سس دوشدی شامیده که اسیر بلا گلور #ورود_شام_صافی_تبریزی

حالات ورود اهلبیت اطهار(ع) به شهر شام
حالات خرابه شام و مجلس یزید
..
..
..
..
مرحوم صافی تبریزی
..
..
..
..
سس دوشدی شامیده که اسیر بلا گلور
قول باغلی شامه زینب بی اقربا گلور
.
باطنده گرچه طالعی طالعدی گون کیمی
ظاهرده شام تک گونی بختی قرا گلور
.
چخدیلا اهل شام تماشایه تا بلوب
بیر سلسله اسیر غم و ابتلا گلور
.
اللرده چنگ و بربط و طنبور و دف تمام
هر گوشه دن آچیق قولاقا بیر صدا گلور
.
بیله بلوردولر که اولار خارجی دیلر
گورموردیلر که آل شه قل کفی گلور
.
گه اوخشادوردی دیلم و تاتار اسیرینه
گاهی دیردیلر که اسیر بلا گلور
.
گاهی دیردولر که بولار یاغیدور تمام
که ایلیوبدی هر بیریسی بیر خطا گلور
.
گاهی صدا صدایه ویروب کف چالوردیلار
باشی آچوق گورنده که بیر مبتلا گلور
.
گورجک جداده بیر پارا آی گون شبیهی باش
حیرتده قالدیلار ندو بو مایرا گلور
.
دوشموشدی باشلارین قباقیجه سر امام
آرای قباقدا قافلیه رهنما گلور
.
قرآن اوخوردی شه باشی نوک سنانیده
گورسونله تا دلینده کلام خدا گلور
.
ظلم آیه سی تلاوت ایدردی او تشنه لب
بلسونله که هدایته میر هدی گلور
.
یعنی گورر جزا گونی ظلمین نتیجه سین
اول گون که رو سیاه بو شمر دغا گلور
.
بیر بیر گچیردیله شهدا باشی نیزه ده
گون گچمه میش گوردیلر بیر مه لقا گلور
.
دیشره چخوب صفایه گلن شام قیزلاری
بیر باشی گوردولر که عجب دلربا گلور
.
قانه باتوبدی سنبل مشکینی تل به تل
بیر گلشنون دولوسوجه ذوق و صفا گلور
.
اکبر دیللر آدینه اوخشور پیمبره
حیدر بولوب کسوبله باشین، مصطفی گلور
.
سویلردیله بیری بیرینه کیمدی بو جوان
بوندان مشام جانه شمیم وفا گلور
.
بو مشک ایگی دگل گتورور، عطر زلفی دور
هردم گچور او نیزه ده یانندان صبا گلور
.
بی فهمدور بو صورته شمس الضحی دین
انصاف ایتمیوب دیه بدر الدجی گلور
.
معلوم اولان بودور که یانندا آناسی وار
بو دینماماقدا چوخ نظره با حیا گلور
.
جای عجبدی بیله اوغولدان صورا قالوب
دوشموش دالنجه قولاری باغلی آنا گلور
.
قاسم باشین جداده گورن دوشدی حیرته
گوردی او باش خیالینه نو کدخدا گلور
.
اما اولوبدی قتلگهی حجلۀ زفاف
یاخموش عروسی اللرینه قان حنا گلور
.
آغلار یانار عم اوغلی سینا گاه گاهیده
بیر مختصر نگاهه وار اوندا رجا گلور
.
عباس نامدار باشین تا او سهمله
هر کیم گوروب دیردی یقین مرتضی گلور
.
سقادی، تشنه لبلری سیراب ایدنمیوب
رنگی خجالتیندن اولوب کهربا گلور
.
باشلار گچردی نیزه ده، هر نازنین باشین
بولموردوله که آردیجا بیر بینوا گلور
.
هر وقت های و هوی آزالوردی گوروردولر
گه وا ابا صداسی گه وا اخا گلور
.
چکدی یهود کوچه سینه شمر زینبی
چون گوردی فکره بیر ستم ناروا گلور
.
چخمشدی جمله غرفه و بامه یهودیلر
ناگه ایشیتدیلر که بو سس بو ندا گلور
.
ای ملت یهود نه آرام اوتورموسوز
آگاه اولون، بلون، ندو بو ماجرا گلور
.
بو قافله که سیز گوروسوز باش آچوق تمام
گوزده سرشک، دلده نوا برملا گلور
.
خیبرشکن علی ولی نون عیالی دور
قول باغلی سینه داغلی غمه آشنا گلور
.
بو قانلی باش که نیزه ده کهف آیه سین اوخور
باشدان باشا او قصه نی ایلر ادا گلور
.
