#جنگ_دوبرادر
رزم دو برادر حضرت امام حسین وحضرت ابوالفضل علیهما السلام
..
..
..
..
غفاری زنجانی
..
..
..
..
حضرت عباسه کیم اولسا دخیل
نا امید ایتمز یقین اول بدیل
..
بنده ی ممتاز خلّاق ودود
منبع احسان و لطف و بذل و جود
..
بس مقرّب بنده دور اول پاکزاد
آلموش حقدن منصب باب المراد
..
زندگیسینده وار عالی قصّه لر
رفع ایدوب قلب حسیندن غصّه لر
..
دوتسا هر کیمسه اونا روی نیاز
ایلیر رفع نیاز اول سرفراز
..
بو ابافاضلدی دریای ادب
صاحب عزّتدی هم عالی نسب
..
یازسا کیم تعریف او رخشان ماهیدن
عمر نوح آلسون گرک اللهیدن
..
حق پسند اوصافی گر اولسا رقم
بیشه لر الده گرک اولسون قلم
..
عالمی حیران قویوب ایثارینه
طاعت و اذکارینه رفتارینه
..
وقت حسّاس اولدی غمخوار حسین
صاحب پرچم ، علمدار حسین
..
وار سلامیم اول هنر دریاسینه
کربلاده تشنه لر سقّاسینه
..
فاطمه دلبندینه دوردی کمک
قویمادی سبط رسول حقّی تک
..
کربلاده تک قالان وقته حسین
قلبینی غملر آلان وقته حسین
..
قان توکنلر دوتدی غم صحراسینی
سالدولار محصوره سبط یاسینی
..
چخدی جنگه چون رعیّت شاهیلن
میر دو عالم ولیّ اللّهیلن
..
ایتدولر آلقانه غرق انصارینی
دوغریوبلار یاور و انصارینی
..
قویدولار شاه شهیدانی وحید
ایتدولر انصارینی عطشان شهید
..
زنده نه سرباز و نه افسر قالوب
بیر قشوندان بیرجه سر لشکر قالوب
..
ناله صوتی دولدوروب دشت غمی
غملر اولموش اهلببتین همدمی
..
قوزانوبدی عرشه صوت العطش
گه سوسوزلوقدان ایدر اطفال غش
..
گلدی سقایه بو محنت چوخ گران
غیرتندن تاپشورا آز قالدی جان
..
سینه سی تنگه گلوبدی غصّه دن
آه و آه اوستن چکوب بو قصّه دن
..
فکر ایدوب چاره تاپا بو مشکله
ایستیوب بیر مشک سو سالسون اله
..
محضر مولایه عزم ایتدی وزیر
اذن میدان آلماقا اول بی نظیر
..
نطقه گلدی ساقی شیرین مقال
ایلدی بو نوع گویا شرح حال
..
تنگه گتدی سینمی غم سیدی
روحمه زنداندی عالم سیدی
..
تشنه لر الدن آلوب آرامیمی
بو قضایا تلخ ایدوبدی کامیمی
..
اذن میدان ویر بو غرق محنته
لشکر شامی سالوم قوی وحشته
..
روحیمی زندانیدن آزاد ایله
غم دوتان بو قلبیمی سن شاد ایله
..
قوی بو اعدادن آلوم من انتقام
رعشه دوتسون حاکم جبّار شام
..
روشن اولسون ضرب و شستیم دشمنه
حاضر اولسون ایتماقا بیعت سنه
..
خوار ایدوم قوی زادۀ مرجانه نی
بن زیاد و حقدن بیگانه نی
..
قوی آچوم راه نجاتی خیمیه
باغلیوم آب فراتی خیمیه
..
اذن ویر قوی عرصه ده طوفان ایدوم
قلبینی بو ابن سعدین قان ایدوم
..
سیّدی لطف ایله قیل احسان منه
قوی ایدوم بو جانیمی قربان سنه
..
گوردی عبّاسین غریق اشک ناب
ویردی گویا قارداشا بیله جواب
..
ایتدی فرمایش وزیر جنگنه
منشی و سر دفتر و سرهنگنه
..
درده گتدی قلبیمی هجران سوزون
مانع اولمام لیک فکر ایله ئوزون
..
سنده گیتسون فکر ایله من نیلیوم
اهل بیتیم تاپماز ایمن نیلیوم
..
قارداشیم سن سن علمداریم منیم
غم گونونده یار و غمخواریم منیم
..
لشکریم اولدی قتیل دشمنه
تیکمیشم گوز ای عزیزیم تک سنه
..
سنده گیتسون ای علینون مظهری
شامیان قارداش اولار منلن جری
..
قویما بو دشمن آرا یالقوز منی
شاد قیلما گیتماقونلا دشمنی
..
