برگ گلی گرک باد صبا اوپه #مجلس_یزید_ناصر_اردبیلی

مجلس یزید
..
..
..
..
مرحوم ناصر اردبیلی
..
..
..
..
برگ گلی گرک باد صبا اوپه
یا بلبل ایلیه آه و نوا اوپه
زهرا عزیزینون غنچه دوداقلارین
انصافیدور نجه چوب جفا اوپه
..
..
..
..
ای خیزران ندن سن ائتمدون حیا
ویردون دوباره سن برگ گله یارا
گل یاپراقی هارا خار جفا هارا
شایسته دور گلی اهل وفا اوپه
..
..
..
..
بیر گل که پرورش وئرمیشدی مصطفی
ائتمیشدی گلشن توحیدی باصفا
انصافیدور نجه ای چوب پرجفا
پیغمبرون گلین خار جفا اوپه
..
..
..
..
ائتدون مخالفت قرآن دیین سؤزه
قرآنیله نجه سن قویدون اوز اوزه
اوپدون نه فایده قویدون اونی گوزه
قرآنی حیفیدور نا آشنا اوپه
..
..
..
..
بسته یدی معجز عیسی او لبلره
ائتدون اذیت بیجا او لبلره
ویرمیشدی بوسه چوخ زهرا او لبلره
ایستردی بس اونی خیرالنسا اوپه
..
..
..
..
گلشنده خار اوپر گللر ایاقینی
مسکن ائدر اونون پائین بُداقینی
گلزاریده گلون غنچه دوداقینی
خار ایلیور زبس شرم و حیا اوپه
..
..
..
..
اوپدوکجه سن او گل لبلردن ای آغاج
خردا رقیه نون دردی تاپار رواج
بلبلدور اول گله بو طفل ناعلاج
خوشدور آتا لبین خردا بالا اوپه
..
..
..
..
گودالیده اولوب بازار ظلم گرم
شمر ائتمدی حیا اولمادی قلبی نرم
اول بوسه گاهیدن خنجر ائدوبدی شرم
مجبور اولوب اونی تا من قفا اوپه
..
..
..
..
گون تک او قانلو باش هنگام سیرده
جلوه نما اولوب انظار غیرده
ائتدی تجلیّ جانبخش دیریده
راهب ائدوب اونی سعی و صفا اوپه
..
..
..
..
اوپدون دوداقلارین گر سن یواش یواش
قانلو جبینینی چوخ سخت اوپوبدی داش
وجهی بودور خسوف آی تک ائدوب او باش
داش ممکن اولمادی چون بی صدا اوپه
..
..
..
..
ناصر چوخ ایستیور ای شاه تشنه لب
درگاهوه گلوب قویسون رخ ادب
عشقونده صرف ائدر عمرینی روزوشب
ایسته ضریحووی صبح و مسا اوپه
..
..
..
#مجلس_یزید #ناصر_اردبیلی #ترکی #زبدةالاشعار