ترحم ایتدی او بی کسلره امام فخار #اربعین_عاصم_تبریزی

اربعین
وداع از کربلا و بازگشت به مدینه
.
.
مرحوم عاصم تبریزی
.
ترحم ایتدی او بی کسلره امام فخار
گوروب که آز قالور اولسون هلاک خرد و کبار
.
آیردی عمه لرین رأفتیله باجیلارین
مزار پاک حسیندن بدیدۀ خونبار
.
کجاوه ده هاموسی اگلشوبله دیده پرآب
مدینه سمتینه نالان اولوبلا راه سپار
.
گئدردیلر دالیا بویلانوب باخاردیلا چوخ
همین او نوعیله زوّارلر ایدر رفتار
.
گیده گیده دولانوب سسلیردی جان آقا جان
آیردی بیزلری سندن سپهر کج رفتار
.
سواد شهر مدینه گوروندی گوزلرینه
مخدّرات حرم چکدی آه آتشبار
.
ویروبله سس سسه بیردن دیوبله واجدّا
ایا محمّد محمود وی ملک دربار
.
بویوردی حضرت کلثوم با دل سوزان
ایا مدینه ی جدّیم پیمبر مختار
.
داخی قبول ایلمه بیزلری دوباره گلاق
چیخاندا واریدی سندن نقدری یار انصار
.
شهید اولوب هاموسی گلموشوق دل افسرده
سنه گلاق نه یوزیله هانی بیزه غمخوار
.
کنار شهریده بیر مجلس عزا قورولوب
سرشکلر توکولوب گل یوزه چو ابر بهار
.
بشیری ایستدی مظلوم امام محضرینه
بویوردی سنده دیرسن آتان کیمی اشعار
.
ایدوبدی عرض سنه قربان اولوم بلی بلّم
بویوردی گیت ایله بو حالی شهریده اظهار
.
بشیر الده علم گردنینده شال عزا
گیده گیده دیدی یا اهل یثربی تکرار
.
یتوشدی روضۀ پیغمبره ایدوب تعظیم
حسینین ئولماقین ایتدی پیمبره اخبار
.
اوجالدی شهریده سس وا حسینیله دولدی
قاریشدی بیربیره شهر اهلی جمله خرد و کبار
.
دیر بشیر نگوردوم بیر عورتی گلوری
دوتوبدی بیر بالانین اللرین الینده او زار
.
سئوال ایتدیم او عورت او ماه پاره بالا
دیون بولار منه کیمدور یا اولوالابصار
.
دیدیله کیم بودی عباس آناسی ام بنین
گلوبدی ایلیه اوغلانلارینی استفسار
.
سئوال ایتدی ازلده حسین تشنه لبی
دیدیم شهید ایلدی تشنه لب اونی کفار
.
ایشیتجاقین دیدی ایوای سوسوز ئولن بالا وای
اوزین ایتوردی خانیمدان گیدوبدی صبر و قرار
.
دیدیم خانم اولا جانلار وفاسینه قربان
سوروشموسان ندن عبّاسی ای حمیده شعار
.
دیدی حسینیمه قربان اولوم بشیر مگر
حسینیدن صورا عبّاس ذکر اولا زینهار
.
اولار فدادی حسینه نه عون و نه جعفر
ویروب هاموسین حسینه آنالاری چون یار
.
وفای حضرت عباسه شیعه لر قربان
ایله وفالی خانیمین ایله بالاسی اولار
.
ایله وفالی بیر قارداش گلمیوبدی دنیایه
ایله جوانی بو دهرین آناسی بیرده دوغار
.
واروندی یاخشی بیان «عاصما» الین ساخلا
عنایت ایسته خدادن سوزیندن اولما کنار
.
.
.
#اربعین #عاصم_تبریزی
#اربعین_وداع
#ترحم_ایتدی_او_بی_کسلره_امام_فخار
#ترکی
#زبدةالاشعار