در جلالت حضرت اباعبدالله الحسین علیه السلام
ترجمه حدیث قدسی
#گریز به عصر #عاشورا و #قتلگاه #غارت_خیام_شام غریبان
.
✍️زبدة الاشعار✍️
?: @nohe_torki
.
مرحوم سعدی زمان
.
جلالتینده حسینون عقول حیراندور
دگل غلوّ یازیلسا نقدر نقصاندور
.
وجودی مظهر آیات حیّ اکرمدور
فدا اولوم آدینا، آدی اسم اعظمدور
.
خدا که خلق ایلیوبدور بو کون و امکانی
ویروب ظهوره بو خلقتده صنع پنهانی
.
همین بو خلقته اون دورت وجود اولوب علّت
ویروب جهاندا بو اون دورت وجوده چوخ عزّت
.
بولار تمامیسی گُلدور، عزیز دوراندور
نه گُل وجودلری سر به سر گلستاندور
.
حسین وَلِیک بو اون دورد گلشنین گُلیدور
عزیز فاطمه دور کردگاره سوگُلیدور
.
عبث دگل که بونا ایل به ایل دوتولّار یاس
بونون جلالتی اولماز بیر اوزگه شخصه قیاس
.
جلالتینده حسینی لر ایتمیوب اغراق
بونا اولوبدی عزادار و روضه خوان خلّاق
.
سیخشمور عقلیوه مطلب دیمه که حدسیدور
یازان امام، روایت حدیث قدسی دور
.
✔️ ترجمه حدیث قدسی
.
ایدن زماندا مناجات، طور حقده کلیم
خدای عالمه عرض ائتدی ای خدای علیم
.
محمّد امّتینون فرقی سایر امّتیله
ندور کلیمیوه بُلدور بو سرّی حکمتیله
.
اولاندا درگه حقّه کلیم عرض رسا
همان او حالیده سس خلق اولوندی یا موسی
.
نقدر خالقینین خلقه افضلیّتی وار
او قدر امّت مرحومه نین مزیّتی وار
.
شرفده فرقی خداوند چون محال ایلدی
کلیم بو شرفین علّتین سوال ایلدی
.
بویوردی حضرت موسایه خالق حکمت
سبب بو عزّته واردور اولاردا اون خصلت
.
دیدی ندور او خصال، امّتیم ایده منظور
محیط صوتیله اولدی مُحاط وادی طور
.
عَلَم دور امّت مرحومیه گوزل عادات
صلات و صومیله حجّ و جهاد و خمس و زکات
.
پیمبری اولارین خاتم رسالتدور
سبب شرفلرینه جمعه دور جماعتدور
.
کلیمه دوقّوزونی بُلدوروب حق یکتا
اونومجین سوروشاندا بویوردی «عاشورا»
.
دیدی که دوقّوزی واضحدی ای علیم و خبیر
خصال تِسعَه ده لازم دگل منه تفسیر
.
اونومجی لفظیده امّا وار عمده بیر معنا
صریح ویر خبرین، مُستَتَردور عاشورا
.
بویوردی ندبه دی مفهوم لفظ مُدغَمده
دیدی کلیم که بو ندبه هانسی بیر غمده
.
جواب گَلدی حبیبیم مُحَمَّدَه موسی
کرامت ایلمیشم بیر قیز اسمیدور زهرا
.
جمالی جلوه لَنر همچو نیّر اعظم
حسین آدینلو او خاتونه بیر اوغول ویرّم
.
شهید ایده لّر اونی عاشِرِ محرّمده
باشین کسلَّه، سو ویرمزله ساحل یَمده
.
جزاده امّت مرحومیه اولار او غیاث
اونون غمینده بو دنیاده هر ذکور و اُناث
.
اگر ایده یوزه بیر قطره گوز یاشین جاری
اونون آدین یازارام من حسین عزاداری
.
من اوز جلالیمه آند ایچمیشم عزاداری
بهشتیمه آپارام، گورمیه غضب ناری
.
حسینون آدی گَلنده او گوز که اشکی آخار
همان گوزه یارادان چشم رأفتیله باخار
.
حسین یولوندا بیری مصرف ائتسه بیر درهم
بو دهریده بیره یِتمیش اونا عوض ویرّم
.
جزا گونینده ده قیلّام مرامینی تأمین
مضاعف ایلرم اجرین او خرجه یِتمیش مین
.
کلیم عجزیله عرض ایتدی ای خدای جلیل
حسینه ایمدیکه وار آغلاماقدا اجر جزیل
.
کیم ئولدورر اونی، بُلدور الهی موسایه
توکوم سرشک، یتوم منده فیض عظمایه
.
