حالات وداع و شهادت حضرت علی اکبرعلیه اسلام
.
#زبدةالاشعار
.
: @nohe_torki
.
مرحوم غلامعلی باقری الهام (هوشی تبریزی)
.
تلطّفیله نظر قیل علی بو نالانه
باجوا رحم ایله گیتمه بو قانلی میدانه
.
دوروبدی قتلیوه آماده فرقۀ بیداد
بویالّا زلفویوی گئتسن اگر قزل قانه
.
نجه دوزوم غم هجرونده من نجه دایانوم
نجه بو دردی سانوم سهل گلموم افغانه
.
گلِ جمالیوه طالبدی چشم پُر حسرت
نه گل نه گلشنه نه سروه نه گلستانه
.
مدینه ده علی صغرا باجیم سفارش ایدوب
گل اگلش ایمدی سنون زلفوه ایدوم شانه
.
دلیم اسر حرکت ایلین زمان زلفون
ایدوبدی مرغ دلیم چون او زلفی کاشانه
.
باجوی ایله ایدوب محو طلعت حُسنون
محالدور که باخام بیرده ماه تابانه
.
شراب وصلیویله ایله مست و مخمورم
گویول اینانموری بو تیزلیقدا هجرانه
.
گورن زماندا بو گل جسمی زینت میدان
روادی چوللره دوشسون باجون علی یا نه
.
روادی گورگیله سنسیزعلی صغیره باجون
اسیر ظلم اولا قول باغلی قوم عدوانه
.
جدا باشیندا باشون رهنما اگر اولسا
گیدرم اهل جفائیله چکسه هر یانه
.
ایله خیال فراقون سالوبدی جانیمه اود
سپند وار یانار دل او نار سوزانه
.
گل اگلش ایمدی دوروم بیرده باشیوه دولانیم
نه نوعی که دولانار شمع عشقه پروانه
.
آنام گیوندوروبدی و یا ایتموسن اوزون زینت
گیدورسن اولمیا مهمان حضور جانانه
.
سزادی قارداش علی جان قویام یولوندا سنون
فدای عشقون اولام واردی منّتی جانه
.
دالونجا خوشدی سنون یوللارا گلاب سپم
دوزولوب اشک محبّت اودور که دامانه
.
یول اوسته لازمه دور بیر اوپم ایاقوندان
تسلّیِ دل اولا بو دل پریشانه
.
آناما ایله نظر بیرده چشم رأفتیله
نه حاله گور قالوب آخر او خانه ویرانه
.
یوخودی طاقتی گلسون یقین مشایعته
گیدوبدی طاقت و آرام و صبری تالانه
.
اگر چه لیلیدی هجرونده لیک اولار مجنون
خیال وصلیویله آخر دوشر بیابانه
.
او زُلف طول و درازوندی بوینما زنجیر
کأنّهُ چکولوب قید و بنده دیوانه
.
نه خوش دوشوبدی او آغ یوزده هاشمی خالون
که مرغ دل ایدوری فرض او خالیوی دانه
.
قالار نه حاله باجی قارداش افتراقینده
بو سرّعـشقی بولر آنا نه بیگانه
.
دله دوتوب باجیسون یوللیوب خیامه طرف
او شاهزاده اوزی یوز قویوبدی میدانه
.
یتنده مرکز میدانه شبه پیغمبر
دوروب دایاندی مقابل صفوف عدوانه
.
یازوللا یوزده او شهزاده نون واریدی نقاب
نقابی وُردی او گل تک جمالیدن یانه
.
جمال حضرت ختم رسُل اولوب ظاهر
تعجّب یوز ویروب اول قوم کینه بنیانه
.
توکوب سلاح لرین جمله چکدیلر صلوات
دونوکلوق اوز ویره آز قالدی فوج عدوانه
.
دیردیله بو پیمبردی آشکار گلوب
حسینه نصرت ایچون بو بلالی میدانه
.
محال دور چکه شمشیر اوز پیمبرینه
او اُمّتی که وار اوندا عقیده قرآنه
.
پیمبریله هر امّت اگر قتاله چیخا
هر ایکی عالم اولار روبروی خسرانه
.
بو ماجرانی گوروب لیک زادۀ وقاص
خطاب قیلدی بو طرزیله اهل خذلانه
.
دگول پیمبر اکرم اَیا گروه دنی
بو نوعی ایلمیون اشتباه کورانه
.
شبیه ختم رُسل دور بو شاهزادۀ جوان
علیّ اکبر آدی هم حسـینه دردانه
.
آلون کنارینی یکسر ورون خدنگ جفا
نشان ایدون بو گوزل جسمی تیر پرّانه
.
هوای ملک سالوبدور منی بو سودایه
ریاست عالمنون وار نه ربطی ایمانه
.
