اربعین
..
..
..
..
مرحوم تائب تبریزی
..
..
..
..
دور حسینیم بو سفرده حسن تدبیر ایلدیم (1)
انقلاب کربلانی خلقه تفسیر ایلدیم
..
..
..
..
سن شهید اولدون بوچولده ای امام محتشم
منده گوتدوم حقون احیاسینده بیر عالی قدم
ورماقا تاریخ آل هنده بیر نقش عدم
بیر قیام قابل تحسین وتقدیر ایلدیم
..
..
..
..
ساکت اگلشسم اولار زحمتلرون گوردوم هدر
انقلاب سرخوین آثاری دنیادن گیدر
بولدوم اوندا انقلاب زینبی ایجاب ایدر
انقلابیم طرحینه شایسته تدبیر ایلدیم
..
..
..
..
ایستدیم منده گیدم سن طی ایدن بیر عالمی
ایتماقا دنیالره روشن رموز مبهمی
ایلدیم افراشته شوریله نهضت پرچمی
نهضتیمده همّتیله اخذ توقیر ایلیم
..
..
..
..
ویردی یوز قارداش منه هر بیر مصیبت داشمادیم
قلبیمه وردی آجی دللر جراحت داشمادیم
گاه گوردوم طعنه لر گاهی شماتت داشمادیم
صبر هر شدّتده من بیر حُسن تدبیر ایلدیم
..
..
..
..
ورماقا غفلت زده دنیایه بیداری صفیر
باشه یغدیم قرخا دین ثکلا نچه طفل صغیر
باغلانوب زنجیر ظلمه ظاهراً اولدوم اسیر
حق رضاسین باطناً بوینومد ا زنجیر ایلدیم
..
..
..
..
هانسی شهره وارد اولدوخ ای عزیز بو تراب
ایتدیم اعلان شرح عاشورانی بولدی شیخ و شاب
انقلابی صحبتیمده سالدیم ایله انقلاب
جمله خلقی بر قرار تحت تأثیر ایلدیم
..
..
..
..
کوفه ده گوردوم جماعت جمع اولوبلار سوبسو
اوزگه عالم وار دوتوب شهری غریو و هایهو
سسلدیم چوخ وقریله یا اهل کوفه اسکتوا
روحین آلدیم تک تکین بیروح تصویر ایلدیم
..
..
..
..
باشلادیم عالی بیاناتیله اصل مطلبی
مو بمو خلقه یتوردوم درس دین و مذهبی
کوفه ده آچدیم ایله موقعده قرآن مکتبی
پرتو تعلیم قرآنی جهانگیر ایلدیم
..
..
..
..
ایتدیم اعلان نار ایدنمز نوری مرغوب ایلسون
کفر ایدنمز معنی ایمانی منکوب ایلسون
قدرت باطل ایدنمز حقّى مغلوب ایلسون
خواب آل هندى من برعکس تعبیر ایلدیم
..
..
..
..
حق بیاناتیمده غفلت اهلی هشیار اولدیلار
جنبشه گلدی یانانلار جمله بیدار اولدیلار
آل بوسفیان داخی رسوا زده خوار اولدیلار
حقّیوی ناحقلر ایچره ایله تقریر ایلدیم
..
..
..
..
بولدیلر سن جان نثار راه قرآن اولموسان
اجتماعی خدمت اوسته قانه غلطان اولموسان
تشنه لب نهرین یانندا دینه قربان اولموسان
حال جمعیتده بیر احساس تغییر ایلدیم
..
..
..
..
باشوی گوردوم جداده ماتمه باتدیم حسین
گوزلریمده گوز یاشین دل قانیمه قاتدیم حسین
آغلادیم آغلار گوزیله خلقی آغلاتدیم حسین
شوریله شهر اهلین آغلاتدیم گلوگیر ایلدیم
..
..
..
..
نیزه دن ناگه اوجالدی ای شه خوبان سسون
دوتدی سرتا سر دیار کوفه نی قرآن سسون
سس نه سس هر مرده جسمه ویردی تازه جان سسون
سن تلاوت ایلدوقجا منده تفسیر ایلدیم
..
..
..
..
همنفس اولدون حسینیم تا من مهجوریله
باشوه باخدیم یارالی خاطر رنجوریله
دؤزمدیم اوز باشیمی یاردیم سر پر شوریله
قانیله الوان سر زلف گره گیر ایلدیم
..
..
..
..
بزمده ابن زیاد ظالم و شوم دنی
گوردوم ایستور سندیروب تحقیر ایده قارداش سنی
سویلدیم من یابن مرجانه تانور دنیا سنی
اصلینی سایدیم او کبر محضی تحقیر ایلدیم
..
