#جنگ_دو_برادر
.
#زبدةالاشعار
.
: @nohe_torki
.
حاج غلامرضا عینی فرد زنجانی
.
زیبنده دی یار اولسا اگر قارداشا قارداش
جان قربان ایدر وقت خطر قارداشا قارداش
.
.
قارداشلقین عالمده بیر آیری دادی واردی
قارداشی اولان شخصیلرین هر زادی واردی
اصلاً نگران اولماز اگر مین یادی واردی
بدگونده گلیب درده دیر قارداشا، قارداش
.
.
سرمایه دی یاخشی اولا قارداش بو جهاندا
محکم دایاق انسانه اولار یاخشی یاماندا
بیر گون بشرین داش ایاقندان توخاناندا
اوندا هامادان چوخ غم ایدر قارداشا، قارداش
.
.
هم خوندی اولار بیر آتادان بیر آنادان چون
بیربیرلرینون یاخشی اولار دردینه دَیسون
حرمت او کیچیک جامعه دن ترک اولا بیر گون
باجی باجیا نقشه چکر، قاراش، قارداشا
.
.
تاریخیده وار بیر آتا رحلت ایلین دم
اوغلانلارینی دوره سینه سسلدی باهم
گلدی هامسی کوچک و هم اوسط و اعظم
ایستور بولونه نیلیلر قارداشا، قارداش
.
.
باشلوبدی وصیّتلرین اوُل پیر خردمند
بیر سوز دیدی اوغلانلارینی ایلدی خرسند
بیر نچّه لَخَه نازک آغاج بیر بیره پیوند
گورستدی او دم ایتدی نظر قارداشا، قارداش
.
.
ناگه بیوک اوغلون چاغیروب مرد خجسته
سویلوب بالا سندیر بولاری بیر بیره بسته
اولموب نقدر وردی گوجون بسته شکسته
وار بوندا معما دیدیلر قارداشا، قارداش
.
.
باشلوب ایکیسینجی اوغول اشجاریله پیکار
اوز قدرتینی صرف ایلدی سنمادی اشجار
سویلوب آتاسی یورما اوزون ایلمه اصرار
حیراندى ندور قصدی دییَر قارداشا، قارداش
.
.
گلدی اوچومنجی اوغول اولدی اودا مردود
دوردومجی نفرده دیمه ایشدن آپاروب سود
عرض ایلدیلر سرّی ندور والد مسعود
دوشموش نفسی تنگه گولر قارداشا، قارداش
.
.
گفتاریله ورموبدی اوشاقلاره جوابین
ناگه او آغاجلارین آلیب آشدی طنابین
پایانه یتوردی او خردمند کتابین
سر در گم اولوبدی دیینَر قارداشا، قارداش
.
.
بیر شاخه آقاج آیری سچیبدی او مسلمان
ویردی بیرینه سویلدی سندیر بونی اوغلان
فوراً آرادان سندی گنه ایتدیلر اعلان
بوردا دیه سن واردی خبر قارداشا، قارداش
.
.
عرض ایلدیلر فاش ایله بو مطلبی بابا
ئولسم دیدی باهم یاشیین کوچک و برنا
تَکلنماخ همان، سندراجاخدی سیزی أعدا
اولسون دیورم گوش و بصر قارداشا، قارداش
.
.
دنیاده اولون بیر بیرینون پشت و پناهی
گر فاصله دوتساز بولورم خواه و نخواهی
گردابه دوشرسوز تاپار عمروزده تباهی
نعمتدی یقین شام و سحر قارداشا، قارداش
.
.
بو بیر آتادی تاپشیروب اوغلانلاری بیر بیر
بیر گونده ده تاپشوردی علی شاه جهانگیر
اولماز بو نمایشدن ایا صاحب تحریر
وقتینده گلوب نیلدیلر قارداشا، قارداش
.
جان اوسته على کوفه ده باشینده یاراسی
اطرافیده سرکرده لر اگنینده قاراسى
سسلندی حسینیله اوزون قولی بالاسی
باخدوقجا دیوب وار نه خبر قارداشا، قارداش
.
.
عبّاسین الیندن یاپشوب ویردی حسینه
تاپشوردی ابوالفضلی او سلطان مبینه
بیرده دیدی عبّاس کمک اول حسنینه
همراز اولاسیز وقت سفر قارداشا، قارداش
.
.
دوران دولانوب گلدی او گون کشف اولوب اسرار
حق لشگرینه اولدی ابوالفضل علمدار
سقّائیدی، سرلشگریدی منشی دربار
تلّین دالیسین ایتدی مقر قارداشا، قارداش
.
