ای باد صبا کرب و بلایه گذر ایله #اربعین_منعم_اردبیلی

اربعین
..
..
..
..
مرحوم منعم اردبیلی
..
..
..
..
ای باد صبا کرب و بلایه گذر ایله
غم قاصدی اول هاشمیانه خبر ایله
..
زوار گلور سویله جوانان حسینه
عباسه دئ قانلی علمین آلسون الینه
..
آل اصغری آغوشیوه ای شبه پیمبر
دور عمّه وی پیشواز ائله گلدی علی اکبر
..
پیشواز ائلین ای هامی زوّاری ابوالفضل
پیشواز ائله دور زینب بی یاری ابوالفضل
..
مدّتدی گزوب چوللری آواره دی زینب
قوللاروی سال بوینونا بی چاره دی زینب
..
دیندیر باجیوی اوستونه غملر توکولوبدور
گورسون تانیمازسان داخی قدّی بوکولوبدور
..
بیردن دئدی چاووش، حسین قبری گوروندی
زینب ئوزینی آتدی یوزی اوسته سوروندی
..
آغ زلفی قرا معجری تپراقه بَلَندی
گلدی باجون ئولسون دئدی گوزیاشی اَلَندی
..
خردا بالالار گلدی نوالر اوجالاشدی
گوتدی هره بیر جام فرات اوستونه قاشدی
..
دولدوردیلا جامی قیدوب دسته به دسته
گئتدی هاموسی سپدی حسین قبرینون اوسته
..
بیچاره رباب آغلادی باشدا قره معجر
الله دئدى بس هاردا یاتوبدور على اصغر
..
گل گل دئدیلر آغلاما ای قلبی شکسته
شش ماهه بالون یاتدی حسین سینه سی اوسته
..
منعمدی آدیم عرصۀ ماتم چمنیمدور
هر یرده حسین وای سسی گلسه وطنیمدور
..
بو قاره نقدری دیرییَم پیرهنیمدور
ئولسمده آغیر داشلارون آلتدا کفنیمدور
..
..
..
#اربعین #منعم_اردبیلی #ترکی #زبدةالاشعار