چوخ شتابون وار مرامه یتماقا
بو اوغولسوز قارداشین ترک ایتماقا
..
ایلین ای حق رضاسین جستجو
ممکن اولسا گر گتور بیر مشک سو
..
حاصل اذن آلدی علمدار حسین
یار و غمخور و مددکار حسین
..
خیمیه گیچدی او میر صف شکن
خصم بی باک سپاه اهرمن
..
یتمین هرگز خلل خوش عزمنه
بنذین رزمی علینون رزمنه
..
صاحب عزّ و وقار و شأن و جاه
باشنه قویدی او دم رزمی کلاه
..
باغلادی تیغ هلالی قاشی تک
تیغه چکسون فرقهی اوباشی ،تک
..
توکدی گوزیاشین باخاندا مشکنه
تشنه لبلر ویردی سرعت اشکنه
..
آلدی شمشیرین اله اول مستطاب
ایلدی شمشیرینه گویا خطاب
نیلرن ایندی گوروم بو لشکره
قان توکن بی فهم قوم کافره
..
جانستان اول آل بدندن جانلارین
توک یره سرعتلن نحس قانلارین
..
عرصه نی تنگ ایت بو بی ایمانلارا
قدرتین اظهار ایله نادانلارا
..
خیمه دن ایتدی طلوع همچون قمر
صولت حیدر یوزونده جلوه گر
..
سس دوشوب اخیامده سقا گیدور
آسمانه صوت واویلا گیدور
..
خیمه لرده قوپدی شور و انقلاب
توکدی گوزدن آل حیدر اشک ناب
..
بعضی سویلر گیتسه سقا نیلروک
قورخوشار اونسوز صبایا نیلروک
..
بیر بیرین قیزلار قوجاقلار آغلاشار
سیل غم موجه گلوب باشدان آشار
..
خیمه اهلیندن او دم ایتدی وداع
بیر قوجاقلاشدی مطیع ایله مطاع
..
یعنی قارداشی حسیندن آیریلوب
روحدور گویا که تندن آیریلوب
..
آیرولوبدی خیمه لردن بی درنگ
حیدر ثانی ایدوبدی عزم جنگ
..
حیدر کرّار تک چابکسوار
اگلشوب زین اوسته چون کوه وقار
..
صورتنده سجده دن آثار وار
عاشق پر شور حیّ و کردگار
..
بندۀ صالح حق دادارینه
غبطه ذکر اهلی ایدر اذکارینه
..
ذکر یا رب لبلرینده حق پژوه
داغدادا اولماز ایله فرّ و شکوه
..
تلّیده ایتدی طلوع خورشید حق
سالدی میدانه جمالیندن شفق
..
باخدی تلّ اوستن سپاه کافره
موج ایدن دریا مثالی لشکره
..
صفلره باخدی گله معیار اله
تز چاتا تا نخل قصدی حاصله
..
گیتسه هانسی سمتیدن کامه چاتار
سندیرار اعدانی نهره یول تاپار
..
رو به رو گلدی دوروب اشراریلن
نور ایمان ظلمت کفاریلن
..
موعظه عزم ایتدی قیلسون لشکره
حق یولوندان منحرف ناکسلره
..
من ابوالفضلم دیدی ای کوفیان
بو عیاندور گون کیمی اولماز نهان
..
یعنی بوفاضل کنیّه مدور منیم
واقف شخصیّتیمدی دشمنیم
..
من ابوالفضلم هنر زادم بیلون
دشمن هر قوم شیادم بیلون
..
ویرمیوب رخصت سلیمانیم منه
تنگ ایدم بو عرصه گاهی دشمنه
..
اذن ویرسیدی منه شاه زمن
بیلدورردیم ایندی کیمدی صف شکن
..
جنگچون سالسیدی سلطانیم یولا
باغلیاردیم بیربیریزی قول قولا
..
تک فقط مأمور ایدوبدی سو آلام
فکرینه اطفال عطشانون قالام
..
ایلدی مأمور بو امره منی
تا ایدم سیراب سولموش گلشنی
..
باغلیوبسوز سو یولون نه علته
ویرمیورسوز جرعه آل عصمته
..
سو ایچور جمله وحوشیله طیور
اهل بیته چاتمیور آب طهور
..
بو سووا حسرت پیمبر قیزلاری
آز قالور آخسون حیا اولدوزلاری
..
گیتمیون ای قوم نامردان یولون
ترک ایدون شرم ایلیون شیطان یولون
..
ایلیون بو دوتدوقوز یولدان حذر
انتهاسی ناریدور قعر سقر
..
اهل بیتیله عناده دورمیون
عهدوزی پیمانوزی سندیرمیون
..
