زبانحال حضرت زینب (س) در فراق مادر
.
.
.
صالح علی نژاد
.
ای گلشن جمالی صفای بهار آنا
عمرون گلون خزان ایلدی دست خار آنا
.
سن باغبان باغ صفا و امیدیدون
مُشکین اولاردی سنله نسیم بهار آنا
.
سالموشدی سایه باشیمه لطف و عنایتون
سایه نه سایه، سایه ی پروردگار آنا
.
یتمز مقام مریم عذرا مقامیوه
سنده اولان فروغ و صفا کیمده وار آنا
.
عزّ و وقاره سنله یتوب خِیل انبیا
اهل ولایته سنیدون اعتبار آنا
.
تاپمازدی یول حضوریوه پیک خدای حق
سندن گر اولماسیدی اونا حکم بار آنا
.
ایستردی هر سحر ایده حسنون گونی طلوع
سندن اولاردی مهر فلک شرمسار آنا
.
ایتدون حیا و عصمتیله تربیت منی
ای مکتب جلالته آموزگار آنا
.
عصمت سنه حجابیدی، عفّت سنه نقاب
آیریلمادی باشوندا اوُلونجه خِمار آنا
.
خورشید مه فروغ جمالونلا هر گجه
روشن اولاردی خانه ی تاریک و تار آنا
.
مدهوش ایدردی زینبی عطر ولایتون
غبطه ایدردی عطریوه مُشک تتار آنا
.
شبنم اوُپردی هر ورقون ای گل مراد
گوهر اولاردی باشیوه گویدن نثار آنا
.
صرّاف دهر مخزن عصمتده گورمیوب
بیر سن کیمی صفالی دُرِ شاهوار آنا
.
مغز طفِیلیدور سنه بو خلقت جهان
سنله اولوبدی کون و مکان برقرار آنا
.
من تک رحیق عشقیویله سرگران اولان
تا نفخ صور مشکل اولا هوشیار آنا
.
قام فریضه ده ال آتاندا نیایشه
حاجاتیوی ایدردی روا کردگار آنا
.
سجّاده ی نیایش و چادر نماز شب
سندن جهاندا قالدی منه یادگار آنا
.
قویموبدی پایدار اولا آمالیوین گلی
گل شاخه سینده گیتی ناپایدار آنا
.
کاش اولمیِیدی قصّه ی بیعت، او گیر و دار
سقط جنین، حکایت دار و جدار آنا
.
آتش سالاندا مهبطِ وحی خدایه یول
معناده دوتدی خرمن گیتی شرار آنا
.
فوج زغن هجوم آپاروب گلستانیوه
گل شاخه سیندن اولدی سینوب شاخسار آنا
.
خاره دچار ایدن گل عیش و مرادیوی
اولسون گوروم ادامه ی عمرونده خار آنا
.
خارین ایشی اذیّت و آزاریدور مُدام
خاریله گل نه نوعی اولار سازگار آنا
.
دشت خُتاده ایلدی صیّاد کین خطا
ایتدی به سانِ صید سنی زخمدار آنا
.
قدرت الین طنابیله باغلی گورن زمان
سندن او حال سلب ایلدی اختیار آنا
.
محبوبه هجری قلب حبیبه سالار شرر
آغلار یانار مُفارقت یاره یار آنا
.
ارثون ملالی سالدی سنی اختیاریدن
عمرومجه آغلارام سنه بی اختیار آنا
.
گیتدون قرار ایتدون اوزون قلب خاکیده
آلدون بو بی قرار دلیمدن قرار آنا
.
آلدی سپاه درد و مصیبت کناریمی
مندن او ساعتی که سن اولدون کنار آنا
.
دفن ایلدون اوزونله هامی دلده کی سوزون
بی پرده ایتمدون غمیوی آشکار آنا
.
سن که غریب و دربدر غمگساریدون
قالدون تک ایوده بی کس و بی غمگسار آنا
.
بوکدی او سروقامتیوی او کوله بار غم
اولدی سپید سنده اولان زلف تار آنا
.
کیمدور گونوز وفات ایلیوب قبر ایاقینه
سن تک گیده زمانی اولا رهسپار آنا
.
ایتدی به سانِ غنچه سنی تنگدل فلک
قلبونده اولدی لاله صفت داغدار آنا
.
قالدی یانان اورکده تمنّای بی شمار
گلمز شماره دردیوی ایتسم شمار آنا
.
گوردون جفا زمانه ده جور زمانه دن
تار ایتدی روزگاریوی بو روزگار آنا
.
شاد اولدی دشمنون سنی ایتدی دچار غم
عمروم نه قدری وار منیده اشکبار آنا
.
«صالح» غلام درگهون اولسا حساب اگر
عالمده خسروانه ایدر افتخار آنا
.
.
#فاطمیه_شهادت
#ای_گلشن_جمالی_صفای_بهار_آنا
#صالح_علی_نژاد
#ترکی
.
.
نظر دهید