جواب ویردی کلیمه خدای حیّ و جلیل
بنی امیّه ائدر کربلا چولینده قتیل
.
کلیم عرض ایلدی ای خدای عرش مجید
بنی امیّه ایده لّر اونی نه نوع شهید
.
جواب گَلدی اونون سینه سینی داغلالّار
سو یولّارین یوزینه کربلاده باغلالّار
.
صغیر اوشاقلارینی ئولدورَر هوای عطش
کبیر جلدین ائدر مُنکَمِش بلای عطش
.
کلیمه غیبیده ذکر ایتدی خالق قاهر
دیوم همین بو مصیبت نه وقت اولوب ظاهر
.
✔️ فرمان نوشتن ابن زیاد به عمر سعد
.
اولاندا سابع شهر محرّم، ابن زیاد
دوشوب بو فکره اولا خانمان دین بر باد
.
دیوم نه ظلم ایلدی آه یا امام زمان
گوتوردی زاده ی وقّاصه یازدی بیر فرمان
.
حسین یزیده گَلوب یا گرکدی بیعت ایده
و یا که جاه و جلالی اوزی فنایه گیده
.
قبول ایلسمه بیعتی قیام ایله
حسینه، عترتینه سن سویی حرام ایله
.
من ایلدیم سوئی بو حکمیده کلابه حلال
حرامیدور ولی ویرمه حسینه آب زلال
.
دایانسا ایش او یره باش و جانیدن گئچسون
سو ویرمه، سو یرینه لخته لخته قان ایچسون
.
بو قدر بُل که همین سوزده دور رضای یزید
حسین فاطمه نی تشنه کام ایله شهید
.
یارالی پیکرینی یرده قانه غلطان قوی
لباسین امر ایله سویسونلا، جسمین عریان قوی
.
حیالی عترتینون دوندر اشکینی سیله
سوموکلرین آت اَیاقینده خُرد خُرد ایله
.
همین که یازدی بو فرمانی ابن مرجانه
یتوردولر او زمان ابن سعد نادانه
.
ازل که حکمینی یدّیمجی گون ایدوب اجرا
قالوب اونومجی گونه حکم آخِرین امّا
.
✔️ غارت البسۀ امام مظلوم
.
او دم که فاطمه نین دوندی قانه گوز یاشی
وورولدی نیزیه پیغمبر اوغلونون باشی
.
خبر ویروب عمر سعده اهل کوفه و شام
امیر مژده ویر، اولدی حسینون امری تمام
.
ائشیتدی بو سوزی، اولدی او بی حیا خوشحال
دیدی که اولدی درخشنده کوکب اقبال
.
منیم اَلیمله یزیدین ر ضاسی گَلدی اَله
گَلر بو فعلیمیله ری حکومتی عمله
.
هوای ری باشینا دولدی اول جفا کانی
دیدی گرک اولا اجرا امیر فرمانی
.
گلوبدی قتلگهه الده بیر عصا او لعین
عزیز فاطمه نین گوردی نازنین بدنین
.
کسوبله باشینی مکبوتباً قالوب یرده
چکوبدور اوستونه اوز قانی قرمزی پرده
.
ایدوب عصانی اشاره او نازنین بدنه
شمادتیله دل آچدی امام ممتحنه
.
دیدیم حسین دیمَدیم گَل یزیده بیعت ایله
اوزیوی عترتیوی بو جهاندا راحت ایله
.
دیوب بو سوزلری یاندوردی روح زهرانی
دونوب مخاطب ایدوب تابعان سفیانی
.
تمسخریله خطاب ایتدی قوم اعدایه
همان حسیندی که جبریلیدی بونا دایه
.
همان حسیندی بونی چیگنینه آلاردی رسول
همان حسیندی بونون نازینی چَکردی بتول
.
اولون یزید یانندا بو ماجرایه گواه
منیم اَلیمده شهید اولدی بو کمکسیز شاه
.
بو ماجرانی بو چولده بو گون یاراتدیم من
حسینه اوّل اوخی صبح وقتی آتدیم من
.
نجه که جنگ بناسین قویان من اولدوم من
بو قانلی نعشیده اوّل سویان من اولدوم من
.
دیوم نجه دیوم اظهاری چوخ جسارتدور
گَلیم اگر دیمیوم معتبر روایتدور
.
بنی امیّه ایدن ظلمی ایتمیون مستور
به شرط این که سوزی ذکر ایدن ایده منظور
.
اگر اوزینده لیاقت بُلور دیسون بو سوزی
لیاقت اولماسا اولسون دیَنده کور گوزی
.
او یرده که بُلوری حقّین ایلمزلر اَدا
بو سوزلری اوخوسا خصم اولا اونا زهرا
.
