دیار شامدن گلدی بلالی کاروان قارداش #اربعین_خوندل_تبریزی

اربعین
..
..
..
..
مرحوم خوندل تبریزی
..
..
..
..
دیار شامدن گلدی بلالی کاروان قارداش
باجون زینب سنه قربان اویان قارداش اویان قارداش
..
..
..
..
اگر ئولسمده آیریلماز سنون عشقون سرشتیمدن
ملول اولما بو قبر اوسته دیسم زیبا و زشتیمدن
وظیفمدور سنی آگاه ایدم اؤز سرنوشتیمدن
اگر چه شرحینی تفسیر ایدر دور زمان قارداش
..
..
..
..
شهادت ختم اولان گون من بو صحراده اسیر اولدوم
کمند ظلمه باغلاندیم ستمله دستگیر اولدوم
نه دویدوم روزگاریمدن حیاتیمدن نه سیر اولدوم
نه گلدیم نالیه ایتدیم نه بیر شکوه اینان قارداش
..
..
..
..
طواف قبریون بیر عمر چکدیم آرزوسین من
گیدنده شامه مهلت ویرمه میشدی سنگدل دشمن
دولانسون باشیوه اولسون خیالوندن باجون ایمن
دیار سرنوشته باشلاسون یول کاروان قارداش
..
..
..
..
بو صحراده او گون که دلده کی مقصوده چاتدون
شهید اولدون باشوندان ماسوانین فکرینی آتدون
سو ویردون نخل دینه قانیله اؤز قانیوه باتدون
درخت دینی پربار ایتدی معناده او قان قارداش
..
..
..
..
شریعت پرچمین آچدی ازل پیغمبر اکرم
آتام جان ویردی بو یولدا یخلماز بیرده بو پرچم
حسن قارداشیمیله سیز اونی حفظ ایلدوز باهم
منه اولدی محوّل بیر خطرلی امتحان قارداش
..
..
..
..
او مسئولیتی سندن صورا قارداش قبول ایتدیم
یقین ایتدیم که اؤز قلبیمده کی آمالیمه یتدیم
گوتوردوم پرچم اسلامی اوّل کوفیه گیتدیم
آتام شهری ولی اولدی منه نامهربان قارداش
..
..
..
..
بلا بحرینده کشتیّ امیدیم دوشدی طوفانه
اؤزوب ال سرنشینلردن بویاندی ناخدا قانه
آنام تک قویمادی گلدی گیجه شام غریبانه
بیزه هر چند شمر اولموشدی سنسیز پاسبان قارداش
..
..
..
..
هجوم ایتدی قشون خرگاهیمه غارت خیالیله
دایاندیردیم مهاجم دشمنی من اشک آلیله
حیالی قیزلارین زیورلرین بیربیر ملالیله
آلوب صحرایه آتدیم غارت ایتدی کوفیان قارداش
..
..
..
..
خیامه ووردی اود دشمن آلشدی خشک و تر یاندی
یاناندا خیمه لر الله بیلور قارداش نه لر یاندی
نه تک پرسوخته پروانه لردن بال و پر یاندی
منیمده یاندی آمالیم یاناندا آشیان قارداش
..
..
..
..
سنی بیر قان توکن قاتل آپاردی بیر گیجه مهمان
فراقون صبح اولونجا ایلدی صبریم ایوین ویران
سحر گوردوم جداده ایلدون کهف آیه سین عنوان
بو استدلال اویاتمش ملته ویردی تکان قارداش
..
..
..
..
سنه قارداش خبر ویرمیشدی حالون حال زینبدن
مبارک خاطرون آگاهیدی آمال زینبدن
یارالی باشیله سن ایتدون استقبال زینبدن
یقین بولدون باجون سندن اولوب چوخ ناگران قارداش
..
..
..
..
بیزی دشمن اسیر ایتدی آپارسون ظلمیله شامه
ولیکن منزل اوّلده گیتدوق مجلس عامه
اؤزون گوردون اولوب جبراً او مجلسده نه هنگامه
زیاد اوغلی آلوب اطفالدن تاب و توان قارداش
..
..
..
..
تجاهل ایلدی اولده عمداً اول جفاکانی
سوروشدی کیمدی اول بانو گلوب اگلشدی پنهانی
جوابه اولمادی نائل ایدوب تکرار او عنوانی
او پرسشدن او ساعتدن او مجلسدن امان قارداش
..
..