..
..
..
بعضی ناشایسته صحبت ایتدی اول دنیا پرست
بوشکسته قلبیمه ایتدی یارالی چوخ نشست
دؤزمدیم قاطع جوابیله اونا ویردیم شکست
سندیروب اول بی حیانی کسب توقیر ایلدیم
..
..
..
..
شامده گوردوم یزید اندازه سیز طغیان ایدر
چوخ مباهاتیله زندیق اولماقین اعلان ایدر
بر ملا انکار وحی منزل و قرآن ایدر
سانما سندیرماقدا أول ملعونی تأخیر ایلدیم
..
..
..
..
فرقینه ایله بیان شمشیرینی چالدیم حسین
ایلدیم رسوا او شومی وقردن سالدیم حسین
قدرتین الدن او مجلسده اونون آلدیم حسین
اوز ایوینده صید اول روباهی چون شیر ایلدیم
..
..
..
..
وردیم آل هند تشکیلاتین آخر بیر بیره
شامه ال تاپدیم حسینیم امر یتدی بیر یره
تا بالان سجادی مسجدده آپاردیم منبره
بیر همان منبرله حقی باطله چیر ایلدیم
..
..
..
..
کاش اولیدون اوردا ای دنیالره غوغا سالان
دین یولوندا جان ویرن دنیا بویی زنده قالان
بیر گوریدون نه قیامت ایتدی منبرده بالان
صحبت ایتدیقجا بالان وجدیله تقدیر ایلدیم
..
..
..
..
کوکب حقی گورن ساعتده تابنده یزید
بار خجلتدن داخی اولدی سرافکنده یزید
سالدی اوز باشین اشاقه قالدی شرمنده یزید
هر آییق بیر قلبده احساس تأثیر ایلدیم
..
..
..
..
بولدی دنیا نه مرام اوسته اولوبدور نهضتون
یتدى اثباته سنون دنیاده موجودیّتون
امتیازیله مسلم اولدی حقّانیتون
خصمدن اقرار آلوب شاماتی تغیر ایلدیم
..
..
..
..
تا شکست واقعی یتدى یزیدین جانیه
شامده ووردیم حسینى بیر علم ویرانیه
تا سالا هم آشنایه سایه هم بیگانیه
من شکست دینی قارداش یاخشی تعمیر ایلدیم
..
..
..
..
ایستدیم ویرانه تاپسون شان شانینده حسین
دولت حقّون اولا دنیاده پاینده حسین
قویدوم اوردا اوچ یاشندا بیر نماینده حسین
اول صغیر آدیله من احیای تکبیر ایلدیم
..
..
..
..
نه صغیر آدی رقیّه گوزلری گریان ایدن
نه رقیّه گوشۀ ویرانی آبادان ایدن
خردا اللرله یزیدین قصرینی ویران ایدن
من یزیدی یخماقا چوخ یاخشی تدبیر ایلدیم
..
..
..
..
نه رقیّه عمّه سیندن سلب ایدن دل صبرینی
ایلین دولموش گوزی شرمنده باران ابرینی
آیریلاندا جان کیمی آلدیم کناره قبرینی
مین لریله تیر حسرت دلده جاگیر ایلدیم
..
..
..
..
هم گجه نی تک سیزیلداردی او هم گوندوزلری
چوخ گوزتلردی یولون زهرا باخشلی گوزلری
هیچ یادیمدان چخمیوب چخماز یانقلی سوزلری
سوزلرین اشکیله رخساریمده تحریر ایلدیم
..
..
..
..
ایستدوب چوخ چوخ اؤزین از بسکه اول شیرین بیان
دوزمرم گیتسم وطنده قسمتیم اولسا وطن
بیرده ناچارم گیدم اوندان اؤتور شاماته من
نیلوم الفت رشته سین بوینومدا زنجیر ایلدیم
..
..
..
..
«تائبا» باخما که معنالی سوزه یوخ مشتری
بو باجی قارداشه باخ دوت شیوۀ روشنگری
شعر شور انگیز و پر روحیله دولدور دفتری
یاز، حسین افکارینی شوریله تفسیر ایلدیم
..
..
..
..
«تائبم» دلده حسینه باغلادیم روح وداد
فرض بولدوم خلق اصلاحیندن اؤتری انتقاد
انتقاده قانع اولدوم اولمادی ممکن جهاد
آتشین گفتاریمی برّنده شمشیر ایلدیم
..
..
..
..
در سال 1345 ه.ش سروده شد
..
..
..
..
#اربعین #تائب_تبریزی #ترکی #زبدةالاشعار
نظر دهید