روایت ایلوری بو مطلبی بیر اهل ولا #اکبریه_حزین_خسروشاهی

اَلَذُّ الَّذائِذ و اَشَدُّ المَصائُب
(لذت بخش ترین لذتها، شدید ترین مصیبتها)
..
..
..
..
..
مرحوم حزین خسروشاهی
..
..
..
..
..
روایت ایلوری بو مطلبی بیر اهل ولا
حضور حضرت صادقده ایلدیم افشا
..
او حضرتین ائلدیم محضر یندن استفسار
ندور بیانِ اَلَذُّ الَّذائِذِ دنیا
..
ندور اولان هامی لذتلرین لذیذترى
بویور منه ای اولان رمز حکمته دارا
..
اودور بویوردی اَلَذُّ الَّذائِذِ عالم
قوجا آتا آنانون بیر جوان بالاسی اولا
..
آتا آنا قباقیندا گیدنده یول او جوان
کمال حظّ آپارارلار همان آتایله آنا
..
دوباره عرض ائلدیم سیّدى جُعِلْتُ فَداک
ندور اَشدّ مصائب ایا امام هدی
..
فنا جهاندا مصیبت لرین ندور چتینی
آتام آنام سنه قربان اولا بویور مولا
..
آچوب لسان گهربارینی دوباره امام
اودور بویوردی اَشدّ مصائب دنیا
..
جوان اوغول که اولا مایۀ رجا و امید
قوجا آتا آنانون قلبینه بو عالم آرا
..
آتا آنا گوره لر جان ویرور همان او جوان
اولار نه حاله قالار بیر بولر حق یکتا
..
بو سوزده سرور دین آغلادی ایله بیردن
یری واریدی که گلسون نوایه ارض و سما
..
دئدیم اولوم سنه قربان ندور بوحاله سبب
بویوردی یادیمه دوشدی دیار کرببلا
..
او ساعتیکه یخیلدی عقابدن اکبر
یوزون خیامه دوتوب سسلدی اوماه لقا
..
سنه سلام اولا مندن بابا خداحافظ
که عمرومون گونی یتدی زواله تاپدی خفا
..
ائشیتدی خیمه ده بیکس آتا اوغول سسینی
الی اورکده گوزی یاشلی دیلده واولدا
..
نه نوعی مرکبه اولدی سوار گلدی نجه
یازانمارام که زبان و قلمده یوخ یارا
..
بو قدر وار یتیشنده آتا جوان بالایا
کسیلدی طاقتی سلب اولدی اختیار و قوا
..
اؤزون سالوب یره بی اختیار مرکبدن
دیزینده اولمادی طاقت ولی ایاقه دورا
..
نچه قدم دیزی اوسته سوروندی سرور دین
اؤزون یتوردی او صدچاک اولان جنازیه تا
..
نجه جنازه که گلمز شماره یاره لری
نجه جنازه اولوب بند بندن اعضا
..
نجه جنازه که طرحین پوزوبلا ظلمیله
قلجدی نیزه دی خنجردی اوخدی سرتا پا
..
نجه جنازه که بیر دسته قرمزی گولدی
ائدوبله پرپر اونی جور و ظلمله اعدا
..
نجه جنازه علی تک قلجلانوب باشی
آخوب قانی بویانوب قانه صورت زیبا
..
او قدر قالمادی روحی بدندن آیریلسون
او قلب عالم امکان نه حاله قالدی خدا
..
که چخدی زینب کبری خیام طاهره دن
دیلینده واولدا واحسین او کنز حیا
..
نجه گلوب نجه شه قیتروب خیامه اونی
کمال معذرتیم وار بو سوزده یا زهرا
..
آلوب او پارچالانان باشینی دیزی اوسته
او قان اولان اورگی دوتمادی قرار اما
..
اگیلدی قویدی یوزون نوجوانینون یوزونه
محاسنون بویادی شاه دین اوغول قانینا
..
«قَدِاستَرَحتَ » دیدی همّ و غمّ دنیادن
ولی بو چولده آتان قالدی بیکس و تنها
..
سحر ستاره سی تک چوخ آز اولدی عمرون اوغول
ایشیقلی گوندوزی ائتدون گوزومده لیل دجا
..
علی گوروم اولا سندن صورا جهانی فنا
الیمدن آلدى سنى ظلم الیله اهل جفا
..
یارالی جسموی حمل ائتمه سم خیامه اگر
سزادی گلسه له میدانه عترت طاها
..
گرک عبایه یغام دوغرانان بو اعضانی
که خیمه ده یولوی گوزلوری آنان لیلا
..
دونوب جوانلارا ائتدی خطاب میرهدی
بو دوغرانان بدنی قویمیون یر اوسته قالا
..
خیامه حمل ائلیون گوزلوری آناسی یولون
حیاسی مانع اولوب ائتموری فغان و نوا
..
بئله دیورله گورنده حسینون احوالین
پوزولدی حالی بویوردی جوانلارا سقا
..
علینی سیز آپارون خیمیه، حسینی ده من
یواش یواش گتوروم گلماقا یوخ اوندا قوا
..
خدا بولور نجه حمل ائتدیلر او گل بدنی
خیام طاهره ده قویدولار جنازه نی تا
..
توکولدی اهل حرم گوزلرینده سیل سرشگ
آلوب آرایه او جسم شریفی آل عبا
..
امام امر ائلدی لیلینی گتورسونلر
گلوب گولون گوره لازمدی بلبل شیدا
..
نجه گتوردوله لیلانی بولمورم یارب
نجه گلوب نجه گوردی اوغول وجودین آنا
..
یارالی جسمینی جان تک چکوب بیر آغوشه
دیدی آنان ئوله نه حالدور بو سنده بالا
..
دیلون فداسی اولوم نطقه گل دانیش منله
اماندی آچ گوزون ای گوزلریمه نور و ضیا
..
منیم زمانه ده سن مایۀ امیدیمیدون
یوزوم زمانه ده سندن صورا گوله حاشا
..
جهاندا بیرده اوغول باخمارام گوله چمنه
که گئتدی رونق گول قالمادی چمنده صفا
..
مطوّل اولدی کلامون «حزین» تمام ایله
تمام اولان دگی گرچه بو محنت عظمی
..
حسینی اکبرینه آند ویر دئ درد دلون
که چوخ سُور اونی عالمده سیّدالشّهدا
..