چخمیون جنگه ولی اللهیلن
فاطمه اوغلی ملک درگاهیلن
..
آچماساز سو یولارین السّاعه گر
باشلاروزدان یاقدورار تیغیم شرر
..
گوردی سقا ، زاده ی فرزانه فر
پند و اندرز ایتمز اول قومه اثر
..
سنگ خارایه اثر ایتمز نسیم
آنّاماز پند حکیمانی لئیم
..
لشکره ویردی ئوزون حیدر کیمی
سندیران صف، فاتح خیبر کیمی
..
ایلدی ترک ئوز نیامین تیغ تیز
گورسنوب اعدایه روز رستخیز
..
آلدی فرصت فرقۀ اوباشیدن
پهلوانلار تتردی پرخاشیدن
..
عرشه لشکردن اوجالدی الحذر
بیر اوزون قول باشلاری اوسته گزر
..
فرّو فرّو سسلنر سر کرده لر
قاچماسا گر جان قوتارماز بیر نفر
..
پوزدی نظم لشکری شیر غزا
علقمه یول آچدی پور مرتضی
..
سو سرین لبلر قوری عطشان اورک
آغلادی احوالنه بحر و سمک
..
اؤوجونی دولدوردی اما ایچمدی
نفسینی آل عبادن سچمدی
..
مشکینی دولدوری چوخ ایتدی شتاب
چون یولون گوزلوردی آل بوتراب
..
دوره سین افسوس آلوبدی اهل کین
اوخ توکوبلر اوستونه باران کیمین
..
مشکی چگنیندن قویار گاهی یره
چون مهمّیدی سو یی اول سروره
..
باشینه مشکین دونردی متّصل
اولمیا بلکه سوسوزلاردان خجل
..
ایلیردی اوخلارا سینه سپر
اولمیا مشکه او اوخلادان خطر
..
باخدی بو احواله تل اوستن امام
گوردی چوخ مشکلده دی اول ذوالکرام
..
تشنه دور یالقوزدی یوخدور بیر کمک
فکره دوشدی قویماسون عباسی تک
..
زاده ی حیدر ولیّ کردگار
برق تک اندی او تلی بی قرار
..
سسلنوب امداده گلدیم قارداشیم
مونسیم ای غم گونونده یولداشیم
..
پور حیدر الده کسگین ذوالفقار
لشکره حمله ایدوب دشمن شکار
..
دال دالا ویردی حقه دلداده لر
هر تعلقدن ایکی آزاده لر
..
آرخالاندی ایکّی قارداش بیر بیره
چکدولر اعدانی تیغ کیفره
..
ایکّی قارداش حیدر کرار تک
بوکدولر دشمن صفین طومار تک
..
نور عین حضرت خیر البشر
ایستدی عباسیدن بیلسون خبر
..
رمز ویرسون قاداشا بو نحویله
قوّت قلب اولسون اول دریادله
..
سسلنوب من مصطفانون اوغلیام
شافع روز جزانون اوغلیام
..
ایکّی قارداش یعنی ایکّی مرد جنگ
ایلموشدی عرصه نی کفاره تنگ
..
دوشدی باشسیز تپراقا هی جسم نحس
سسلنوب وا ذلّتا چوخ بو الهوس
..
تازه دن قیلدی ندا اول مقتدا
من حسینم نور عین مرتضی
..
ویردی فی الفوری جواب عباس اونا
ایلدی گوئیا بیان شیر غزا
..
اولین مسلم آتامدی مطلقا
کعبه مولودی بابامدور مرتضی
..
صف یاراندور فاتح خیبر بابام
اوصیایه سید و سرور بابام
..
ملک احسان و سخایه شاهیدور
آسمان عدل و داده ماهیدور
..
بو سسی آلجاق حسین پور علی
سس ویرردی فوری با صوت جلی
..
جدیم احمدور که جان قربان اونا
گوندروبدی ذات حق قرآن اونا
..
تازه دن عباسیدن آلدی پیام
ناگران اولما حسینیم من صاقام
..
گیچمدی بولحظه لردن چوخ زمان
غم دچاری اولدی عباس جوان
..
گلدی عباسین زواله صاق قولی
دوشدی تیغ ظلمیله سروین خولی
..
سویلدی گر صاق قولوم اولدی قلم
یول تاپانماز قلبمه بیر ذرّه غم
..
قوردی عباسه کمین دست قضا
صول قولوندا سالدی تندن اشقیا
..
گوردوله قولسوز اونی قوم عنود
باشنه اندوردولر شش پر عمود
..
گلمدی عباسیدن بیرده صدا
قالدی قارداشسیز حسین وا حسرتا
..
آختاروب میداندا عباسین حسین
تاپدی قولسوز اشجع الناسین حسین
..
نظر دهید