یتدی مباهله ایلین گون باش آچماقا
حاضر اولان حسینیدی ذبیح القفا گلور
.
پیغمبر اوغلیدور بونا یثربده خامس
آل عبا دیردیله گلگون قبا گلور
.
هر کیمسه مدعی دور اگر انتقام آلا
آسان طریقیله اله بو مدعا گلور
.
واردور اجازه ایتمیون هرگز مضایقه
ظلمه خیالیده هارا تک انتها گلور
.
بی شرم رو جماعته فرصت دوشوب اله
بلدوله تا عیال شه اولیا گلور
.
دولدوردولار اتکلرینی داشیله تمام
تک تک دیردیلر دله هر ناسزا گلور
.
گویا او شیشه قلبیلره خوش صفا ایچون
ویرمیش هواده سس سسه سنگ جفا گلور
.
گاهی توکردی باشلارینه اودلی نیلری
باخمازدیلار که نی تک اولاردان نوا گلور
.
بیر بی حیا عجوزه اوتورموشدی غرفه ده
گوردی قباقدا راس شه کربلا گلور
.
یاقوت فامیدور در دندانی قانیله
اما سالوبدی هر یره گون تک ضیا گلور
.
گه گه دونور دالیه باخور، قانلی گوزلری
گورسون سکینه سی دوه دن دوشدی یا گلور
.
بیردم بالالاریندان او شه گوز گوتورموری
گور فکریوه بو مهر و وفاده آتا گلور
.
سویلوب آتاسی چون آتامی ئولدوروب منیم
قلبیمده بیر قصاص ایلیوم چوخ بجا گلور
.
بیر داش گوتوردی ایتدی نشان سجده گاهینی
سانموب نماز اهلیدی دلده دعا گلور
.
مرآت حق نما یوزینی دوتدی تازه قان
آخدوقجا قان او آئینیه انجلا گلور
.
بیر مختصر بیانیله من ایسترم دیم
اول نکته نی که قلبیمه چوخ غم فزا گلور
.
دروازه دن خرابیه نه قدر راهیدی
نه ساعته بو آز یولی بیر لنگ پا گلور
.
شامه گیرنده اهل حرم وقت صبحیدی
بیر صبح شام اولوب گنه آل عبا گلور
.
یتدیله گون غروب ایلینده خرابیه
نولموش بو نوع عترت خیر الوری گلور
.
گویا دولاندوروب دیله بیر شهرین هر یرین
نه قسم گور حریم شه هل اتی گلور
.
ذکر خرابه اولدی ایشیتدون یقین سنون
منزل گلور خیالیوه ویران سرا گلور
.
ویرمیشدیلر مکان او یری اهل حق اوچون
انظاره بیر خطایه مقابل جزا گلور
.
نه سقفی واریدی که آلا گون حرارتین
نه اوزگه سایبانه گمان ای خدا گلور
.
دیواری واریدی ولی یکسر شکستیدی
بو باره دن نوایه هامی انبیا گلور
.
فکر یزید دون بوییدی قطع نسل اولا
بیر کس گمانه گور بیله بی شرم اولا گلور
.
قویموب او منزل ایچره ده آسوده زینبی
حاشا جهانه بیر بیله تخم زنا گلور
.
بیر گون مرتب ایلدی بیر مجلس سرور
هر نه خیاله گلسه یقین بل نما گلور
.
جمع اولدی پایتختیده اشراف مملکت
سلطان حضورینه دیمه هر بیر گدا گلور
.
تخت خلافته چخوب اگلشوب اوزی
اولموش وزیرلر امرادن سوا گلور
.
احضارنامه گوندروب ایلچیان روم
تک تک همان او دعوته سولوب بلا گلور
.
قویدی برابرینده حسینون کسوک باشین
تک گوهر سرشکیوی طشت طلا گلور
.
حکم ایلدی گیدون گتورون آل حیدری
بلسه آتاسی بوردادی زین العبا گلور
.
بو امریله خرابیه بیر نچه سخت دل
مامور، الده سلسله بی اعتنا گلور
.
گورجک خرابه اهلی یزیدین خدملرین
ایتدی خیال آجلار مطلق غذا گلور
.
سویلردیله بیری بیرینه احتمالی وار
زار و علیل امامه طبیب و دوا گلور
.
زنجیریله طنابی گورنده یغشدیلار
واردور یری نوایه دیم اوصیا گلور
.
تسبیح وار بیر ایپه دوزدیله جمله سین
سانه گلنده هر بیری لیکن جدا گلور
.
حبل المتین عیالینی چکدیله مجلسه
گویا اسیر دیلم و چین و خطا گلور
.
