باز خامه مطلبی را زیب دفتر می کند-ایلیوب تصویب قانونینده حی لا یری #فاطمیه_سعدی_زمان

حالات و اوضاع #قیامت – تشریف فرمائی جدۀ سادات به عرصات محشر
.
.
.
مرحوم سید رضا حسینی سعدی زمان
.
.
باز خامه مطلبی را زیب دفتر می کند
عالم محشر نویسد شور محشر میکند
.
گر کسی گرید ز خوف دادگاه معدلت
رحم بر وی روز محشر ذات داور میکند
.
.
ایلیوب تصویب قانونینده حیّ لا یُری
مادّۀ فوته اولا مشمول کُلّ ما سِوی(1)
.
بیر نفر ممکن دگول بو مادّه دن اولسون معاف
یا مقرّب بیر ملک یا انبیا یا اولیا(2)
.
ایله که مُجری اولار بو امر و فرمان مُطاع
یرده گویده بیر نفر قالماز به جز ذات خدا
.
محض اظهار تسلّط حضرت ربّ جلیل
خلق ایدر بیر سَس بو نحویله اولار ظاهر صدا
.
بو گون ای کون و مکان اهلی کیموندور سلطنت(3)
سَس ویرن اولماز گنه سَس خلق ایدر جَلّ و علا
.
واحد و قهّار اللّهوندی بو گون سلطنت(4)
ها هُوَ المالِک عَلی تَحتِ السَّماء فَوقَ الّثرای
.
دادگاه عدل تشکیلاتی اولسون منتظم(5)
حشر و نشر اولسون هویدا حِکمت ایلر اقتضا
.
روح اسرافیله اوّلده ویرر تازه حیات
نفخ صور ایلر او مأمور شه ارض و سماء
.
بدو عالمدن ئولن اموات قبریندن دورار
دیشده حیرت بارماقی دلده هامی یا وَیلَنا(6)
.
تازیانه الده سلطان السّلاطین عدّه سی
سوق ایده لّر محشره خلقی چه شاه و چه گدا
.
عرصۀ محشر نه محشر عاجزم تقریر ایدم
وار نه هنگامه نه رنج و نه فشار و نه عَنا
.
یر حرارتدن قیزار بر کورۀ حدّاد تک(7)
ساخلیانماز بر نفر ذی روح راحت یرده پا
.
بر آتیلمیش پانبوقا بنزر او گون محکم جبال(8)
دست قدرت گوگلری طومار ایلر بر ملا(9)
.
سلب اولار خورشیددن اوز قوّۀ نوریّه سی(10)
قوّۀ ناریّه سی افزون اولار ویرمز ضیا
.
بر جدا قدرینجه خلقین باشی اوستنده دورار
یر حرارت گوی حرارت اود توکر گویا هوا
.
ایسّیدن باش کاسه سینده مغزیلر جوشه گلر
غرق اولار بحر عرقده سر بسر اهل جزا
.
یرلر ایلر زلزله (11) قارداشی قارداش ترک ایدر(12)
دلده وا نَفسا قاچار دلخواه اوغلیندان آتا
.
یوسفی یاددان چخاردار بیت الاحزان صاحبی
شیرخواره طفلینی بالمرّه ترک ایلر آنا
.
قهر دریاسی ایله ایلر تلاطم خوفدن
غرق اولار گرداب غمده انبیا تک ناخدا
.
بیر طرفدن سلب تاب ایلر جهنّم نعره سی(13)
بیر طرفدن صالح و طالح دیر وا حسرتا
.
بیر طرفده هر پیمبر امّتیله صف چکر(14)
بیر طرفده امّت مرحومه ائیله مصطفی
.
بیر نفرده قدرت رفتار اولماز مشی ایده
بیر نفرده طاقت اولماز تا سوزین ایتسون ادا(15)
.
حقّدن ناگه یتر ختمی مآبه بو خطاب
حاضر ایله امّتون ویرسون حساب ای مقتدا
.
حضرت ختمی مآب اوزلر او دمده امّتین
صاحب اعمال صالحدن سِچر بر جمع تا
.
