بنات فاطمیه منزل اولدی ویرانه #حضرت_رقیه_تائب_تبریزی

حالات حضرت رقیّه (س) در خرابه شام
.
#زبدةالاشعار
.
: @nohe_torki
.
مرحوم تائب تبریزی
.
بنات فاطمیه منزل اولدی ویرانه
یتوب غم اوسته غم اول مجمع پریشانه
.
او غم قطارینی اشرار ایله فشاره سالوب
رقیّه رنگی غم و غصّه دن سولوب سارالوب
.
یاتانمیوب گیجه لر گلدی شیون و داده
ویرردی صبرینی صدّیقه زینبین باده
.
یوواردی صفحۀ رخسارین اشک آلیله
دیردی اوز اوزینه بو زبانحالیله
.
غریبه قلبیمی اودلاندیروب بوگردش پیر
انیس اولوب منه عمریمجه نالۀ شبگیر
.
ایدردی اوج اونون ناله سی حجاباته
دیردی دردینی فیّاض اهل حاجاته
.
گتوردی درده منی رنج و انزجار و تعب
منیم بوحالتیمه شاهد اول اوزون یارب
.
گواهسن دلیمه لخته لخته قان دوزولوب
گوزل عمومدن آتامدان منیم الیم اوزولوب
.
عزیز عالمیدیم عزتیم گیدوب الدن
شکسته دور اورگیم غم منی سالوب دلدن
.
جهاندا دورِ کجِ روزگار کج روشین
منی صغیره لیقیمدا ایدوب خرابه نشین
.
نقدر جام گوگل لخته قانیله دولاجاق
نه وقته دین بو خرابه منه مكان اولاجاق
.
مدام گلشن فرقتده عندلیبم من
باشیم بلالی دور از بس بلا نصیبم من
.
اگرچه شه قزییم سبط شاه مؤتمنم
ولی خرابه نشینم غریب بی وطنم
.
جهاندا بیرجه منیم تک بلا چکن بوخدور
گوزونی حسرتیله یوللارا تیکن یوخدور
.
نهادیمه غم هجران شراری اود ووردی
منی شکنجه و آزار جانه دویدوردی
.
داخی من ایستمورم بو حیات عاریه نی
قوتار بو عمریمی یاربّ قیل خلاص منی
.
صغیریکن آتاسیز من یاشاماقی نیدرم
اودور که ئولماقیمی یارب آرزو ایدرم
.
مدام انیسیدی بو طرز درد و محنتیله
همیشه شامی ایدردی سحر بو عادتیله
.
او قدر بیرگیجه داد ایتدی اول مصیبته توش
پوزولدی حالی دوشوب نطقدن اولوب خاموش
.
یوخی دوتوب گوزونی یوخلادی او نازلی بالا
باباسینی یوخی حالینده ایلدی رؤیا
.
شکایته دل آچوب اول بلالی گلدی دله
اورکلنوب باباسی محضرینده ایتدی گله
.
دیدی نه حالدیَم ای بابا گوزوندن ایراق
نقدر گور منه ظلم ایلیوبدی اهل نفاق
.
بابا فراقون اوخیله بو باغریمی دلدیم
باشا ووروب باشون آردینجا شامه تک گلدیم
.
ایاقلاریما باتوبدور او قدر خار بابا
اولوب ایاقلاریمین آلتی زخمدار بابا
.
دم زیارتوی آرزو ایدردیم من
عیادت ایتماقا گلدون غریب وقتده سن
.
بیر آز ایدوبله او دم درد دل آتیله بالا
آچوب قولون باباسی بوینونا رقیّه سالا
.
قولی دوشوب یانینا اول غم و بلایه دچار
امیدی یأسه دونوب اولدی خوابدن بیدار
.
باباسی یوخدی یانیندا گوروب او دلخسته
خرابه یرده یاتوبدور ولی تراب اوسته
.
.
گوزینده دوندی اونون اشک حسرتی قانه
دولاندیروب یوزینی زینب پریشانه
.
.
دیدی علاج ایله ای عمّه بتول شیم
یاتانمورام من دلخسته و دچار الم
.
سزیلتی هم نفسیمدور منیم نه مدّتدور
بابامدان آیریلالی گولمیوب یوزوم بیر دم
.
