احوالات اهل بیت عصمت و طهارت در راه شام
.
#زبدةالاشعار
.
: @nohe_torki
.
.
.
بخش اول این متن در هشتک زیر
#اولوب_چون_آل_علی_دستگیر_لشکر_شام
.
.
.
مرحوم تائب تبریزی
.
بو بیر خبردی که نظمه دوزولدی عنوانی
وار اوزگه بیر خبر اودلار تمام دنیانی
.
بو طرزیله که بیان ایلورم بو غملو سوزی
همین بو طرزیله «خسروشهی» بویورموش اوزی
.
علاوه ذکر ایلیوب «سید شهاب الدین»
همین بو واقعۀ درد و غمفزا شرحین
.
علاوه بوندان ایکی عالمین دین سوزودی
کتابه ابن شَکوئی یازان سوزون اوزودی
.
همین کتاب آدی «مصباح» دور او شیخ کبار
صحیفه اوچ یوز و دوخسان بشینده بیله یازار (1)
.
شکسته حالیله اطفال شهریار نجف
گیدردی شام یولوندا دیار شامه طرف
.
حسین یتیمه لریندن بیری چوخ آغلاردی
اسارته دؤزه بولمزدی سینه داغلاردی
.
او دمده زجر دیدی آز منی کباب ایله
یتیمه بسدی داخی ناله ایتمه بیر بیله
.
اورگی درده گلوب تازه دن او نازلی بالا
یوزون جدایه دوتوب عرض قیلدی یا ابتا
.
بو بس دگول که سو ویرموبله ئولدورنده سنه
یول اوسته مانع اولور زجر آغلینده منه
.
دیر ووراق سیزی بیز ئولدوراخ سیز آغلامیون
دانشمیون دیمیون بلکه سینه داغلامیون
.
بو سوزده زجر شقاوتده حددن چیخدی
او نازنین بالانی ووردی ناقه دن یخدی
.
او ساعتی که اونی زجر ناقه دن سالدى
دوشوب او دشتده بیهوش او نازنین قالدى
.
حسین تشنه لبه تشنه لب جگرگوشه
بیر آز صورا آییلوب ضعفدن گلوب هوشه
.
گوروب قبیله گیدوب وار نه عمه لر نه آنا
دوروب ایاقه قاچوب بیر قدر اویان بویانا
.
حیاتدن داخی اول نازنین الین اوزدی
یول اوسته گل یوزونه اشگ دانه سین دوزدی
.
قاچاردی صاق صوط سسلردی عمه جان گیتمه
آماندی ساخلا ایاق باغریم اولدى قان گیتمه
.
آماندی ناله سسیم چرخ اطلسه چیخدی
ستمله زجر منی ووردی ناقه دن یخدی
.
دلینده ناله زبس که دولاندی خار اوسته
او گلعذار یورولدی داخی اولوب خسته
.
#امر_امام_سجاد_به_یافتن_دختر_امام
.
جواب گلمدی اولدی جوابدن مأیوس
دگیشدی طرز بیانین او محنته مأنوس
.
دلینده واابتا دمبدم گلوب داده
دیردی چولده یخلدیم بابا یتیش داده
.
ندن رسوم وفانی بو چولده ترک ایدوسن
قالوب یتیمه قزون ای بابا هارا گیدوسن
.
ایدنده بو دلیله ناله گوزده گوز یاشی
جداده دوردی داخی گیتمدی حسین باشی
.
گلوب یتوردیله سجاد امامه احوالی
اولاندا سید سجاد او حالدن حالی
.
بویوردی زینب نالانه عابد نالان
بابام باشی دایانوب آیری سرّ ایدور اعلان
.
یتیمه قزلارا سن ویر بو یرده سان عمه
دوشوب یول اوسته یقین واردی بیر قالان عمه
.
گچوب او حالده گوز یاشی زینبون قاندان
گچیتدی قزلاری یول اوسته بیر به بیر ساندان
.
#مباشرت_زینب_برای_یافتن_دختر
.
چاغوردی قزلاری بیربیر آدیله اول بیکس
جواب ویردی هامی لیک ویرمدی بیر سس
.
بولوب دوشوبدی یول اوستونده بیر یتیمه قالوب
بو قصه زینبین الدن قرار و صبرین آلوب
.
اورک یانوب گوزونی گوز یاشیله دولدوردی
گلوب نوایه ایکی اللى باشینه ووردی
.
اوزونی ناقه دن آتدی یره او کان ادب
مباشر اولدی اونی تاپماقا خانم زینب
.