یوز قویار دیوانِ عدلِ دادخواه داوره
اشگ حسرت گوزده اِرحَم اُمَّتی دلده دعا
.
سَس گَلَر دربار حقدن هوُلآءِ العامِلوُن
اَینَ مَن نامَ اللَّیالی وَ لِمَولاهُ عَصی
.
تازه دن شرمیله طَرفِ اُمّته عازم اولار
شافع محشر حبیب لم یزل میر هُدا
.
بر جماعتده سِچر،هم جرم ایدوبلر هم ثواب
قالماز امّتده مگر مستغرق بحر خطا
.
تا سچلمش عدّه ده مشمول رحم حقّ اولار
واحد قهّاردن ناگه یتر قهری ندا
.
دورما یا احمد بو عاصی امّتوندن اول کنار
مهربان پیغمبر امّتدن اولا ایستر جدا
.
سَس چکر اُمّت اماندور یا رسول الله امان
قویما بو عاصی لری دوتسون بو گون نار بلا
.
بیرده قهر آمیز صوتیله خطابِ حق یتر
دورما یا احمد چِخ امّتدن یاخوندور ابتلا
.
تا کناره بیر قدم پیغمبر خاتم قویار
آتشِ دوزخ،هجوم ایلر اولار قطع رجا
.
بینوا امّت چکللّر نالۀ هَل مِن مُغیث
رحم قویماز امّتین ترک ایلسون اول پیشوا
.
نیلسون پیغمبر رحمت دیور حق اول کنار
با جلالت دامنین امّت ولی ایتمور رها
.
قهر دریاسی تلاطم ده جهنّم نعره ده
حمله ایلور اودلی انفاسیله مثل اژدها
.
رَحمةً لِلعالَمین ایلر حیاسیندن عَرَق
اُمّت عاصی ده ایلر اوز خطاسیندن حیا
.
رحم دریاسی پیمبر افتخار مُرسلین
معنی لولاک یعنی تاجدار اَتقِیا
.
جبرئیله یوز دوتار سَسلَر اماندور جبرئیل
آز قالور اُمّت گیده الدن علاج ایت یا اخا
.
گیت بقیعه ویر قیزیم زهرایه مندن بیر سلام
گَلمسه زهرا بو امّت دردینه اولماز دوا
.
بیر نچه دسته سالار حورا یانینجا جبرئیل
بیر نچه عدّه ملک همراه ایدر دلده نوا
.
پرچم نوری گَلَر قبر بتول اوسته وُرار
بیر سلام عرض ایلر اوندان عرض ایدر ای مه لقا
.
دور ایاقه قبردن ای دُخت سالار رُسُل
ای آز عمرینده گورن چوخ جور و ظلم و چوخ جفا
.
ای خدا محبوبه سی وی مصطفی ریحانه سی
وی خواتین بهشتین روحی جسم جان نما
.
ای غلام درگهی عیسی و موسای کلیم(16)
وی تراب مقدمی مریم گوزینه توتیا
.
قبرده نه یاتموسان ای گُلمییَن بر دم یوزی
انتظار مقدموندور اَتقیا و اَصفیا
.
چوخ پریشاندور آتان اُمّت خصوصیندن خانم
ای رجال عالمینون فخری یا خیر النّساء
.
سَسلَنر بیر کَس گورر نچه قیامت جبرئیل؟
بس دگول درگاهیمی یاندوردی قوم اشقیا
.
مُحسنیم سقط اولدی باغلاندی عموغلوم قولّلاری
دستگیر اولدی لِئامه تاجدار هَل اَتی
.
بس دگول قَدّیم بوکولدی بار درد و غصّه دن
بس دگول ظلمیله مسموم اولدی اوغلوم مجتبی
.
بس دگول اوغلوم حسینون کسدیلر باشین سوسوز
شامه گیتدی نیزه ده خورشید تک بَدر الدُّجی
.
عرض ایدر جبریل بو موقع دگول وقت گِلَه
موقع رحم و کرم دور مجرمینه حالیا
.
