حریم عصمته معنادی زهرا #فاطمیه_نادربابایی

شفاعت حضرت زهرا سلام الله علیها در #قیامت
.
.
.
حاج نادر بابایی
.
.
حریم عصمته معنادی زهرا
مدار خلقته مبنادی زهرا
.
.
نجه توصیف ائدیم من شرح حالین
وقارین ، عصمتین، علمین، کمالین
اگر خالق وئره نوحین مجالین
یازام هر بیر گونون هر ماه وسالین
او سوزلر قطره دور ،دریادی زهرا
.
.
زکیه، طاهره، مصداق عفت
بتول و فاطمه صدیقه شهرت
اولوب نسوانه زهرا تاج عزت
سالوبدور عالمینه ظل رحمت
آدی گویلرده منصورادی زهرا
.
.
قیامت قوزانار محشر قوپاندا
ئولنلر قبریدن باش قالخیزاندا
هامی تیترر همان بحران زماندا
باشا ال قالخیزالار الاماندا
بیلر که یوم وانفسادی زهرا
.
.
چکر نار جحیم اوندا زبانه
قاچار ساق و صولا امت امانه
پیمبر قالخیزار ال آسمانه
باخار امت آرا پیر و جوانه
دیرگل حشره باخ غوغادی زهرا
.
.
کچیم سوزدن مرادیمدور شفاعت
دورارصف صف باخاراهل قیامت
فقط ساداته واردور بو کرامت
ائدر هر سید اول لحظه زیارت
گورر اوندا نجه زیبادی زهرا
.
.
سالالار فرش دیبانی یولوندا
شفاعت بیرقی تیترر قولوندا
گوزل بیرگل ایکی غنچاخولوندا
ساقیندا محسنی، اصغرصولوندا
گورر محشرده واویلادی زهرا
.
.
قیام ایلر او دم خاتون محشر
الینده بیر یارالی راس اطهر
ایکی قول سینیه آلمیش اومادر
دورار اوندا خانیم عرشه برابر
او اثنا طالب سودادی زهرا
.
.
ائدر بیر هاتف غیبی اشاره
دیر ای اهل محشر البشاره
تاپیلدی امته بیر راه چاره
آچیلدی باب رحمت آشکاره
شفاعت نامیه امضادی زهرا
.
.
همان محبوبه ی حی توانا
اولوب اون سکیز ایل مهمان دنیا
اونی بیر حاله سالدی ظلم اعدا
جوانلیقدا اولوب قبره مهیا
بیلوب دنیاده چوخ تنهادی زهرا
.
.
دیوب ثانی ابابکره بیاندا
بتوله کوچه ده سیلی وراندا
ائله وردیم دئدیم قالماز جهاندا
یقینا بیل ئولر آز بیر زماندا
بو گونلر عازم عقبادی زهرا
.
.
سنیدی اللرون ایکاش ثانی
وراندا کوچه ده فخرالنسانی
یخیلدی تپراقا دیسگیندی جانی
یارالی اوو گزوردی آشیانی
قنادسیز بیرقوشا اوخشادی زهرا
.
.
ایا صیادلرده پست مایه
اووی سن کوچه ده سالدون ارایه
دیدون یوخ قارداشی گلسون هرایه
ائله وردون که لکه دوشدی آیه
نشان حضرت طاهادی زهرا
.
.
گلوب بانک جرس(نادر) اویاندون
ندای ( من علیها فانی ) قاندون
ولیکن باخدون اعماله اوتاندون
شفاعت کلمه سینده چوخ دایاندون
امید محشر کبرادی زهرا
.
.
.
#فاطمیه_مدح
#قیامت #قیامت_نادر_بابایی
#حریم_عصمته_معنادی_زهرا
#نادر_بابایی
#ترکی #فاطمیه
#زبدةالاشعار