ای درس عشقی اورگدن انسانه یاحسین #حسینیه_علی_تیموری

#یاحسین …
.
.
علی تیموری
.
ای درس عشقی اورگدن انسانه یاحسین
عشقین یولونداجسمی باتان قانه یاحسین
.
.
قلبونده عشق وحُب خداچکدی منظره
قانیله بیعت ائتدون حسین حیّ داوره
غبطه ائدر مقامووه عرش اهلی یکسره
بیلمز سنون مقامووی بیگانه یاحسین
.
.
تاوار جهان آدون سنون همواره زنده دی
شاه لار قاپوندا یکسره واللهی بنده دی
عشّاقوون حسین گوزی البته سنده دی
فخر ایلیوله سن کیمی سلطانه یاحسین
.
.
مولا جهاندا چوخدی گوزل عاشقون سنون
عشق اهلینه بو بارده جنّتدی مدفنون
گلزارایچینده روضه ی رضواندی گلشنون
رونق وئروب قانون بو گلستانه یاحسین
.
.
عالم سنه فدا اولا ای شاه کربلا
اوخ مثلی کربلاده یاغوب اوستوه بلا
هرنه بلا گلوب دیلووه گلمیوبدی لا
خدمت ائدوبسن عشقیله قرآنه یاحسین
.
.
عاشق گرک شریف اولا خرگاه عشقیده
یوسف کیمین عبادت ائده چاه عشقیده
مولا سنون کیمی وئره جان راه عشقیده
جانلار فدا اولا بئله بیر جانه یاحسین
.
.
حیران قالوبدی عقل بشرمعجزاتوه
عشق ایلیور زمانه ده عشّاق ذاتوه
بیرعدّه گوزتیکوبدی سنون التفاتوه
گل ائت نظر بو جمع پریشانه یاحسین
.
.
کیمدور سنون کیمی گئده حقین سراقینه
عطشان بوغازینی وئره خنجر قباقینه
طشت ایچره خیزران دگه عطشان دوداقینه
اولدون فدایی حضرت سبحانه یاحسین
.
.
لایق دگول بیزه گئدک اغیاره یالواراق
یااینکه هر ستمگر و مکّاره یالواراق
لازمدی سن کیمین یارالی یاره یالواراق
باخ گلمیشوک بودرگه احسانه یاحسین
.
.
کیمدور آدین دوتاندا بشر ایلور افتخار
کیمدور جهاندا شیعه لره نام اعتبار
کیمدور جزاگونونده اولان صاحب اختیار
سن سن چاتان بورتبه ی شایانه یاحسین
.
.
سن تک جهاندا هانسی گروهون امامی وار
یا عشقیلن بودهریده دیلرده نامی وار
الله آدی کیمین آدوون احترامی وار
آدون ائدوب بو نوکری دیوانه یاحسین
.
.
ای شاه کربلا سنه وار بوردا بیر سوزوم
تیمورییم یانار اورگیم یاش توکر گوزوم
نوحه یازاندا دایمی چوخ آغلارام ئوزوم
غمدن دونوبدی گوزیاشیم عمّانه یاحسین
.
.