بزم یاره باجی ایستیر منی جانان آپارا #وداع_غلامعلی_آذری

وداع حضرت امام حسین علیه السلام
..
..
..
غلامعلی آذری
..
..
..
بزم یاره باجی ایستیر منی جانان آپارا
سنیده شمر چکه شامه اورگ قان آپارا
..
صبر ائله گلمه نوایه دئمه یوخدور کمکیم
اگمه باش دشمنیمه سینه می پیکان آپارا
..
قارداشین دشمنه باش اگمه ییب اگمز بیلیسن
قتله مین دفعه اگر قاتلیم عطشان آپارا
..
من گرک جانیمی جانانه بو گون قربان ائدم
عاشق صادق او دور جانینی جانان آپارا
..
عاشقم حقه باجی بو یولی من گیتمه لییم
قوخمارام ظالم اگر قتلیمه فرمان آپارا
..
گرک عالملره من گوسترم حقین یولونی
باجی حق عاشقی ئوز عهدینه پیمان آپارا
..
ئولجه ک جمله یارانمیش هامیلار گئتتمه لیدیر
روسفید اول کیشیدیر حقه وئره جان آپارا
..
من بو گون قانیمیلن حقی گرک زنده ائدم
غبطه بو ایشلریمه حق سوون انسان آپارا
..
سنده اعلان ائله حقی باجی جان گئدسن هارا
قوخما دشمن سیزی زینب هارا گریان آپارا
..
حق دئین باش و جانیندان گرک عالمده گئچه
حقه جانین باجی جان تا ائده قربان آپارا
..
گئتمه سه باشیله جان حق دیری قالماز بیلیسن
گرک حق ریشه سینه قان آخا هر آن آپارا
..
نیزده من باجی جان ناقه ده سن ولوله سال
ائله ایش گور که سنه غبطه سلیمان آپارا
..
من آتام شیرخدا تک بیلیسن که اسدم
ئولرم قویمارام امّا دینی شیطان آپارا
..
گئدیرم جانیمی من حق دینه قربان ائلییم
سنده قویما گمیمی باجی بو طوفان آپارا
..
دئدی تا سوزلرینی یغدی عیالین باشینا
ایسته دی تشریف او دم میدانا سلطان آپارا
..
زینب آغلار گوزیله بوینینا سالدی قولونی
باجینین آزجا قالیب قلبی اولا قان آپارا
..
دئدی قوی بیر دولانیم باشیوا گئت قارداش حسین
فخر ائدر باجی جانین قارداشا قربان آپارا
..
قوى الین بو اوره گین باشینا تا حالیمی بیل
آز قالیر قلبیم اولا هجریوه شانشان آپارا
..
بیر امیدیم سنیدین سنده گئدیرسن نه ائدیم
کاش منده سنه قربان ائده عدوان آپارا
..
الینی قویدی باجی قلبینه اول دم شه دین
غصه دن گوردی باجی آزجا قالیر جان آپارا
..
دئدی الله باجیما صبر ئوزون ائیله عطا
اولا بو قیزلاریما یولدا نگهبان آپارا
..
آذری چوخدان آقا سسلیری امداده سیزی
بیر نظر ایلییه سیز دردینه درمان آپارا
..
نقدر باد صبادن سیزه من نامه یازیم
عیبیدیر یوخسا شاها نوکری مهمان آپارا
..
کیم گله در گهیزه مایوس اونی ایلمه سیز
راضی اولمین بو نوکر غصه فراوان آپارا
..
..
..
..
#وداع #غلامعلی_آذری #حسینیه_وداع #حسینیه #ترکی #زبدةالاشعار