حدیثی از امام حسن عسکری (ع) : پنج چیز علامت مؤمن است.(1)
.
✍️ زبدة الاشعار ✍️
.
🆔: @nohe_torki
.
مرحوم حسینی سعدی زمان
.
حدیث دور نچه زاد مؤمنین علامتی دور
جزایه توشه دی سرمایۀ سعادتی دور
.
ازل نمازدی، واجبدی، رکن ایماندور
که عبد عبادتی معبوده اوز عبادتی دور
.
ایکیمجی، بسمله نین جهری هر نماز اوسته
که جَهرِ بسمله عالمده مرد زینتی دور
.
اوچومجی توپراقا تَعفیر سجده حالینده
ولی فضیلت سجده حسین تربتی دور
.
عقیق اوزوکدی صاق الده علامت رابع
عقیق صاحبینین ضامن حراستی دور
.
گوروم اولیدی ولی بجدلین عذابی شدید
اونون او ظلمی حسینون بیوک حقارتی دور
.
امام بارماقینی کسدی بیر اوزوکدن اوتور
بو ظلم او بی حَسَبین شاهد شقاوتی دور
.
نظر بشیمجی علامتده دور گیچاق بو سوزی
که مؤمنین او علامت بیر عمده خصلتی دور
.
اولور حسینیله کامل عملده اولسا قصور
کمال مؤمن پاک اربعین زیارتی دور
.
آتام، آنام اولا ششگوشه قبرینه قربان
حسین زیارتی هر مؤمنین شرافتی دور
.
حسین آقا او گوزل قبروه اوزوم قربان
گوگل بیر عمریدی شوط و طواف حسرتی دور
.
علّی اکبریوون جانینه قَسَم ویرّم
نصیب ایله او که محتاجین عین نیتّی دور
.
سرشگ چشمیله صحن رواقوی سولارام
گوروم او قبر اگر بو ذلیل قسمتی دور
.
قویوب ضریحوه یوز اشگیله توزون سیلَّم
چون آغلاماق گوزیمین صبح و شام عادتی دور
.
اماندی ایله ترّحم او باب رحمتی آچ
نقدر باغلیدی اسلامیان صعوبتی دور
.
زیارت اولموری قسمت ولی عزا دوتاروق
سنون آدون هامینون ورد و ذکر و صحبتی دور
.
او وقتی یاد ایدوروق روز اربعینونده
گَلَن زیارته یکسر بتول عترتی دور
.
هامیسی یاسلی عزالی باشی قرالی گلوب
مخدرّات بنی هاشمین قیامتی دور
.
گلور قولاقیمه بیر سَس یقین علی قیزیدور
که آغلادان منی دائم اونون او حالتی دور
.
معاینه گورورم قبرون اوستونه دوشنوب
دیور حسین باجوون ایمدی وقت فرصتی دور
.
گیدنده شامه سنه بیر دویونجا آغلامیوب
اونون اوزون بُلوسن نه قضیّه علّتی دور
.
گلنده نالیه دشمن ووراردی قویمازدی
هله بدن او دویولماقلیقین جراحتی دور
.
او قدر قمچی وروبلار سنین گوزوندن ایراق
قولوم بنفشه و نیلوفرین حکایتی دور
.
باشیمدا سوزشی وار تازیانه یرلرینون
منی بو حاله سالان تازیانه زحمتی دور
.
نه چکمیشم بُلوسن احتیاجی یوخ دیماقا
هامی مصیبته فایق باجون اسارتی دور
.
دیار کوفه ده زنداندا یاتمیشام گیجه لر
یتوب منه او که دشمنلرین اذیّتی دور
.
قویوبدی باشوی خولی کول اوسته کول باشیما
کوله بَلَشماقی گوردوم تنور علامتی دور
.
گیدوبدی بیر گئجه باشون قوناق کلیسایه
سبب او گیتماقودا راهبون هدایتی دور
.
آنامدا گلدی حسینیم باشون زیارتینه
بیر ایله یر آنامین گور حسین لیاقتی دور
.
بو رسمدور که هامی دیده بازدید ایلر
بو بازدیده سبب دلده کی محبّتی دور
.
گلوب دوباره کلیسایه مریم و عیسی
بو گلماقی اولارین باعث ارادتی دور
.
بو قدر ظلمه خوشام داد شام ظلمیندن
بوکن بو قامتیمی شامیان شمادتی دور
.
باشون جداده گوروردی نه پیشواز اولدی
او پیشواز باجون زینبون اهانتی دور
.
بیری گُلَردی بیری کف چالاردی بعضی دف
باخان دیردی بو قومون بو گون ضیافتی دور
.
زمان صبحیدی وارد اولان زمان شامه
نه صبح ، قیزلاریوون گوزده شام ظلمتی دور
.
توکردی باشیمیزه اودلی نی او قوم دَنی
بو ظلم عزالی خواتین ، سر سلامتی دور
.
امام عصر بویوندا غلام تک زنجیر
دِیَن تاپولمادی ، بو کردگار حجّتی دور
.
اوزی اُقادُ ذلیلاً دیوب او ساعتده
ذوی العقوله مؤثر همان عبارتی دور
.
اولونجا شام دولاندوردولار بیزی شامی
او وقت اولوبدی که شامین زمان خلوتی دور
.
هامی گیدوب ایوینه بیز خرابه ده قالدوخ
خرابه مسجد ، اسیرین مُدام عمارتی دور
.
قلم دایاندی «حسینی» دایان دعا ایله
دعالرین بو زمان وقت استجابتی دور
.
بو چکدیقون زحماته نتیجه عُقباده
یقین ایله که آنان فاطمه شفاعتی دور
.
(1) عن الامام العسکری (ع):
علامات المؤمن خمس
صلاة الخمسین
زیارة الأربعین
التختم فی الیمین
تعفیرالجبین
الجهر ببسم الله الرحمن الرحیم.
.
«وسائل الشیعه، ج 10، ص 373»
.
امام حسن عسکری (ع)فرمود:
مؤمن پنج نشانه دارد:
اقامه پنجاه رکعت نماز (مجموع واجبات و مستحبات)
خواندن زیارت اربعین
انگشتر در دست راست کردن
در سجده پیشانی بر خاک نهادن
بسم الله الرحمن الرحیم را (در نماز) بلند گفتن.
.
.
#اربعین
#سعدی_زمان
#حدیث_دور_نچه_زاد_مؤمنین_علامتی_دور
#آثارالحسینی2 صفحه 258
#ترکی
.
✍️ #زبدةالاشعار ✍️
.
🆔: @nohe_torki
نظر دهید