ای گلشن بلایه اولان باغبان باجی #صحاف_تبریزی

زبانحال امام مظلوم به حضرت زینب کبری(س) در شب عاشورا
.
زبدة الاشعار

?: @nohe_torki
.
مرحوم صحاف تبریزی
.
ای گلشن بلایه اولان باغبان باجی
بار غمیله قامتی خم باغری قان باجی
.
شمر شریردن بو گیجه مهلت آلمشام
راحت یاتا بالالاریم ای مهربان باجی
.
تشویشه دوشمه توکمه یوزه قانلو گوز یاشون
چوخ پوزما حالون ایلمه داد و فغان باجی
.
باخما بو بی وفالره ترک ایتدیلر منی
ترک ایلمز وفانی وفادار اولان باجی
.
بیگانه لر تمام باشمدان داغلدیلار
قالدی او کیمسه لر که ایده ترک جان باجی
.
هر تک تکی شجاع و رشید و وفالیدور
گورمز دوباره مثلنی چشم جهانی باجی
.
عباسمون نقدری اسور الده بیدقی
هیهات ال تاپا منه بو کوفیان باجی
.
لیلایه ویر خبر ایلسون زیور اوغلنا
گورسون دویونجا اکبرین اول ناتوان باجی
.
باخسون سریه قاسمنون گل جمالنه
اولسون گیجه صباحه کیمی همزبان باجی
.
آلسون علی اصغری آغوشنه رباب
بیرده اولا بو فرصت اونا یوخ گمان باجی
.
صبح اولسا بل بو چولده قیامت قیام ایدر
اوضاع روز حشر اولو مطلق عیان باجی
.
لب تشنه قانینه بویانور یار و یاوریم
بو چولده چشمه چشمه اولور قان روان باجی
.
یانام گوزوم باخا باخا جدّیم شبیهینی
دوغرالا قطعه قطعه سوسوز شامیان باجی
.
لیلی قالور نحاله گورن وقته تل بتل
قانه باتوبدی طرّۀ عنبر فشان باجی
.
بیر طوی بساطی قاسمه قورّام بو چولده من
آغلار مقام قدسده قدّوسیان باجی
.
قاره سالور عروسی طوی اهلی دوتار عزا
داماده طوی حناسی اولور الده قان باجی
.
آلّام ال اوسته اصغری گل تک گورن دیر
بیر دسته گلدی تحفه دوتوب باغبان باجی
.
اتمام حجت ایلرم اشرار شامه من
رقّت ایدر او حالیمه کروبیان باجی
.
قویمازلا اهل کین یتیشه آخره سوزوم
هر لحظه حرمله منه ویرمز امان باجی
.
قونداق ایچینده اللریمون اوسته جان ویرور
پیکان دمنده اصغر شیرین زبان باجی
.
باشدان باشا بیچر بوغازین تیر زهردار
اوج ایلر عرش داوره سوز نهان باجی
.
عباسیمون سالولا قولین بیدقیم یاتار
ایلله گل وجودینی تیره نشان باجی
.
سو مشکی اوخلانور بوشالور قانیله دولور
بو جفت گوز سو اوسته ویرور ترجمان باجی
.
رفتاردن سالور اونی باشدان دگن عمود
قولسوز دوشر یئر اُسته او سرو روان باجی
.
گودال قتلگهده یخالار منی سوسوز
باشی آچوق گلور یره لاهوتیان باجی
.
آتلو پیاده دوره می یوز مین آلور منیم
اللرده تیغ و نیزه و تیر کمان باجی
.
نه جور و ظلمدن چکر ال نیزه دارلر
نه حالیمه ترحم ایدر داش وران باجی
.
ایلله لحم و عظمیمی ممزوج بیر یره
بو مرغ روحیمه اولی تنگ آشیان باجی
.
شمر لعین او حالده لشگردن آیریلور
هوله دوشر ملایک هفت آسمان باجی
.
صندوق علم حقه قویار چکمه لو قدم
دورت مین یارالی سینمی ایلر مکان باجی
.
بیر ظلم ایدر منه دوشر آفاقه انقلاب
ایلر تزلزل عرش حق کن فکان باجی
.
اون یدّی ضربتیله کسر تشنه باشیمی
زهرایه بیت حزن اولی باغ جنان باجی
.
گون تک کسوک باشیم اوجالور نوک نیزه ده
ظلم آیه سین تلاوت ایدر اولزمان باجی
.
گونلر ایوینده یرده قالور قانلو پیکریم
نه غسل نه حنوط و نه بیر سایبان باجی
.
مندن صورا یوروش گتورور خیمیه قوشون
غارت الین آچار سیزه شمر و سنان باجی
.
خیمم یانار حرم تالانور دستگیر اولور
کفاره الینده آل شه مومنان باجی
.
گورسن باشیم کوله بلنوب ورما باشوا
گلمه فغان و نالیه صبر ایت دایان باجی
.
شامه گیدر سنیله جداده کسوک باشیم
ورسون یزید لبلریمه خیزران باجی
.
#صحاف دل شکسته دی کسمه حمایتون
لطفیله ویر اوزون اونا نطق و بیان باجی
.
بیر اوزگه طرزیله یازا شامون مصیبتین
بزم مصیبتمده اولا نوحه خوان باجی
.

#شب_عاشورا
#ای_گلشن_بلایه_اولان_باغبان_باجی
#صحاف_تبریزی
#ترکی
.
#زبدةالاشعار

?: @nohe_torki