فرمایش ایلیوب بونی بیمار امام اوزی
ذکر ایلینده قلبه او غم جا به جا گلور
.
باغلیدیلار بویون بویونا آل بوتراب
شرح اولسا فاش نالۀ وا ذلتا گلور
.
وارد اولاندا بزم یزیده باخان گوروب
بیر دسته قدی بار المدن دو تا گلور
.
دوشموش قباقه مرشد، جبرئیل اولوب دلیل
امر جلیله سولموب اولده لا گلور
.
گرچه علیل و زاریدی، تب واریدی ولی
بولموش همان او مجلسی دارالشفا گلور
.
چون مقتدای دینیدی قول باغلی دل غمین
آردینجه بیر جماعت ایدوب اقتدا گلور
.
بی اعتنا نظاره ایدردی یزید دون
ایتدی سماع، تازه اوجالموش صلا گلور
.
گورجک او دل کباب لری ایستدی شراب
باخ کبریله دولی باشا، گور نه هوا گلور
.
ایچدی شراب، اوینادی شطرنج، مست اولوب
عقلین اوتوزدی فکره گوروب کم بها گلور
.
بیر باخدی اهل مجلسه بیر باخدی زینبه
گوردی او بزمیدن نظره نارضا گلور
.
بیر ظلم فاحش ایلدی یاندوردی قلبینی
گورجک دیلینده ذکری اولوب وا اخا گلور
.
توکدی شرابی طشت طلانون کنارینه
یان ای گوگل که شیونه ارض و سما گلور
.
گاهی ووراردی لب لرینه چوب خیزران
سانمازدی قهره خالق جل و علا گلور
.
سویلردی باخ جلالیمه چون سندن اوتریدور
من ویرمیشم خبر که شه نینوا گلور
.
گه جکم ایدردی آل علینون فروشینه
گاهی دیلینه کلمۀ حمد و ثنا گلور
.
گوردی یزید اوتانموری دیل‌لندی جاثلیق
کیم کیمدن اوتری ایتماقا گور التجا گلور
.
یکباره زنگ کفر سیلیندی او قلبیدن
آئینه چون سیلیندی اونا بیر جلا گلور
.
بیر صاف قلبیله دیدی ای بی حیا اوتان
سن گورموسن بو بزمه هامی اصفیا گلور
.
سن بیرجه زینبی گوروسن خوار باش آچوق
زینب سراغینه بودی خیرالنسا گلور
.
بو ناوشی که سن گوروسن دست بسته دور
موسی دوشوب قباقیجه الده عصا گلور
.
چیگنینده یوخ عباسی، سینوب قلبی ظلمیله
عیسی ولی یاننجا گوتورموش ردا گلور
.
کبر ایلوسن که پرده نشیندور حرم لریم
بی پرده گورموسن حرم کبریا گلور
.
تولانموسان بو دار فنانون جلالینه
اول با خبر عقوبت دار بقا گلور
.
کیمدور بو باش که احمد مرسلدی باش گلن
انجیلیده کتابت اولان ایلیا گلور
.
بو قانلی باش شبیریدی، سن سویلوسن حسین
بیزلر شبر دین حسن مجتبی گلور
.
بیر ذکری وار دیلینده آلور اختیاریمی
بو ذکریدن آردیجا هامی اهل ولا گلور
.
ظالم قوناقیوی دوگوسن اوز ایوونده سن
گویا خیالیوه اودا بیر خوش صفا گلور
.
از بس دیوب بو سوزلری رسوا اولوب یزید
هاردایدی سوز، دولاندی گنه گور هارا گلور
.
حکم ایتدی بو جوان نصارانی ئولدورون
حق بیر سوز اوسته ئولماقا گور کیم فدا گلور
.
اولدی شهادتین اونا تعلیم امامیدن
دین مشکلینده اوزلری مشکل گشا گلور
.
جان ویردی قلباً ایلدی سودا بهشتیله
گوردی قباقه موقع بیع و شری گلور
.
قورتولدی ظلمت شب یلدای کفریدن
روز جزاده صورتی شمس الضحی گلور
.
#صافی دایان تمام ایله باخما دوتوبدی شور
طبع سلیمون ایلوری اکتفا گلور
.
آخر حسین آدیندا نه وار گلسه مجلسه
بی اختیار نالۀ داد و بکا گلور
.
گویا آناسی فاطمه آغلور که آغلادور
مطلق عزا اولان یره صاحب عزا گلور
.
#ورود_شام
#خرابه_شام
#مجلس_یزید
#سس_دوشدی_شامیده_که_اسیر_بلا_گلور
#صافی_تبریزی
#ترکی
#زبدةالاشعار