نجه دیوم که عمر سعد نه جسارت ایدوب
امیر لشکریدی، شاهه قصد غارت ایدوب
.
اجازه ایستورم عرض ایتماقا او حالی عیان
آناسی فاطمه دن، سندن ای امام زمان
.
✔️ عریان ماندن امام مظلوم
.
دل پیمبره معناده ظلم اوخی ساچدی
حسین گیَن گِییمین قانلی حلقه سین آچدی
.
یارالی پادشهین سویدی جبریله گِییمین
او قانلی سینه ده وار باخمادی یارا دورت مین
.
چخاتدی تا زِرِهی اول ستمگر بی دین
دیدی گَلون بو حسینون سویون لباسلرین
.
همین که ویردی بو فرمانی اول ستم پرور
حسینی سویماقا اولدی قُشون هجوم آور
.
بیری ازل گوتوروب نیزه ده عمامه سینی
بیری عباسین آپاردی، بیریسی جامه سینی
.
تمام سویدی لباسین او اشقیای دنی
قالوبدی ساتری، بیر پاره پاره پیرهنی
.
او پیرهن که اونی ایلینده عزم قتال
لطیف جسمینه گیمیشدی شاه عرش جلال
.
که سویسالار هامی رختین اگر سپاه شرور
او پیرهن قالا، بلکه وجودی قالمیا عور
.
بنی امیّه ده بیر ظلمه باخ شقاوته باخ
عناده باخ او حیاسیزده، بیر جسارته باخ
.
دوباره امر ویروب ابن سعد بی ایمان
بو کوینگینده سویون پیکرین قویون عریان
.
قدم قویوب ایرَه لی ابهر ابن کعب دنی
گَتوردی نالیه جنّتده روح فاطمه نی
.
بو رسمیدور قورویاقان بدنده زخمی سخار
او قانلی کوینگی فکر ایله گور نه شکل چخار
.
سویان ستمگر اولا حرمتینی گور ساخلار
علاوه جسمینه تیکمیشدی کوینگی اوخلار
.
غرض او کوینگی سویدی او ظالم گمراه
آناسی فاطمیه صبر ویر اوزون الله
.
بو قدر اولوب دیه بُلّم او ظلمینون اثری
یارالی جسمیده گوز گوز آچلدی یاره لری
.
✔️ جفای بجدل
.
گیدوب لباسلر عریان قالوب امام علیم
خیال غارتیله گَلدی بجدل ابن سلیم
.
پیمبر اوغلونی عاری گوروبدی کسوتدن
پوزولدی حالتی، محروم اولوب غنیمتدن
.
خیال ایدوبدی قِییتسون او کفر محض ظلوم
عزیز فاطمه ایتموب او کافری محروم
.
ایدوب سخاوتینی اهل عالمِینه عیان
او بی مروّته انگشترین ویروبدی نشان
.
او سفله طبع شریره طمع اولوب غالب
دوشوب بو فکره او انگشتره اولا صاحب
.
قدم قویوب ایرَه لی اول شقی ایدوب جرأت
دوتوب اَلین اوزوگه زوریله ویروب حرکت
.
سرشک موجی عبث دل حصارینی یخمور
نقدر جهد ایلدی گوردی قان دوتوب چخمور
.
نه قادر اولدی چخاتسون، نه حرص قویدی گیده
بو سوزده داش اورک ایستر دوزوب تحمّل ایده
.
صاقا صولا او ستمگر گوزین دولاندوردی
گَتوردی زینبی درده، بتولی یاندوردی
.
واریدی حربه سی بُلمم دینمورم اظهر
و یا که یردن اَله سالدی بیر سنق خنجر
.
بُلوب تعرّض ایدن یوخ، امام بی کسدی
همان اوزوکدن اوتور خوردا بارماقین کَسدی
.
دوباره امر ایلدی ابن سعد بی پروا
گرک امیرین اولا هر اَوامِری اجرا
.
گرک یزیده بو گون خدمتیم اولا خالص
زیادین اوغلی یازان حکم قالمیا ناقص
.
حسین عیالینی پیچیده ی ملال ایلیون
وجودین آتلار اَیاقینده پایمال ایلیون
.
سوار اولوب آتنا اون نفر شقیِّ لعین
گلوبله محو ایده لر شاه کربلا بدنین
.
یارالی نعشینون اوستونده چوخ دلیرانه
گَتوردیلر او زمان آتلارینی جولانه
.
قویاندا آتلار اَیاق نیزه و قلج یرینه
قاتاردی جلد و لُحوم و عظامی بیر بیرینه
.
کلام ناطقه آتلار ووروب ز بس دیرناق
چخوبدی پیکری شیرازه دن اولوب اوراق
.
