مدح حضرت علی علیه السلام
#یاعلی
..
..
..
..
مرحوم صراف تبریزی
..
..
..
..
ای جمالی مظهر آیات کبری یاعلی
وی جلالیندن هلال حق هویدا یاعلی
..
فیض جودیندن وجود ماسوا موجود اولوب
ای وجود ماسوایه فیض عظما یاعلی
..
نور حق آئینۀ ذاتینده اولموش جلوه گر
ای صفات اللّهه مرآت تجلّا یاعلی
..
لوح حسنونده یازیلمش آیۀ الله نور
صورتینده کلمۀ مشکوة معنا یاعلی
..
سن بو مخلوقاته باب علمی مفتوح ایلدین
شاهدیمدور سورۀ اِنّا فَتَحنا یاعلی
..
الف قدّین، خلقه لاء نفیی اثبات ایلدی
کلمۀ توحیده سنسن الف الّا یاعلی
..
من نجه وصف ایلیم خالق سنه مدّاح اولوب
دولدوروب قرآنی اوصافون سراپا یاعلی
..
کمّ و کیف ذاتوی درک ایتمز اوهام و عقول
ذات پاکوندور مرکّب دن مبرّا یاعلی
..
گر دییم ممکن سنه، سن تک بشر ممکن دگل
ور دئسم واجب، اولور کفریم هویدا یاعلی
..
ایله ممکن سن، که واجبدور وجودین عالمه
ای وجودی علّت غایی اشیا یاعلی
..
نار قهریندن اولور نام جهنّم شعله ور
نور مهریندن دولوب فردوس اعلا یاعلی
..
پرتو نور جمال بی مثالیندان سنین
مقتبس دور آفتاب عالم آرا یاعلی
..
ای ولیّ الله اعظم، عالم و آدم سنه
بنده دور، سنسن بو مخلوقاته مولا یاعلی
..
خواجۀ قنبر، امیرالمومنین، یعسوب دین
فاتح خیبر، شه دنیا و عقبا یاعلی
..
ای کلام الله ناطق، وی کلید کنت کنز
آشکار اولموش سنیله گنج اخفا یاعلی
..
باب شُبّیر و شَبَر، ابن عم خیرالبشر
صاحب محراب و منبر، زوج زهرا یاعلی
..
ای در بحر شرف، شاهنشه ملک نجف
سرّ حق سندن اولوب عالمده پیدا یاعلی
..
پادشاه کون و امکان، جسم مخلوقاته جان
سرور مردان، امیر ملک بطحا یاعلی
..
قدرت الله، حجت الله، جانشین مصطفی
آیینه رحمت، ولی حی یکتا یاعلی
..
عالم علم سلونی، معنی امّ الکتاب
واقف اسرار سرّ لیل اسرا یاعلی
..
عروة الوثقایه معنا، تاجدار انّما
قفل گنج هل اتی، مصداق طاها یاعلی
..
ای شه والا مکان، پیوسته ایلر آرزو
درگهین اسفل مقامین عرش علیا یاعلی
..
آب اولور آتش، سر کویون هواسندن سنین
خاک پاییندور عجب گوگرد حمرا یاعلی
..
آستان درگه پاکین چراغان ائتمگه
مشعل خورشید اله آلمیش مسیحا یاعلی
..
سن صفی اللّهه ویردین زنگ محنتدن صفا
اسم پاکندور سنین اسماء حُسنی یاعلی
..
نار نمرودی ایدوب لطفون خلیله گلستان
پور آزر گورمیوب آذردن اوتدا یاعلی
..
فُلک محنتدن تاپیب نوح نبی الله نجات
اونداکی ائتدی سر کویونده ماوا یاعلی
..
سن ذبیح اللّهه مشق عشق تعلیم ایلدین
ویرمه میش باشین آلیب تاج فدینا یاعلی
..
اولماسیدی حضرت عیسائیله همدم دمین
هاردا روح الله ایدردی مرده احیا یاعلی
..
قاسم الرّزاق سنسن، خوان جودیندن سنین
قوم اسرائیله گلدی منّ و سلوا یاعلی
..
مهر رویین ایتدی موسادن ید بیضا عیان
ایلدی فرعونی قهرون غرق دریا یاعلی
..
میزبان اولدون حبیب اللّهه سن معراجده
دگلم منکر ایدم حاشا و کلّا یاعلی
..
نازنین آدین، سلیمان ایلدی نقش نگین
اولدی جنّ و انسه هر فرمانی مجرا یاعلی
..
بیت الاحزان ایچره، سن یعقوبه اولدون هم نفس
محنت هجره ایدوب صبر و شکیبا یاعلی
..
دولدوروب آفاقی حسنون، صوت ما هذا البشر؟
حسن یوسف ذرّه دور حسنین یانندا یاعلی
..
ای جمال الله، جمالین اولسا ظاهر پرده دن
پردۀ عصمتده قالماز بیر زلیخا یاعلی
..
هر گوزل معشوقه بیر عاشق، بیابان گرد اولوب
سن منی، فرهادی شیرین، قیسی لیلا یاعلی
..
عرصه محشرده «صرّافین» یتیش فریادینه
چون سنین مدحین ایدر املا و انشاء یاعلی
..
مطلب و منظوری شاها، التفاتیندور سنین
یوخ یقین گوگلنده بیر اوزگه تمنا یاعلی
..
فکر و ذکری روز و شب ده، وردی یا محبوب اولوب
کیمدی سندن اوزگه محبوب دل آرا یاعلی
..
اوزی بیر مور محقّر، دفتری پای ملخ
چوخ سعاتدور اگر مقبول اولونسا یاعلی
..
#حیدریه #صراف_تبریزی #حیدریه_مدح #ترکی #زبدةالاشعار
نظر دهید