گوئیا صدّیقۀ کُبری دیر یا جبرئیل
اوزگه بر محشر بوگون محشرده قیلّام برمَلا
.
باشیمه سالّام حسینون دورت مین اوخلی کوینگین
وار بو کوینکده بیوک هنگامه عالی ماجرا
.
مجتبی پیراهنی شیر خدا عمّامه سی
عُمده اسباب شفاعتدور اَلیمده مُطلقا
.
هیچ وسایل اولماسا اوغلوم ابوالفضل اللّری
بسدور اسباب شفاعتدور او مَقطوُعُ الیَدا
.
یوز قویار القصّه زهرا عرصه گاه محشره
الده اسباب شفاعت مفخر آلعبا
.
طرّقو گویان قباقنده ملائک صف به صف
پیش روشینده دیر جبریل یا اهل الجزاء
.
گوزلرین یومسون سراسراوّلین و آخرین
چون گَلور خاتون محشر دختر خیر الوَری
.
عرصه گاه محشره تا حضرت زهرا یتر
اوزگه بیر محشر ایدر اول عرصه گاه ایچره بپا
.
اَل آتار عرشه قوائیمدن دوتار یعنی خانم
اَلده زلفی سَسلَنر عدلیله حکم ایت عادلا
.
آل منه ظلم ایلین بی رحملردن انتقام
منتقم سَنسَن خداوندا اِلَیکَ المُشتَکاء
.
هاردادور اُمّت یولوندا باش ویرن تشنه حسین
هاردادور مسموم زهر کینه اوغلوم مجتبی
.
ایستورم اولسون قیزیم زینب گورن محشر عیان
عرصه گاه محشره گلسون بساط کربلا
.
صاق طرفدن ناگهان اوزگه قیامت باش ویرر
نه قیامت عرصۀ محشر اولار بزم عزا
.
محشرین اهلی گوره للّر چخدی بر عالی نظام
باشدا بر باشسیز بدن باشدان باشا پیکر یارا
.
هر قدم گوتدوقجا اَوداجِ شریفی قان ویرور
اوخ قلج نیزه یریندن جوش ایدور لخته دِما
.
بیر النده ساخلیوبدور نازنین باشین ولی
باش نه باش اون یدّی یردن تیغ و تیره آشنا
.
کول دوتوب گُل صورتین گویا تنور ایچره یاتوب
چوخ چتین دور اوغلونی بو نحویله گورسون آنا
.
بیر الیله شاه دین قاتل گریبانین دوتوب
دادگاه داوره داد آلسون ایلور التجا
.
عالم محشر یازانلار بو سوزی بیله یازوب
لیک بر اوزگه عقیده وار « حسینی » ده بونا
.
بو نه سوزدور قانلی باشین بیر الیله ساخلیوب
بیر الیله قاتلین یا که گریبانین دوتا
.
گَلمه میشدی؟ اوغلونا شام غریبان دوتماقا
جدّی پیغمبر، آناسی، هم آتاسی مرتضی
.
گورمدی زهرا؟ بیلکده اوغلینون یوخ اللّری
اللّرین قطع ایلیوبدور ساربان بیحیا
.
بس حسین هانسی الیله اوز کسوک باشین دوتار
بیرده بوردا واردی بیر باریک مطلب چوخ خفا
.
قاتلی بیردور مگر دوتسون گریبانین حسین
حرمله،خولی،سَنان یا مالک و شمر دغا
.
بیر مَلَک اولسون گرک حامل حسینون باشینه
بر مَلَکده اللّرینه بو شهین حامِل اولا
.
بیرده بیر عدّه مَلَک قاتللّرین جلب ایلیه
چون وروب بعضی قلج بعضیسی اوخ بعضی جدا
.
کربلا سلطانینون آردینجا بیر عدّه شهید
باش ویرن دین مبین اوسته رجال با وفا
.
بیر بیرینون آردیجا یتمیش ایکی باشسیز بدن
بعضی نورسته جوان بعضیسی پیر پارسا
.