ئولونجه من بابامین سالمارام آدین دلدن
اوزون بولوزسن ای عمّه باباما سُوگلیم
.
او چوخ سُؤَردی منی منده چرخ سُؤَردیم اونی
او دور که آرینیتیندان منه یتور چرخ غم
.
دیردون عمّه منه هی بابان ایدوبدی سر
یولونا تیکمیشدیم گوز اورکده داغ اَلَم
.
بو نصف شبده بو عالی سعادته یتدیم
عیادت ایتماقا گلدی منی او میر حرم
.
منی قوجاقینه آلدی اَزَل اوپوب یوزیمی
کمال لطفیله دل یاره مه سالوب مرهم
.
یوزومده نیلی سیلی گوروب گوزی دولدی
قابار ایاقلاریما باخدی تاجدار اُمَم
.
گورنده جسمده بو تازیانه یرلرینی
آخوب سرشگی گوزیندن ایدوب عذارینی نم
.
دیدی قزیم نیه بس گل یوزون اولوب نیلی
دیدیم ووروب یوزیمه سیلی شمر کفر شیَم
.
دیدی ندن گریروبدور بالا سنون بدنون
دیدیم او قدر ووروب تازیانه اهل ستم
.
ایاقلاریندا سوروشدی قزیم قبار ندور
ایاق یالین دیدیم از بس خُرام ایلمیشم
.
دیدی قولاقلارون اولموش ندن قزیم یاره
دیدیم که یاره لیوب ظلم الیله قوم ظُلم
.
دیدی قزیم سارالوبسان ندن ساری گل تک
اولوبدی گل یوزیوه اشگ حسرتون شبنم
.
دیدیم که یاتمیشام از بس یوزوم قوری یرده
سارالمیشام ساری گل تک اودور که رخ زردم
.
دیدی ندن بیله آشفته دور سنون حالون
ندور دلیلی که زلفین اولوب بیله درهم
.
دیدیم که آیریلالی سندن آغلاماقدان من
مجال ایدوب باشیما شانه ایلینمه میشم
.
دیدی که نازیوی مندن صورا چکر بالاكیم
دیدیم محبتیله نازیمی چکر عمَّم
.
سیلردی گوز یاشیمی باشیمه چکردی الین
آلاردی گوگلومی اول شهریار غصّه حشم
.
دیمه لی دردلریم قالدی سینه ده دیمه میش
منی قویوب بیله گیتدی بابام هارا بیلمم
.
یاتانمورام دور الیمدن یاپوش دوروم ایاقا
خرابه نی دولاناق منله عمّه جان باهم
.
بابام خرابه ده دور بلکه بیر تاپام بابامی
اورکده چوخدی سوزوم اونلا درد دل ایلیم
.
تاپانماسام بابامی محنت فراقینده
دؤزنمرم داخی من عمّه جان یقین ئوللم
.
.
.
رقیّه نین سسینه هر یاتان بالا دوردی
یغیشدی آل عبا بزم درد و غم قوردی
.
خرابه کنجی نی دولدوردی شور و ناله و آه
قاریشدی بیربیرینه عترت رسول الله
.
شرار آهیله اطفال سینه داغلادیلار
رقیّه آغلادی آل رسول آغلادیلار
.
ویروبسه سس سسه یکسر مخدرات حرم
ایشیتدی بو سسی ناگه یزید کفر شیَم
.
بو نصف شبده سوروشدی بو وضع حال ندور
بو آغلاماق بو سزیلتی بو قیل و قال ندور
.
جواب ویردیله اول شوم کینه بنیاده
یاتوب رقیّه باباسین گوروبدی رؤیاده
.
دوروب او نازلی بالا اوز باباسینی ایستر
بو سوزده رحمه گلوب اول لعین کین گستر
.
دیدی گلون آپارون رأس شاه عطشانی
ویرون او طفله یوزه توکمه سین جگر قانی
.
خرابیه سر سلطان انس و جان گلدی
رقیّه جسمینه واقعده تازه جان گلدی
.
اولوب مماتینه باعث او باش حیاتینده
واریدی تازه حیاتی ولی مماتینده
.
گوروب او باشی اوركدن خانم توان تاپدی
عزیز آل عبا بیر عزیز جان تاپدی
.
