پیغمبر، حسینون باشیدور
شیر داوردور آتاسی، مجتبی قارداشیدور
حق کلامینده بو باشدور معنی اُمُّ الکتاب
.
.
تا ایشیتدیم بو سوزی گیتدی اَلیمدن اختیار
تیترَدی دیز، قاشدی رنگیم یوزدن، اولدوم بی قرار
عرض قیلدیم ایستورم بی بی بو سوزدن اعتذار
باخمادیم رِیبه خیالیله، بو باخماقدور صواب
.
.
سهل دور آدیم، صحابه حضرت پیغمبره
دلده بیر گیزلین علاقم واردور آل حیدره
واردی بو باخماقدا بیر عرضیم حضور اطهره
اولسا هر اَمروز منه کشف ایله ای عُلیا جناب
.
.
بو سوزی مندن ایشیتدی باشلادی داد و فغان
دوندی بیر زنجیره باغلی نوجوان ویردی نشان
ایتدی فرمایش سوزون اولسا اونا گیت قیل بیان
یر یوزینده ماسِوَاللهه اودور مالک رقاب
.
.
گَلدیم عرض ایتدیم حضور حجّتُ اللهه سلام
سویلدیم ای یادگار حضرت خَیرُ الاَنام
اولسا هر اَمروز اونون اجراسینه شاها وارام
امروز اجراسیندن ایتمز خانه زادور اجتناب
.
.
گوزلری دولدی، بویوردی حجّت پروردگار
مال دنیایه گمانون گَلسه ایله آشکار
عرض قیلدیم منده دورت یوز سیّدی دینار وار
ایستوسوز تقدیم ایدوم ای وارث ختمی مَآب
.
.
ایتدی فرمایش یدُالله اوغلی، فخرُ‌السّاجدین
نیلوری یا سهل دنیا مالینی اهل یقین
ویر او صاحب نیزیه اول وجهی اولشوم و لعین
سالماسون قلب بنات بوترابه التهاب
.
.
آل طاهادن بیر آز چَکسون او کافر فاصله
شه باشی اولسون تماشاچی لره بیر مشغله
باخماسونلار اهل بیت بی کس و خونین دله
گورمسون بی پرده زهرا قیزلارین اهل عذاب
.
.
سهل نقل ایلر گوزیمده گوز یاشی غرق ملال
گَلدیم ایتدیم بی مروّت نیزه داره کشف حال
آلدی وجهی، ایتمدی امر امامه امتثال
تازه دن ایتدیم حضور شاه دینه من شتاب
.
.
عرض قیلدیم سیّدی ای ظاهراً شمره اسیر
وی ایدن باطنده حکمی ماسِوانی دستگیر
آیری اَمروز وار ایدوم مُجرا، مُجیرِ مستجیر
تا اولا خوشنود مندن روح پاک بوتراب
.
.
ایتدی فرمایش نوامیس خدای ذوالجلال
باش آچوخدور، ایلیوب بو غم منی افسرده حال
دوره ده صف صف تماشایه دوروب قوم ضلال
دود دلدن هاشمیّاتین باشندا وار قباب
.
.
ساتره گَلسه گمانون ویر بنات حیدره
منّتین بو خدمتین قوی جدّیمیز پیغمبره
یوز دولاندوردوم او ساعت اهل بیت اطهره
گوزده اشک، اَلده عمامه، دلده رنج و پیچ و تاب
.
.
پاره پاره ایلدیم تقسیم ایدم عمّامه نی
گوردوم افلاکه اوجالدی اهل بیتین شیونی
چوخ اسفلی حالیله هر تک تکی سسلر منی
سس گَلور ایتدون عجب بیر امر خیره ارتکاب
.
.
باشینه سالسون اولاردان ویر بیرین زهرا قیزی
گورمَسونلر باش آچوخدور عترت کبری قیزی
حایل رخسار ایدوب زلفین شه بطحا قیزی
پاره پاره ویردیم ایتدی آل هاشم احتجاب
.
.
گَلدیم آغلار گوزلی فوراً محضر شاهه ملول
عرض قیلدیم ای امام ماسِوا، سبط رسول
آیری اَمروز اولسا وار فخریم گنه ایلوم قبول
سویلدی آغلار گوزیله اول امام مُستطاب
.
.
قالدی هیچ عمّامه دن؟ عرض ایلدیم بیر پاره وار
شکر قیلدی، دردیمه فرمایش ایتدی چاره وار
ثقلت زنجیریدن بوینومدا کاری یاره وار
گون ووراندا قیزدورور زنجیری، ایلور دل کباب
.
.
اَللریمی باغلیوبلار، یوخدی منده اقتدار
گَل بو زنجیری بیر آز بوینومدان ایله سن کنار
گور نجه اَوداجیمی زنجیر ایدوبدور زخمدار
یاره مه اول پاره نی قوی بلکه اَسگیلسون عِقاب
.
.
سهل نقل ایلر امامین امرینه ایتدیم عمل
اوز حضوریندن منی قِیتَردی سرِّ لَم یَزَل
اکتفا امّا جفایه ایتمدی قوم دغل
ایتدیلر آل عبایه جور و ظلم بی حساب
.
.
ویردیلر آلُ اللهه ویرانه بیر مسجد مقام
آج، سوسوز، یورقون، خانملار گَلدیلر شوره تمام
نه چراغ اولدی بناتِ بوترابه نه طعام
صبح اولونجا قویمادی آجلیق ایده اطفال خواب
.
.
خورداجا قیزلار قوری توپراقلارا قویدی یوزین
باخدی بو حاله امام اشکیله دولدوردی گوزین
حضرت زهرا قیزی یاددان چخارتدی اوز اوزین
گوردی پوزقوندور خواتینِ خدارت انتساب
.
.
زینبه ویرّم قسم ای خالق ارض و سماء
عمر طولانی بو «سعدیِّ زمانه» قیل عطا
بیرده توفیقون رفیق ایت ایتمسون جرم و خطا
ایلسون آل علی حقّینده تالیف کتاب
.
#مهدیه_محرم
#راه_شام
#ورود_شام
#سعدی_زمان
#ای_امام_منتظر_ای_چرخ_دینه_آفتاب
#چهارده_معصوم_حسینی ص 196
#ترکی
.
#زبدةالاشعار
.
?: @nohe_torki