او که جفادی امامه او قوم دون ایتدی
غرض یورولدی ستمگرلر، اَل چکوب گیتدی
.
هدایتین گونی غرب زواله یتمیشدی
جهانی عالم معناده ظلمت ایتمیشدی
.
باخوب او شمس هُدایه عزا بساطی قوروب
ایدوبدی ظاهر صورتده آفتاب غروب
.
✔️ احوالات ساربان لعین
.
گونوز جفاسی ایدوب آل عصمتی مرغول
قشون اولوب هاموسی استراحته مشغول
.
ولیک بیر نفرین ظلمی قالمشیدی گئجه
گونوز تاپانمادی اَل، گَلدی ظلمین ایتدی گئجه
.
همین بو مطلبه راویدی شمر ذی الجوشن
دیر اوتورمیشیدیم خیمه ده همان گئجه من
.
نه گوردوم ایلوری یر زلزله قیامتدور
خیال ایلدیم آیا بو نه علامتدور
.
دیدیم گونوز بو چوله من بو وحشتی سالدیم
گئجه نه زلزله دور بیله فکریده قالدیم
.
گیدوب تفکّره فکرین حصارینی یخدیم
دوروب تحیّریله خیمه گاهدن چخدیم
.
دیردیم اوز اوزیمه من، بو امر کیمدندی
قاباقدا تا گوزیمه بیر قارالتی گورسندی
.
دیدیم بو هرکیم اولا، بو سالوب بو زلزله نی
او قدر دوردوم او یرده گلوب یتوردی منی
.
ایدوب نظاره نه گوردوم که بیر کیشیدی گَلن
دیدیم هارا گیدیسن، ویر اوزون نشان کیمسن
.
ندور بو زلزله حالی ایله بو حاله منی
گلور خیالیمه سن سالموسان بو زلزله نی
.
دیدی بو زلزلیه عمده بانیم یا شمر
حسین فاطمه نین ساربانیم یا شمر
.
اوز ایتدیقیم عمله وار یری ایدم چوخ اسف
روانه اولموشیدیم ایمدی قتلگاهه طرف
.
دیدیم اَله گَتوروم بلکه بیر غنیمت و مال
حسین لباسینی گوردوم سویوبلا قوم ضلال
.
ایدوبله رختیدن عریان وجود خونبارین
دیدیم که غارت ایدوم منده بند شلوارین
.
جواهراتیله ویرمیشدیلر ز بس زینت
اَله گَتورماقا ائتدیم او وقتیده سرعت
.
ایکی اَلیله دفاع ایلدی او شاه زمن
اوتوزدوم عقلیمی دنیای دون متاعینه من
.
ستمله اودلادیم آل رسول دللرینی
باخا باخا آناسی، جدّی کَسدیم اللرینی
.
بو ساربان ستمی ذکر اولونسا هر یرده
آناسی فاطمه آغلار، یانار، گَلر درده
.
حسین مصیبتی اولماز یقین «حسینی» تمام
سُوَر حسین اولا زینب آدیله ختم کلام
.
✔️ احوالات و زبانحال حضرت زینب در قتلگاه
.
یانان چادردا گئجه یاتدی توکدی گوزیاشینی
صباح اولاندا گَلوب لیک تاپدی قارداشینی
.
گوروب حسین بدنی یرده قانه غلطاندور
بدن دئمه، دیه سن گُلدی یرده خنداندور
.
چوخور یره اولوب اوراق گُل کیمی جسمی
وجود یوخدی، بدندن قالوبدی بیر اسمی
.
نه اللری، نه باشی، نه بدن سلامتدور
نقدر ایشلوری گوز سر به سر جراحتدور
.
سویوبلا رختینی باشدان ایاقه قوم دنی
یارالی گون قاباقندا قالوبدی گُل بدنی
.
او کوینگی که گَلنده امام میدانه
علی قیزی اوزی ویرمیشدی شاه عطشانه
.
باخوب گوروب که همان کوینگینده قوم شرور
سویوبلا، قارداشینون نعشینی قویوبلار عور
.
گورنده قارداشین عریان اولوبدی قلبی کباب
یارالی قارداشینا یوز دوتوب ایدوبدی خطاب
.
?ادامه این متن برای سینه زنی و زنجیر
#عریان_بدنون_یرده_دی_قارداش_باجون_ئولسون
.
#حسینیه_مدح
#حسینیه_شهادت
#سعدی_زمان
#جلالتینده_حسینون_عقول_حیراندور
#لمعات_حسینی ص 292
#ترکی
.
✍️ #زبدةالاشعار ✍️
?: @nohe_torki
نظر دهید