گلن یولا قییدوب دیدۂ پر آبیله
سراغ ایدردی او شیرین دلی شتابیله
.
گوزونده اشگ دلینده نوا او کان حیا
گزردی چولده ایدردی بو دللریله ندا
.
.
هایاندا قالموسان ای سینه مین قراری بالا
سسیمه سس ویر حسینون گل بهاری بالا
.
بو دشته شور سالوب هاردا دوشموسن دیلسیز
حجاز گلشنینون خوشنوا هزاری بالا
.
دولانورام چولی هر یردن عطریوی آلورام
دوتوبدی عطرون عجب دشت و کوهساری بالا
.
دولانموسان چولی بوللم چوخ عمه سسلموسن
یورولموسان کسیلوب سینون اختیاری بالا
.
پیاده قاچموسان از بس بو چولده صاق و صولا
ایاقوین بولورم واردی چوخ قاباری بالا
.
قابار ایاقلاریوین آلتینا باتوبدور خار
یتوب ایاقلاریوا چوخلی زخم کاری بالا
.
ایاقلارون قانی صحرانی قرمزی بوییوب
ویرور بو دشت نشان صحن لاله زاری بالا
.
سخیملوسان دی گوروم هانسی خار سایه سینه
حسین تشنه لبون طفل گلعذاری بالا
.
گل اوزلی غنچه دهن دوشدون آیری گلشندن
هایاندا اولدی خزان عمریوین بهاری بالا
.
بولنمورم که سن آهو باخشلی کبک خرام
هایاندا اولدون اجل دامینون شکاری بالا
.
اوزون دوشوب بو بیاباندا قالموسان یالقیز
یول اوسته ساخلاموسان بیر بلوک قطاری بالا
.
قالوب آنان نگران وای بالام دیر آغلار
ایدوب سرشگی گل آلوده رهگذاری بالا
.
یول ایسلانوبدی زبس گِل نشین اولوب ناقه
دوشه قطار یولا یوخدی اقتداری بالا
.
حیالی فاطمه هی سسلنور باجیم قالدى
دوتوبدی کوه و بیابانی آه و زاری بالا
.
اودور بو قافله نین ماهی سنده اولدوزیسان
سنون یولوندا قالوب چشم اشگباری بالا
.
گوزتلوری یولوی آغلوری آنان لیلا
علی اکبرین ای نازلی یادگاری بالا
.
بابان باشی دایانوب نیزه ده داخی گتمز
باخور گلن یولوا چشم انتظاری بالا
.
حسیندن خجل اولام آپارماسام سنی من
گوزتلوری منی اول عشق تاجداری بالا
.
.
دلینده وای بالا حیران گزردی صحرانی
او چولده بلکه سلامت تاپا او نالانی
.
یاناردی دلدن او خاتون او حال پر آسفه
علاقه سی اونی هردم چکردی بیر طرفه
.
#مکالمه_حضرت_زینب_با_مادر
.
یتنده بیر یره گوردی او معدن عصمت
کنارده اوتوروب بیر سیاهپوش عورت
.
آلوب همین بالانین باشینی دیزی اوسته
محبّتیله اونی ساخلیوب گوزی اوسته
.
زبس او قز یورولوب عالمی نظردن آتوب
او عورتون دیزی اوستونده دینجلوبدی یاتوب
.
چاتوبدی عین مرامه او سوز و سازیله
جهانه ناز ایدوری یوخلیوبدی نازیله
.
بویوردی زینب مظلومیه او حور سیر
یتیمه نی بیله ساخلالا بو جهاندا مگر
.
یتیمدار اولان نازیله گیجه یاتماز
یتیم اوشاقلاری گوزدن دقیقه ای آتماز
.
آلوب کنارینه هر درد و غصه دمسازین
چکه ئولونجه گرک هر یتیمه نین نازین
.
علاوه سنسن حسین شهید قیّومی
گوز اوسته ساخلاگیلن بو صغیره مظلومی
.
سنه نقدر قزیم ناز قیلسا نازیله
تمام نازینی چک سنده مین نیازیله
.
بو سوز جهانده مشهور دور مسلم دور
یتیمه گوگلونی آلماق ثواب اعظمدور
.
نقدر زحمتی چوخ اولسا آز حساب ایله
یتیمه دور بو بالا گوگلون آل ثواب ایله
.
بو نازدانه نی سن جان کیمی کناریوه آل
اورک یارالارینا خوش دلیله مرهم سال
.