بیر جوان واردور قیامت قامتندن گورسنور
لیلیه مجنون کیمی سرگشته لیقدا رهنما
.
بسکه اوخ نیزه وروبلار یوخ بدنده صاف یری
گول کیمی اوراق اولان جسمینده بر گلشن صفا
.
شاه مظلومین جگربندی علی اکبر آدی
هر یاراسی گل کیمی بر عندلیبه دلربا
.
بیر الیله قاتلی منقذ گریبانین دوتوب
بیر النده اوز باشی اول نورسِ گلگون قبا
.
اول جوانین آردیجا بر نازنین تازه جوان
مجتبانین یادگاری،اللّرینده قان حنا
.
کربلاده ظلمیله طوی گورمیوب ناکام ئولن
سو ویرن گلزار دینه قانی، پور مجتبی
.
بیر الی قاتل گریبانینده بیر الده باشی
آردیجا بر جفت طفل خُردسال و ماه سا
.
زینب مظلومه نین یعنی قوزی قربانلاری
اول ایکی طفلی بو گوندن اوتری ویرمشدی فدا
.
ناگهان ایلر قیام اوزگه قیامت تازه دن
ماسَلَف یاددان چخار باشلار هامی داد و بُکاء
.
بیر الینده بیر ملک بیر سود اَمَر باشی گَلر
بیر اَلینده قانلی بیر قنداق تاپوبدور اِرتقا
.
وار بوغازیندا ولی اوچ شعبه لی پیکان یری
شافع عظمای محشردور همان خوردا بالا
.
قانینی عالی ذخیره محشره ایلوب حسین
اوخ بوغازیندان ووراندا ظلمیله اهل دغا
.
انبیا و اولیانی آغلادار اول سود اَمَر
کربلا تک عرصۀ محشر اولار ماتم سرا
.
محشرین اهلی گوره للّر گلدی ناگه بر نفر
باشی اوستنده دوتوبلار اوخلی بر قانلی لوا
.
وار یارالی پیکرینده نه باشی نه اللّری
تیریله باشدان باشا جسمی آچوب پَر چون هُما
.
بیر مَلَک اَلده دوتوبدور خرد خرد اولموش باشین
جلب ایدوللّر قاتلین ایلور ولیکن قَهقَرا
.
اوغلی عبّاسی گورنده وای اوغول وای سَسلَنر
حیدر کرّار یعنی تاجدار اِنَّما
.
تازه دن محشرده بیر اوضاع محشر باشلانار
شرحینی وصف ایتماقا حیراندی اربابِ حِجی
.
عرصۀ حشره گَلَر بر دسته دلخسته اسیر
قولّاری باغلی بویوندا جمله زنجیر جفا
.
بیر نفر ناخوش اسیر سلسله سرسلسله
آردیجا هشتاده دین عورت هامی باشدا قرا
.
دوربرده تازیانه الده کُفّار شریر
هاشمیّه قیزلار ایلور ناله دلده وا اَبا
.
گوسترور بازار شامین گوئیا هنگامه سین
زینبین حالی پریشاندور دلنده وا اخا
.
آدی گَلجک زینبون یاده دوشر بازار شام
شام ظلمی آغلادار زهرانی هر صبح و مسا
.
یا حسین اوغلون « حسینی » نین ئورکده دردی وار
کربلا توپراقیدور بو دردینه خاک شفا
.
لطف ایله اوز سوودوقوم اشخاصیله ایله نصیب
شوط ایداخ شش گوشه قبرون یا ذَبیحاً مِن قَفا
.
لوث عصیانی گرک دریای رحمتده یوواق
بیزلری پاک ایتمز اوزگه سو او دریادن سوا
.
بیر نفر سندن سوا بُلمور نه دردیم وار منیم
ای حکیم مطلق ایله قدرتونله سن دوا
.
چوخ گنهکارم من ای پروردگار لم یزل
جرم مندن خوشدی سندن بخشش و جود و عطا
.
