احوالات کوفه
شرح حال زینب (س)
.
#زبدةالاشعار
: @nohe_torki
.
مرحوم تائب تبریزی
.
دوشنده یادیمه کیفیت مصیبت زینب
پوزور بر حالیمی محنت لو شرح محنت زینب
.
نقدر جور و جفا دشمن ایتدی دوزدی دایاندی
مین ایل گیچوب غم الیندن جهاندا ساعت زینب
.
یازوبدی روز ازل خامۀ قضا بیله گویا
بو قدر درد و مصیبت اولیدی قسمت زینب
.
نلر گلوب باشینا یا نه لر چکوب بو جهاندا
بیانه گلموری تقریریله مصیبت زینب
.
اسیر قوم جفاجو اولوبدی کرب و بلاده
دیار کوفه و شامه اولوب عزیمت زینب
.
او کوفه که نچه ایل اوردا ایلمیشدی خانم لیق
واریدی اوردا زیاده جلال و شوکت زینب
.
همین او کوفه ده دلده نوا قولوندا طنابی
چکیلدی کوی به کو محمل اسارت زینب
.
علاوه بوندان آدی خارجی اولوندی مخاطب
ایدردی اهل جفا دمبدم اهانت زینب
.
گوزینده گوز یاشی اودلی دلینده آتش آهی
سنق کجاوه اولوب مسکن سکونت زینب
.
سنق کجاوه هارا فاطمه قزی هارا یارب
بیله حقارته اولسون نه نوع طاقت زینب
.
باخوب اسیرلره کف چالاردی کوفه نین اهلی
گوروب بو حالتی آرتاردی دلده رقّت زینب
.
تمام کوفه نین اهلی گلوب ایدردی تماشا
ایدردی هر بیری بیر طرز هتک حرمت زینب
.
دیردیلر گلوری خارجی اسیری بو شهره
مزید اولاردی بو سوزدن اورکده حسرت زینب
.
دیردی بارالها شرار محنته یاندیم
ایدوم نه چاره غمیلده اولوبدی الفت زینب
.
اسیر اهل جفایم باشیمدا نچه عزالی
بو حالتیله داخی یوخ ایدن حمایت زینب
.
ایدردی کوفه لیلر جشن اگینده قرمزی جامه
هامی گلوب گیدن ایلردیلر شماتت زینب
.
گوروب بو عالمی زهرا قزی اورکدن آلیشدی
گلوب تلاطمه دریا کیمی شهامت زینب
.
کجاوه دن چیخادوب باش او دم ده باشلادی صحبت
عقوله سالدى تحیّر همین فصاحت زینب
.
آتاسی شیر خدا تک ایدردی حق سوزی تبلیغ
ایدردی دلبره تأثیر طرز صحبت زینب
.
یانقلی دللریله خطبه کوفیانه اوخوردی
یاناردی دلدن آخاردی سرشگ حسرت زینب
.
خطاب ایدردی که من یادگار خیر نسایم
یِتَر زمانه ده خیرالورایه نسبت زینب
.
اسیر سویلمیزن مرتضا علی قزیام من
ایا گروه شقی آز ایدون اهانت زینب
.
یانوب منیم اورگیم یدّی قارداشیم گیدوب الدن
یوخ اودلی سینه ده ایمدی توان و طاقت زینب
.
او زینبم واریدی یدّی قارداشیم بر جهاندا
ایدردی هاشمیان فخر اوزیله خدمت زینب
.
ولیک شمره اسیر اولموشام جفائیله ایمدی
اورکده بسیلیوب اول کینه جو عداوت زینب
.
یانقلی سوزلری سالدی دیار کوفیه غوغا
تمام کوفه نی مملوّ قیلدی هیبت زینب
.
باخوب بو حالده سعد اوغلی گوردی کوفه نین اهلین
آییلدیری یوخودان قول نغز حضرت زینب
.
دیدی آماندی گلون چاره ایلیون یاخون اولدى
تمام خدمتیمی نسخ ایده بلاغت زینب
.
او دمده خولی دیدی ایمدی من قرارینی آلام
دانیشماقا داخی اولماز دوباره قدرت زینب
.
بلالی باشین حسینین گتوردی نیزیه ووردی
کسیلدی صبر و قراری توکندی طاقت زینب
.
حسینینون باشی گوردی ایدر تلاوت قرآن
آلیشدی قلبی گلوب جوشه دلده رقّت زینب
.
اورک اسوب بدنی تیتردی توکوب یوزه قانیاش
اولوب معاینه برپا او دم قیامت زینب
.
گوروب که ناطق قرآن یوزی کوله بلشوبدی
نه قالدی سینه ده یارانه دلده قزت زینب
.
دیدی باجون سنه قربان ووروب كجاویه باشین
حسین تک بویانوبدور قانیله صورت زینب
.
دوشوبدی مشکله بو «تائب» فلک زده یارب
نجات ویر ایشینه سن بحق عصمت زینب
.
قوجالیقیندا اولوب بستری یارالی بالاسی
شفاسین ایستور اونون ای خدای رحمت زینب
.
وفالی نوکرینین اوغلیدور مریض شفا ویر
بحق عصمت زهرا بحق عفّت زینب
.
.
#کوفه_تائب_تبریزی
#دوشنده_یادیمه_کیفیت_مصیبت_زینب
#ترکی
.
#زبدةالاشعار
: @nohe_torki
نظر دهید