..
..
اهانت قصدی وار فکرینده گوردوم اول خطا کاری
منی نامحرم ایچره وار دانشدیرماقدا اصراری
کنیزه ایلدیم ایما او فاش ایتسون بو اسراری
دیدی زینبدی بو زهرای اطهردن نشان قارداش
..
..
..
..
ایشیتدی تا منم زهرا قیزی زینب او بد کردار
نهانی کینه سین تصمیم دوتدی ایلسون اظهار
ایله سوزلر دانیشدی باخدى یاندی نازنین قیزلار
تحول منده ایجاد ایتدی بو غم ناگهان قارداش
..
..
..
..
سکوتی بولمدیم جائز او حال اضطراریله
خطاب ایتدیم کمال هیبت و خشم و وقاریله
دانیشما ساکت اول فخر ایلوسن نه افتخاریله
دیدیم سیز ایتموسوز گلزار زهرانی خزان قارداش
..
..
..
..
او بیشرمین بو سوزلر آلدى الدن صبر و آرامین
فراموش ایلدی پیغمبرین آیات و احکامین
علاوه پوزدی ظلمیله حدودین دین اسلامین
نهانی کینۀ دیرینه سین ایتدی عیان قارداش
..
..
..
..
آجیغلاندی همان حال غضبله باشلادی صحبت
نه اللهدان اوتاندی قویدی نه پیغمبره حرمت
او ظالم ویردی ناگه جدّیمه بیر ناروا نسبت
او نسبت اولدی طوق زینبه آرتوق گران قارداش
..
..
..
..
او ننگ آلود صحبتدن تحمّل قالمادی منده
دیدیم خوشدور که انصاف و مروّت اولسا دشمنده
تاپوبسان پرورش سن حیف بیر آلوده دامنده
بو منطقدن اولوب مجلسده بیر آتشفشان قارداش
..
..
..
..
ریاستدن ایله مست اولدی قارداش ابن مرجانه
نه باخدی خالق قهّاره نه آیات قرانه
حریم عصمتی اجباریله گوندردی زندانه
او یرده عرشه اوج ایتدی حرملردن فغان قارداش
..
..
..
..
یارالی باشیوون ارشادی مشهود اولدی سیریندن
اولوب بیگانه لر بو یولدا برخوردار خیریندن
بهشته آچدی یول بیر راهبه یول اوسته دیریندن
جهان گورمز ایله مهمان ایله بیر میزبان قارداش
..
..
..
..
اگر چه قیزلارین حفظینده آرتوق اهتمام ایتدیم
بیری آیریلدی بیزدن من اؤزوم تعقیبینه گیتدیم
آنام زهرانی گوردوم دلده کی مقصودیمه یتدیم
بالامی گوردوم آغوشه آلوب اول مهربان قارداش
..
..
..
..
دیر چوخ آغلاما ناراحت اولما ایلمه شیون
منی بیگانه بولمه اؤز آنان تک مهربانم من
بالام قورخما وارام سنلن گلینجه مهربان عمَّن
او حاله باخدیم اولدی خون دل گوزدن روان قارداش
..
..
..
..
او قیز آلدى صدای آشنا مقصودینه یتدی
آنام امّا منی گوردی توان و طاقتی گیتدی
یتیمی بیله ساخلالار مگر باخدی خطاب ایتدی
قییتدوق کاروانه اولدی دردیم جاودان قارداش
..
..
..
..
یزیدین بزمنون بیر خاطرات تلخی وار منده
دانیشدی نامناسب روحیمی غم ایتدی شرمنده
دیدیم اولماز بو سوزلر شأن انسانه برازنده
عتابیله اونا اؤز حقّیمی ایتدیم بیان قارداش
..
..
..
..
بو آیا عدلدندی ای یزید اولما بیله مغرور
سنون اهلون کنیزون جمله اولسون پرده ده مستور
پیمبر قیزلاری نامحرم ایچره خسته و رنجور
دایانسونلار دیدیم شایسته دی بو بانوان قارداش
..
..
..
..
هزاران شِکوه وار قلبیمده بو چرخین جفاسیندن
یزیدین مجلسیندن یا خرابه ابتلاسیندن
یقین قلبون گلر درده رقیّه ماجراسیندن
قوری توپراقلار اوسته حسرتیله ویردی جان قارداش
..
..
..
..
#اربعین #خوندل_تبریزی #ترکی #زبدةالاشعار