زمین کرب و بلا نوحه و نوا یریدی #کربلا_دخیل

زمین کربلا
.
.
مرحوم دخیل
.
.
زمین کرب و بلا نوحه و نوا یریدی
على الخصوص حسینی لره عزا یریدی
.
گرگ بلا چکه هر کیمسه کربلایه گلور
نچونکه کرب و بلا اهلینه بلا یریدی
.
اولان بلائیله بیگانه قالماسون گیتسون
که کربلا یری هر یرده آشنا یریدی
.
کسوبله بوردا سوسوز روح عالمی قربانی
برَبِّ کعبه بو پر باطناً منا یریدی
.
یوزیوی توپراقا قوی بوردا چون یوزی اوسته
اولان شهید ذبیحاً من القفا یریدی
.
دَلیک دَلیک بدنی نی کیمی نوائیله
حسین قطع نفس اولدى نینوا پریدی
.
دویونجا ایچمه سرین سو حسین صحنینده
دوتوم حلال دی شرعاً ولی حیا یریدی
.
ئولنده هر چه دیوب سو گوزی فراته باخوب
کسوب باشینی سوسوز شمر بدلقا یریدی
.
اوزاتما ال سویا عباس صحنینده گیتسن
سو اوسته اللری تندن اولان جدا یریدی
.
بو یرده چون یخیلوب نقش باغلیوب اکبر
وجیه وجهیله پیغمبر خدا یریدی
.
لباس تازه گیه للّر بو شهرده زوار
خیال ایده لَّه که تازه قبا عبا یریدی
.
حسین بوردا قالوب اوچ گون اوچ گجه عریان
نه بیر ردا نه عمامه نه بیر قبا یریدی
.
زیارته گلن عورتلره دیون آی قوم
بو شهر زینب بی قوم و اقربا یریدی
.
گرکدی ایلیه لر بوردا زینتی موقوف
نه تازه خلعت و نه وسمه بَل حیا یریدی
.
سویوبلا بوردا حیالی خانملاری کفّار
سویاندا عرشه چخوب وامحمدا یریدی
.
ادب طریقینی ساخلا حسین رواقینده
که انبیای اولوالعزم و اولیا یریدی
.
حرام دور حرمه اولما أذن سیز داخل
نچون حرم حرم پاک مرتضا یریدی
.
آچوبدی باشینی زهرا دوتوب حسینه عزا
حریم عصمت ناموس کبریا یریدی
.
گوزیوی سن ایله یوم تا که گورمه سین یوزونی
که بنت محترم ختم الانبیا یریدی
.
خلافدور باخاسان دیدۀ حقارتیله
یوزونه باخسان اگر میر هل اتی یریدی
.
که حفظ صورت اگر مقتداسیدور هر چند
صفا مقامیدی مرآت حق نما یریدی
.
دینده تا اَرِنی بوردا غشّ ایدوب موسی
گوزیوی یوم قولاق آس لفظ لن ترا یریدی
.
بیر اوزگه حالت اولور حالتیم کمک لیق ایدون
که ایندی باشه ووروم ناله و بکا یریدی
.
بو یرده چون سویولوب باش آچیق قالوب زینب
دیردی بار خدایا نه چوخ جفا یریدی
.
نقابسیز قالا زهرا قزی مگر کمدور
که اود دوتوب یانالار قوم اشقیا یریدی
.
یوزینه زلفینی توکدی چون اولمیاندا نقاب
حیالی عورت اگر زلفینی سالا یریدی
.
دیردی بس هانی حیدر حجاب اعظم حق
یتیشه دادیمه چون شاه لافتی یریدی
.
گوروب بو حالتیمی گلسه غیرتی جوشه
نقاب ایدر یوزینه زلف مشگ سا یریدی
.
نقدر یالواریرام یوخدی بیر مسلمانی
که باشیمه سالا بیر مندرس عبا یریدی
.
دخیل جهد ایله چوخ فرصتی غنیمت بول
یرین بهشت برین دور که کربلا یریدی
.
حسینه دوت یوزیوی اَینما تکونوا دور
توجه ایله گوتور ال که بو دعا یریدی
.
آپار مریضلره قانلی توپراقین سوغات
باتوب حسین قاننا توپراقی شفا یریدی
.
.
#کربلا #دخیل #آرزوی_کربلا
#زمین_کرب_و_بلا_نوحه_و_نوا_یریدی
#ترکی
#زبدةالاشعار