.
یوزمین قوشون آز مدّت او صحرایه توکولدی
قان سیل کیمی دشت غم افزایه توکولدی
اوخ، نیزه، قلج داشلار او مأوایه توکولدی
دین صحبتی وار تیغ چکر قارداشا، قارداش
.
.
عبّاس گیدیب عشقیله دریانی آلیبدی
جان قیمتینه سو او ادب کانی آلیبدی
دوشدی یولا اطرافین عدو آنی آلیبدی
وقت اولدی ایده سینه سپر قارداشا، قارداش
.
.
تل اوسته دوروب پادشه بیکس و بی یار
ایلوردی نظارت گوره نیلور او سپهدار
گوردی اونی بیر مشگ سودان اوتری ورولّار
حسرتله توکوب خون جگر قارداشا، قارداش
.
سسلندی اوزون قول اوجا بوی قارداشیم ای وای
ای هاشمیلر ایچره اولان صورتی چون آی
آفاقه سالیب تیغی الینده حسین آوای
گلدی کمک أول کنز گهر قارداشا، قارداش
.
.
لا حول و لا قوّة سسلندی دمادم
شمشیرینه توش اولدی او دم هنگ مقدم
عبّاسین الیندیدی او بحرانیده پرچم
قوزوب گویه خوش گلدون ایدر قارداشا، قارداش
.
.
ساقدان دگوب اود، صولدان الو لشگره گویا
بیر تیغ اوزون قول وروری بیر قلج آقا
فریاد و فغان عرشه چخور حشریدی آیا
شمشیر یازور فتح و ظفر قارداشا، قارداش
.
.
نیزه سپره، خنجره اوخ گلدی توقوشدی
چوخ کشته اولوب، قلعۀ وحدت ولی اوشدی
آخر ایکی شیر اورتاسنا فاصله دوشدی
یاندی اورگی ایتدی نظر قارداشا، قارداش
.
.
هر لحظه اوزاخلاشدی ایکی مرد سلحشور
بیر رمزیله امید ایوینی ایتدیله معمور
یعنی سس آتا بیربیره هر قدر اولا مقدور
خوشدور کمک اولسا نقدر قارداشا قارداش
.
.
جنگ دو برادر، دو قوی پنجه، دو شمشیر
سالدى قوشونی آت دوشونه ایتدی زمینگیر
بیر پارچا اولوبلار لالا قان لالیه بنزیر
یول آچماقا قاندان سو سَپَر قارداشا، قارداش
.
.
تیتروردی بلا دشتی تکاپوی قوشوندان
توز چتر کیمی اولدی فضا اوسته نمایان
آتلار یره راکبلرینی آتدی هراسان
سالمدى او دم نعره ایدر قارداشا، قارداش
.
.
فرزند رسولم بویوروب سرور بطحا
فوراً سسینه سس ویروب عبّاس توانا
عبّاسم على اوغلی بولون لشکر اعداء
گوزلر دیوری بیرده دوشر قارداشا، قارداش
.
.
فرزند بتولم بویوروب سبط پیمبر
عبّاس اوجالدور علمین شاهینی سسلر
عبّاسم آتامدی همان اول فاتح خیبر
یعنی که پیامین یتورر قارداشا، قارداش
.
.
شمشیر حسینده گورونور قدرت قهّار
تاب ایلموری تیغ ولیّ اللهه اشرار
دنیا یوزونی پنبه دوتا یاندیراجاخ نار
باخ گور نه گوزل وئردی ثمر قارداشا، قارداش
.
.
مخیم طرفینده دولانیردی شه عالم
شمشیرینی نهر اوسته وروب صاحب پرچم
گلدی بالا قزلارینا باش چکسون همان دم
گوندردی ولی غملی خبر قارداشا، قارداش
.
.
زهرا بالاسی اولدی او دم زار و پریشان
ادرکنی سسین بیردن ایشیتدی شه عطشان
سقّانی بیلیب کوفه لیلر سالدی آتدان
احوالین ایدیب زیر و زبر قارداشا، قارداش
.
.
مخیمده حسین قارداشینن تا سسین آلدى
زینب دیوری گوردوم اونون رنگی سارالدی
عبّاس دوشوب اوردا، حسین بوردا قوجالدی
هجرانی وروب گور نه شرر قارداشا قارداش
.
.
.
.
#عباسیه_عینی_فرد
#عباسیه_شهادت
#زیبنده_دی_یار_اولسا_اگر_قارداشا_قارداش
#ترکی
.
#زبدةالاشعار
.
: @nohe_torki
نظر دهید