نوحه خوانه،ذاکرینه،بانیه،مؤمنلره
شامل ایله روز محشر رحمت بی انتها
.
(1)كُلُّ شَيْءٍ هَالِكٌ إِلَّا وَجْهَهُ لَهُ الْحُكْمُ وَإِلَيْهِ تُرْجَعُونَ ﴿سوره قصص – آیه ۸۸﴾
کلُّ مَنْ عَلیها فَان وَ یبقَی وَجْهُ رَبَّک ذوالجلالِ والاکرامِ (سوره الرحمن – آیات 26 و 27)
(2)إِنَّک مَیِّتٌ وَ إِنهُم مَّیِّتُونَ (سوره زمر – آیه 30 )
(3) لِمَنِ الْمُلْکُ الْيَوْمَ (سوره غافر -آیه 16 )
(4)لِلَّهِ الْواحِدِ الْقَهَّارِ (سوره غافر آیه- 16 )
(5)فَمَن يَعْمَلْ مِثْقَالَ ذَرَّةٍ خَيْراً يَرَهُ وَمَن يَعْمَلْ مِثْقَالَ ذَرَّةٍ شَرّاً يَرَهُ ( سوره زلزله –آیه 7 و 8 )
(6)يَا وَيْلَنَا مَنْ بَعَثَنَا مِنْ مَرْقَدِنَا هَذَا مَا وَعَدَ الرَّحْمَنُ وَصَدَقَ الْمُرْسَلُونَ ( سوره یاسین – آیه 52 )
(7) کتاب اصل الشیعه
(8)وَ تَكُونُ الْجِبالُ كَالْعِهْنِ الْمَنْفُوشِ (سوره القارعه –آیه 5 )
(9)يَوْمَ نَطْوِي السَّمَاءَ كَطَيِّ السِّجِلِّ لِلْكُتُبِ كَمَا بَدَأْنَا أَوَّلَ خَلْقٍ نُعِيدُهُ وَعْدًا عَلَيْنَا إِنَّا كُنَّا فَاعِلِينَ (سوره انبیا – آیه 104 )
(10)إِذَا الشَّمْسُ كُوِّرَتْ (سوره تکویر –آیه 1 )
(11)يَا أَيُّهَا النَّاسُ اتَّقُوا رَبَّكُمْ ۚ إِنَّ زَلْزَلَةَ السَّاعَةِ شَيْءٌ عَظِيمٌ (سوره حج – آیه 1 )
(12)يَوْمَ يَفِرُّ الْمَرْءُ مِنْ أَخِيهِ * وَأُمِّهِ وَأَبِيهِ * وَصَاحِبَتِهِ وَبَنِيهِ * لِكُلِّ امْرِئٍ مِّنْهُمْ يَوْمَئِذٍ شَأْنٌ يُغْنِيهِ ( سوره عبس – آیات 34 و 35 و 36 و 37 )
(13)وَإِذَا الْجَحِيمُ سُعِّرَتْ ( سوره تکویر – آیه 12)
(14)یوْمَ نَدْعُو كُلَّ أُنَاسٍ بِإِمَامِهِمْ (سوره اسرا – آیه 71 )
(15)الْيَوْمَ نَخْتِمُ عَلَىٰ أَفْوَاهِهِمْ وَتُكَلِّمُنَا أَيْدِيهِمْ وَتَشْهَدُ أَرْجُلُهُم بِمَا كَانُوا يَكْسِبُونَ ( سوره یاسین – آیه 65 )
(16)حضرت صدیقۀ طاهره سلام الله علیها غیر از حضرت ختمی مرتبت صلی الله علیه و آله و سلم از تمام انبیا و حضرت مریم افضل است ( اللمعة البیضاء)

.
#قیامت
#فاطمیه_مدح #فاطمیه_شهادت
#باز_خامه_مطلبی_را_زیب_دفتر_می_کند
#ایلیوب_تصویب_قانونینده_حی_لا_یری
#سعدی_زمان #قیامت_سعدی_زمان
#چهارده_معصوم_حسینی ص 440
#ترکی
#زبدةالاشعار