یانوبدی نچه زماندور آتا فراقینده
بونون خزان اثری واردی گل دوداقینده
.
یاخونلاشوب گوروسن عمر گلشنی سولسون
او قدر قالموری عالمده غصه مرگ اولسون
.
آماندی مهر و وفا رسمینی ایتیرمه قزیم
یتونجه شامه بو قزدان گوزون گوتورمه قزیم
.
خرابه یرده حسینون باشی قوجاقینده
غمیله جان ویره جاق دور دوداق دوداقینده
.
بو سوزده زینب مظلومه اودلانوب دلدن
خطاب قیلدی بیان ائت منه گوروم کیمسن
.
مگر عزایه باتوبسان نه غم لباسیدی بو
گیوبسن اگنیوه آیا کیمین قراسیدی بو
.
اوزیوی ایلموسن هانسی شمعه پروانه
بو ساچلارون بویانوب هاردا قرمزی قانه
.
ندن بیله پوزولو بسان دچار محنت سن
ندور دلیلی که بیله خمیده قامتسن
.
توکورسن اوغلى ئولن لر تک اشگ خون گوزدن
بو قان کیمین قاندور زلفوه باخوبسان سن
.
بلالی زینبون اود سالدون اودلی سینه سینه
سسون چوخ اوخشیوری فاطمه آنام سسینه
.
منیم آنامدا بیله خوش بیان و صحبتیدی
اودا سنون کیمی عیناً خیمده قامتیدی
.
خمیده قدّلوقوندان بتوله منظر سن
بیانده دانیشقدا آنامه بنزرسن
.
جواب ویردی خانم زینبه او حور شیم
بلا خزینه سی پهلو شکسته فاطمه یم
.
او گون که ثانی ایاقدان منی ستمله سالوب
سینوب قابرقالاریم قامتیم خمیده قالوب
.
مدینه دن چیخالی بو خمیده قامتیله
الیم بئلیمده دولانّام بنات عصمتیله
.
بو قاره که گوروسن درد و غم لباسیدی بو
عزالی بیر آنیام اوغلومون قراسیدی بو
.
شهید اولوبدی بالام قالموشام یانا یانه
بو ساچلاریم بویانوب قتلگاهده قانه
.
دیوم صریح همین قان حسین نشانه سیدور
اولونجا حشر منه آغلاماق بهانه سیدور
.
سزیلدارام دیرم نور هر دو عینیم وای
دوزن بلالره مظلوم ئولن حسینیم وای
.
دیمه که عترتیمی بیر دقیقه ترک ایدرم
بالالاریم گیده هر سمته آردیجا گیدرم
.
حسین یتیمه لریندن گوتورمرم گوزومی
بیر آن چکمرم اطفالدن کنار اوزومی
.
سینوب قابورقالاریم گرچه ناتوانم من
یتیمه قزلاریما لیک پاسبانم من
.
گیدنده هوشدن هر بیر یتیم دلخسته
محبتیله باشین آلموشام دیزیم اوسته
.
آلوب او خستۀ آلامی جان تک آغوشه
گتورموشم اونی مین رأفتیله من هوشه
.
دوشنده خوفه بیری آلمیشام اورک سوزونی
حسینیمون یرینه اوپموشم گوزل یوزونی
.
ایدنده ناله قزیم سن فغان و شیونیله
اوزومده اولموشام هر یرده همصدا سنیله
.
سنیله هر یره باهم گلوب دوللانام من
سسیوه سس ویررم غملریوه یانّام من
.
غرض او نوگل نوخیزی حضرت زهرا
او باغبان غمه ویردی دیلده شور و نوا
.
او گلعذاری خانم اوز قوجاقینه گوتوروب
یوزون او په او په محنت قطارینه یتوروب
.
ایدوبسن ایمدی که #تائب قبول خدمت شاه
یازاندا یاز سوزوی خاطراً لِوَجهِ الله
.
اولار که دیدۂ تحقیریله باخور سوزیوه
اولوبلا منکر معصوم نه سنون اوزیوه
.
تنور خولیه فریادیله گلن زهرا
تاپار یول اوسته بالاسین بدون چون چرا
.
او حالیله گوره گر زینب فرشته مآب
او یازدوقون تک اولار مطلقا سئوال و جواب
.
(1) مصباح الحرمین – عبدالجبار بن زین العابدین شکوئی
.
#راه_شام_تائب_تبریزی
#بو_بیر_خبردی_که_نظمه_دوزولدی_عنوانی
#ترکی
.
#زبدةالاشعار
.
: @nohe_torki
نظر دهید