توکوب سرشگ یوزه چشم اشکباریندن
شکایته دل آچوب شرح روزگاریندن
.
دیدی وئربدی بابا شامه گوندوزوم سنسیز
سولوبدی باد جفائیله گل یوزوم سنسیز
.
انیس دل منه بونالۀ حزینیمدور
قرانلیق ایوده چراغ آه آتشینیمدور
.
گلن شماتت ایدوبدور منه عداوتیله
دونوبدی قانه بو گوگلوم بابا شماتتیله
.
نجه هزار خزان دیده شاد اولا بُولمز
بو هجر ایوینده رُقیّه نده شاد اولوب گولمز
.
دوشوب وجودیمه اود هجرون احتراقینده
اولوبدی قان اورگیم وصلون اشتیاقینده
.
گیچرگونوم نچه مدتدی آہ و زاریله
یولووی گوزله میشم چشم انتظاریله
.
گوزومی یولدا قویوبسان بابا نه مدّتدور
مگر بو رسم و طریق ره محبّتدور
.
نجه اولار باباجان بیر عزیزۂ ایام
خرابه گوشه سینی ایلیه اوزینه مُقام
.
وجود خسته سینه دست غم ویره مالش
تراب بستر اولا خشت پاره لر بالش
.
غم فراق اونون صبرینی الیندن آلا
مدام اللری قوینوندا حسرتیله قالا
.
نه نوع توکمز اوزه اشگ بیر بالا گوزدن
اولا اسیر آتاسی سالا اونی گوزدن
.
ندن رقیّه وی مدتدی یاده سالمورسان
گلوب خرابه ده دردین اورکدن آلمورسان
.
خرابه ده دیموسن بس بالام رقیّه قالوب
سموم محنتیله گل کیمی سولوب سارالوب
.
رقیّه نی بابا عالمده چوخ سُؤَردون سن
آتوبسان ایمدی نولوب دویموسان مگر مندن
.
عیان اولور بو شکستیم بابا بو بیر سوزدن
سنون عزیزه ویدیم سالموسان منی گوزدن
.
وصال گلشنوه دائماً هزاره ایدیم
مَهِ جمالیوه بیر عمر من ستاره ایدیم
.
او ساعتی که من آیریلمیشام بابا سندن
سزیلتیم آغلاماقیم آیری دوشمیوب مندن
.
خرابه یرده خصوصاً مصیبتیم چوخ اولوب
یانان دلیم بابا جان درد حسرتیله دولوب
.
مدام حسرت دل همنفس اولوب منیله
خوش آرزومیدی بیر روبرو اولام سنیله
.
هزار شکر که غمدن بو قلب دینجلدی
همین اورکده اولان مطلبیم اله گلدی
.
قوتولماقا غم هجراندن برات آلدیم
وصال دامنیوی بیر گیجه اله سالدیم
.
خلاص اولدی دلیم درد انفصالوندان
گوتورمرم الیمی دامن وصالوندان
.
بو ساعتیم بابا بیر عمریمین برابریدی
او عمر اصغریمین بو دقیقه اکبریدی
.
دلینده ناله گُلین ایتدی زینت آغوش
گل اوسته اوخشادی بلبل کیمی اولوب خاموش
.
صغیر سنیله بیر عالی امتحان ویردی
متاع وصلین آلوب مژده نقد جان ویردی
.
سالوب او حال اسفناکی اود بو آفاقه
آتا باشی قوجاقیندا یخلدی توپراقه
.
او عندلیب ادب اوندا کی خموش اولدی
عزیز فاطمه نین یاسلی گل لری سولدی
.
گلوبدیلر باشی اوستونده شور و افغانه
خرابه گوشه سینی ایتدیلر عزاخانه
.
ایدردی ناله خواتین شهریار عرب
شرار آهیله اودلاردى عالمی زینب
.
یتیشدی بیر یره سوز سندی خامۀ تائب
مداد اشگیله ایسلاندی چامۀ تائب
.
حسین آدین ائلیوبدور الینده دست آویز
اونا شفاعت ایده جدی روز رستاخیز
.
.
#حضرت_رقیه_تائب_تبریزی
#حضرت_رقیه_شهادت
#بنات_فاطمیه_منزل_اولدی_ویرانه
#ترکی
.
#زبدةالاشعار
.
: @nohe_torki