ویروبدی کوفه ده فتوا نچه بیوک عالم
الیمده واردی مدارک همان بو عنوانه
.
چخوبدی دیندن حسین ابن فاطمه مطلق
گرک قانی توکوله صفحۀ بیابانه
.
او قدر ایلدی ترغیب لشکری جنگه
همیّت اوز ویروب اول قوم نامسلمانه
.
قتال حجّت حقّه اولوبلا آماده
جری اولوبلا او پورِ ولیّ سبحانه
.
او شاهزاده گوروب چیره دشمنی چیره
پناه آپاردی او ساعتده حیّ منّانه
.
بسان قهر الهی او نوجوان دلیر
ال آتدی قبضۀ شمشیر تیز برّانه
.
بیر الده قبضۀ شمشیر تیز آتشبار
سپر بیر الده دوتوب اول جوان فرزانه
.
هواده ظاهر اولان دمده برق شمشیری
چو ابر بارش خون یاغدوراردی میدانه
.
اوزون وروب قوشونا مثل حیدر کرّار
گتوردی بحر بلانی او چولده طغیانه
.
پوزاردی شیر ژیان تک صفوف اعدانی
او قوم روبَهَه حمله ایدردی شیرانه
.
او قدر گچمدی لشکر دوتوب فرار یولون
شکستلیق ویروب یوز اول گروه بطلانه
.
توکردی تپراقا باشسیز بدنسیز قول
هواده باشلاری بنزردی گوی چوگانه
.
کیمون ویراردی کمردن کیمونده فرقیندن
روان ایدردی همین ضربتیله نیرانه
.
واریدی کیمده او جرأت او اقتداره اولا
بیر ایله دمده مقابل او شیر غُرّانه
.
دولاندوراردی اجل شُربی ساغر تیغی
ویرردی مرگیدن هر تیره بخته پیمانه
.
او قدر جنگ ایلدی قان توکوب اولوب خسته
علاوه بیر نچه یاره دگوب او ذی شأنه
.
ز بسکه قان آخوب اولدی وجودی بی طاقت
خسوف حالی ویروب یوز اوماه رخشانه
.
یتوب او وقتیده منقذ الینده تیغ جفا
بیر اوزگه جرأت ایدوبدور او شاه خوبانه
.
وجودی ضعفه دچاراولدی دولدی قانیله
او گوز که نرگس او گوزدن آلاردی پیمانه
.
او قدر ویردولا یاره او شبه طاهایه
وجودی اولدی یاره دن خانه بخانه
.
دایانا بولمدی شهزاده صدر زین اوسته
یخلدی یاره لی جسمیله قانلی میدانه
.
شکسته حالیله یوز دونروب خیامه طرف
خطاب قیلدی بو نوعیله شاه عطشانه
.
هرایه گل بابا جان سالدیلار منی آتدان
فدا گلن یولووا ایله لطف شایانه
.
آلوبدی دوره می دشمن بابا گوزوندن ایراق
ترحّم ایله بو صون دم بو قانه غلطانه
.
بهارعمریمه گل صرصر خزان اسدی
مبّدل اولدی امیدیم بو چولده حرمانه
.
او قدر ویردولا یاره داخی یوخومدی توان
گلم دوباره حضوره که گلمور امکانه
.
جوانیکَن ویرورم جان اورکده بو حسرت
الیم یتوشمدی بیرده بابا او دامانه
.
بو صون نفسده اوزون درک قیل بو ناکامی
که کام آلوم بو وصالیله قلب نالانه
.
اگرگورم سنی بو صون نفس باشیم اوسته
تمام عالمی ویرمم بابا او بیر آنه
.
قازوبلا چاه جفا یوسفیوه ای یعقوب
محال دور گله بیرده دیار کنعانه
.
خیامیده خبر ایله آنام باجیم عمّم
غمیمده ایلیه برپا بو گون عزاخانه
.
اگر چه جان ویرورم باش یارا بدن یاره
بو افتخار ولی بسدی بیله قربانه
.
فدای دین حق اولدوم بو قانلی صحراده
بو یولدا بذل ایلدیم باش و جان دلیرانه
.
توکولدی قانیم اگر چه ولیک ویردی صفا
بو قانلی چولده گلستان دین و قرآنه
.
اگر چه تشنه ام امّا خوشام سعادتیمه
یتوشدوم آخر عـمرومده آب حیوانه
.
اوغول سسین او زمان آلدی سرور بطحا
کمال سرعتیله یوز قویوبدی میدانه
.
یتوشدی گوردی نه میدان که بیر یَمِ خوندور
او بحر خون ورُوری طعنه بحر عمّانه
.
