دوتوبدی قان گوزیوی پرده پرده یاولدی #اکبریه_واقف_سرابی

زبانحال حضرت سیدالشهدا (ع) در بالین فرزندش
..
..
..
..
مرحوم واقف سرابی
..
..
..
..
دوتوبدی قان گوزیوی پرده پرده یاولدی
بو قان اولان اورگیم گلدی درده یاولدی
..
یارالیوب جگریم، قانیله دولان جگرون
تیز ئولدورور اولا علّت جگرده یاولدی
..
سنون جوانلوقوا بیر نفر ترحّم ایدن
تاپولمیوبدی بو یوز مین نفرده یاولدی
..
آلوم قوجاقیمه گون ایسّیدور اذیّت ایدر
لطیفدور بدنون قالما یرده یاولدی
..
ایاقه دور آپاروم ای اوغول یولون گوزلر
عیال دربدریم خیمه لرده یاولدی
..
قیامت اولمادی شقّ القمرده، واردى یرى
قیامت اولسا بو شقّ القمرده یاولدى
..
من آغلارام سنه اما دوروب شماتت ایدر
سنی بو حاله سالان دور و برده یاولدی
..
سنی بوحاله سالان نه جواب فکر ایده جاق
سؤال حضرت خیر البشرده یاولدی
..
بوگل جمالیوه بلبل کیمی باخوب لیلا
ئولونجه آغلیا شام سحرده یاولدی
..
سنون دالنجا منیم گلماقیم یقین اولدی
مقدّرات قضا و قدرده یاولدی
..
مطوّل اولدی بو محنتده (واقفون) وردی
علاج قیل نظر مختصرده یاولدی
..
..
..
#اکبریه #واقف_سرابی #اکبریه_شهادت #ترکی #زبدةالاشعار