گلور تموّجه بحر بلا او صحراده
گوزی ساتاشدی او بحر بلاده مرجانه
.
چکه کناره او قاندان گرک او مرجانی
بیر اوزگه حال ویروب یوز او شاه دورانه
.
اوزونی آتدی یره ذوالجناحیدن اُول شه
سورونه سورونه یتوشدی او جسم شان شانه
.
باشینی آلوب دیزی اوسته یوزه توکوب قانیاش
یتوردی نالۀ وا اکبرا صداسنی کیوانه
.
اگیلدی قویدی یوزون نوجوان اوغول یوزونه
اوغول قانیله بویاندی محاسنی قانه
.
دیدی اوغول علی سندن صورا بو دنیانون
اولیدی باشینه کول ای جوان فرزانه
.
بویادی قانیله کیم زلف عنبر افشانون
فدا اولوم علی بو زلف عنبر افشانه
.
او قدر یاره وروب جسموه گروه دنی
یارالی پیکروین زخمی گلموری سانه
.
ایاقه دور یولوی گوزلوری آنان لیلا
ترحّم ایتگله باری او دیده گریانه
.
اوزون گیدوب ولی قویدون آناوی بی یاور
الیم چاتور نه اوغول قارداشا نه اعوانه
.
اگرچه اوغلوم الیمدن گیدوب ولیک خوشام
خوشام فدای حق طرفیندن بـو لطف شایانه
.
تمام اهل عیالیم تمام ماملکیم
بو سرزمین بلاده فدادی قرآنه
.
ازل کی عهدیمه بو چولده ایتماقا ایفا
قیام ایلدیم آخر بو گونده مردانه
.
هـزار شُکر که عهدیمده قالمادی ناقص
کمال ویردی سنون ئولماقون او نقصانه
.
بوشاتدی سرور دین قلبینی بو سوزلریلن
سرشک چشمنی اوخشاتدی ابر نیسانه
.
خیامه حمل اولونا عَـباده او پیکر
اشاره ایتدی او دم هاشمی جوانانه
.
گوتوردولر او گوزل جسمی بیر عبا ایچره
قورولدی خیمه قباقینده بیر عزاخانه
.
توکولدولر خیامیدن تمام اهل حرم
اولوبلا هاله مثال اول مه درخشانه
.
آناسی گلدی دوشندی اوغول جنازه سینه
اولوب هزاره او گل جسم پاک خندانه
.
دیدی اوغول گوزون آچ گوزلرون بلاسین آلوم
محبّتیله نظر قیل بو دیده گریانه
.
بونه بدندی علی بو نه جسمدور صد چاک
هدف اولوب بو قدر تیغ تیزه پیکانه
.
ترحّم ایلمیوب فرقۀ جفا پیشه
بو قدر یاره وروب بو وجود شان شانه
.
آخوبدی پیکریون سوکیمی قزل قانی
بو شوره زارچولی دوندروب گلستانه
.
نه گلستان نجه گلشن نجه صفالی چمن
که وارمقامده رجحانی باغ رضوانه
.
آچوبدی یاره لرون رنگرنگ گلدی عجب
مثال ایدوب آناوی عندلیب خوشخوانه
.
دلیمده خوش سخنیم واراوغول علی اکبر
گوزومدن اشکیم آخارحسرتیله دامانه
.
منیم کیمی آنییه بیر بیله جفا خوشدور
ویرم اوزعمریمی بوغملریله پایانه
.
باشیوین آردیجه گلّم دیارشاماته
بوزاره منزل اولارگرچه کُنج ویرانه
.
گروه کین آپارار مجلس شرابه گهی
دیار کوفه ده گاهی چکلله زندانه
.
نقدرگلسه بلا صبرایدوب دایانّم من
چکوب آنان باشا جام بلانی مستانه
.
اگرچه قدّیم اولارخم غم فراقینده
وارامتیازیم علی لیک جمله نسوانه
.
سنون کیمی بیراوغول ویرموشم فدادینه
بوعشق عالمیدورسانما سونلا افسانه
.
وگرنه هانسی آنا ال اوزوب جوانیندن
خصوص سنکیمی بیرنوجوان فرزانه
.
وارافتخارون علی بوبلالی صحراده
مُعین اولدون عجب خسروشهیدانه
.
تیکوب بودرگهه چشم امیدینی «هوشی»
عنایتیله نظر قیل او غرق عصیانه
.
اگرچه قافیه تکراری وار بو سوزده ولی
امید وار که پسند اولسون اهل عرفانه
.
.
#اکبریه_هوشی_تبریزی
#اکبریه_شهادت
#تلطفیله_نظر_قیل_علی_بو_نالانه
#ترکی
.
#زبدةالاشعار
.
: @nohe_torki
نظر دهید